पर्यावरणपूरक आणि सुरक्षित दिवाळीसाठी PCMC सज्ज! – CEO श्रावण हर्डीकर यांचे अधिकाऱ्यांना निर्देश

स्थायी समिती बैठकीत विकासकामांना मंजुरी; R.R.R. केंद्रात वस्तू जमा करण्याचे नागरिकांना आवाहन

पिंपरी, प्रतिनिधी शाम सोनवणे, दि. १७ ऑक्टोबर २०२५, मॅक्स मंथन डेली न्यूज:  दिवाळी हा आनंद, उत्साह आणि ऐक्याचा सण असून, या काळात नागरिकांची दिवाळी आनंददायी, सुरक्षित आणि सुखकर व्हावी, यासाठी योग्य नियोजन करण्याचे स्पष्ट निर्देश पिंपरी चिंचवड महापालिकेचे आयुक्त तथा प्रशासक श्रावण हर्डीकर यांनी दिले आहेत. शहरातील स्वच्छता, कचरा व्यवस्थापन, अग्निशमन यंत्रणा आणि वाहतूक व्यवस्थापन सतर्क ठेवण्याचे आदेश त्यांनी संबंधित अधिकाऱ्यांना दिले.

महापालिकेच्या दिवंगत महापौर मधुकर पवळे सभागृहात स्थायी समितीची बैठक दृकश्राव्य माध्यमातून (व्हर्च्युअल) पार पडली. यावेळी ते बोलत होते. बैठकीला अतिरिक्त आयुक्त विजयकुमार खोराटे, तृप्ती सांडभोर, सहआयुक्त मनोज लोणकर, नगरसचिव मुकेश कोळप यांच्यासह विभागप्रमुख उपस्थित होते.

आयुक्त हर्डीकर यांनी दिवाळी काळात प्रशासनाने खालील बाबींवर लक्ष केंद्रित करण्याच्या सूचना दिल्या:

• पर्यावरण संरक्षण: फटाक्यांमुळे होणारे प्रदूषण टाळण्यासाठी जनजागृती मोहीम राबवावी.

• स्वच्छता व व्यवस्थापन: शहरातील स्वच्छता आणि कचरा व्यवस्थापन यंत्रणा प्रभावीपणे राबवावी.

• आपत्कालीन यंत्रणा: अग्निशमन यंत्रणा सतर्क ठेवावी.

• वाहतूक आणि गर्दी नियंत्रण: गर्दी नियंत्रण आणि अपघात प्रतिबंधक उपाय तत्परतेने राबवावेत. गर्दीच्या भागांत वाहतूक व्यवस्थापनासाठी आवश्यक पथके नेमावीत.

आयुक्त श्रावण हर्डीकर यांनी यावेळी शहरात सुरू असलेल्या विकासकामांचा आढावा घेतला आणि स्थायी समिती बैठकीत सादर झालेल्या अनेक महत्त्वाच्या विषयांना मंजुरी दिली. यामध्ये प्रमुख निर्णयांचा समावेश आहे:

• पाणीपुरवठा योजना: रहाटणी, लांडेवाडी, दिघी, चऱ्होली, बोपखेल, कृष्णानगर, पाटील नगर, जाधववाडी, गवळीमाथा, सांगवी, पिंपळे गुरव, दापोडी, थेरगाव, वाकड, पुनावळे येथील पंप हाऊसचे चालन करणे तसेच पाणीपुरवठा विभागाच्या परीचालनाच्या कामांच्या सुधारित खर्चास आणि मुदतवाढीस मान्यता.

• रस्ते दुरुस्ती आणि विकास: फ-क्षेत्रीय कार्यालयांतर्गत प्रभाग क्र. १२  व १३ मधील पाणीपुरवठ्याच्या कामासाठी केलेले खड्डे हॉटमिक्स पद्धतीने दुरुस्त करणे. कासारवाडी पूल ते दापोडी पुलापर्यंतच्या १८ मीटर डी.पी. रस्ता विकसित करण्यासाठी सल्लागार नेमणूक करणे.

• शैक्षणिक आणि आरोग्य सुविधा: महापालिकेच्या नवीन रुग्णालय व विविध विभागाकडील मागणीप्रमाणे बेंच खरेदी करणे. २०७ बालवाड्यांमधील विद्यार्थ्यांना सकर आहार पुरवठा करण्याकरिता मे. अन्नामृत फाउंडेशनला द्वितीय मुदतवाढ देणे.

• पर्यावरण: मनपा हद्दीतील वृक्षांचे पुनर्रोपण करणे व तीन वर्ष देखभाल करण्यासाठी खर्चास मान्यता. क आणि ड क्षेत्रीय कार्यालयांतर्गत नव्याने विकसित करण्यात आलेल्या रस्ते दुभाजकांमध्ये पोयटा माती टाकणे व पसरवण्यास मान्यता.

• स्वच्छता आणि प्रशासन: सामुदायिक व सार्वजनिक शौचालयांचे स्वच्छता, देखभाल आणि दुरुस्तीच्या खर्चास मान्यता. नवनियुक्त आरोग्य निरीक्षकांच्या प्रशिक्षणाचे बिल अदा करणे. घंटागाडी ठेकेदारांना विशेष बाब/बक्षीस देण्यासाठी मान्यता.

• इतर: दफनभूमीसाठी काळजीवाहक पुरविणे कामी मुदतवाढ देणे. महापालिका माध्यमिक विद्यालयात अत्याधुनिक सायन्स लॅब विकसित करण्यासाठी खर्चास मान्यता.

आयुक्त तथा प्रशासक श्रावण हर्डीकर यांनी अखेरीस शहरवासियांना सुरक्षित आणि पर्यावरणपूरक दिवाळीसाठी शुभेच्छा दिल्या.

© २०२५ मॅक्स मंथन डेली न्यूज. सर्व हक्क राखीव.