निगडी बस स्टॉपवरील धोकादायक चेंबरचा प्रश्न अखेर सुटला!
मेट्रो प्रशासनाच्या दुर्लक्षानंतर ‘फ’ क्षेत्रीय अधिकारी अतुल पाटील यांनी वैयक्तिक लक्ष देत केली तातडीने दुरुस्ती; भाजप कार्यकर्ते सचिन काळभोर यांच्या मागणीला यश
पिंपरी, प्रतिनिधी शाम सोनवणे, दिनांक १३/१०/२०२५, मॅक्स मंथन डेली न्यूज:
मुंबई-पुणे महामार्गावरील निगडी बस स्टॉपजवळील तुटलेल्या चेंबर झाकणाचा आणि रस्त्यावर साचणाऱ्या पाण्याचा गेल्या दीड वर्षापासूनचा गंभीर प्रश्न अखेर ऑक्टोबर रोजी कायमस्वरूपी मार्गी लागला आहे. ‘फ’ क्षेत्रीय अधिकारी अतुल पाटील यांच्या विशेष प्रयत्नांमुळे ही दुरुस्ती तातडीने पूर्ण झाली आहे.
या धोकादायक स्थितीमुळे अपघातांचे प्रमाण वाढले होते, याबद्दल पिंपरी चिंचवड महानगरपालिका आयुक्तांना वेळोवेळी निवेदने देण्यात आली होती.
मेट्रो प्रशासनाचे दुर्लक्ष, ‘फ’ क्षेत्रीय अधिकाऱ्यांची तत्परता
या महामार्गावर निगडी ते पिंपरीदरम्यान मेट्रो रेल्वेचे काम सुरू असल्याने, या रस्त्याची दुरुस्ती करण्याची जबाबदारी पिंपरी चिंचवड महानगरपालिका प्रशासनाने पुणे मेट्रो रेल्वेच्या अधिकाऱ्यांकडे वर्ग केली होती. मात्र, मेट्रो रेल्वे प्रकल्प अधिकारी या समस्येकडे जाणूनबुजून दुर्लक्ष करत होते, असा आरोप आहे.
या गंभीर समस्येची दखल घेत ‘फ’ क्षेत्रीय अधिकारी अतुल पाटील यांनी वैयक्तिक पातळीवर लक्ष केंद्रित केले. त्यांनी विशेष निधी मंजूर करून निगडी बस स्टॉप येथील चेंबरची आणि रस्त्याची दुरुस्ती करून घेतली. यामुळे आता त्या ठिकाणी नवीन चेंबरचे झाकण बसवण्यात आले असून, रस्ता सुस्थितीत आला आहे.
भारतीय जनता पार्टीचे पिंपरी चिंचवड शहर कार्यकर्ते सचिन काळभोर यांनी या दुरुस्तीसाठी सातत्याने पाठपुरावा केला होता. त्यांच्या पाठपुराव्याला आणि अधिकारी अतुल पाटील यांच्या तत्परतेला यश आले असून, नागरिकांची मोठी गैरसोय आणि अपघाताचा धोका टळला आहे.
© मॅक्स मंथन डेली न्यूज. सर्व हक्क राखीव.
