‘सण, संस्कृती आणि प्रबोधन’चा सुंदर संगम: पिंपळे निलख येथे ‘दिवाळी पहाट’ उत्साहात संपन्न!

आमदार शंकर जगताप आणि सचिन साठे यांनी सादर केलेल्या ‘तेरे जैसा यार कहा’ गाण्याला उत्स्फूर्त प्रतिसाद; नव कलाकारांना मिळाले व्यासपीठ

पिंपरी चिंचवड, प्रतिनिधी बालाजी नवले, दि. २१ ऑक्टोबर २०२५, मॅक्स मंथन डेली न्यूज::

सण, संस्कृती आणि समाज प्रबोधन व संघटन यांचा सुंदर संगम सचिन साठे सोशल फाउंडेशनच्या वतीने आयोजित दोन दिवसीय दिवाळी पहाट या कार्यक्रमात पहायला मिळाला आहे. या उपक्रमामुळे नव कलाकारांना व्यासपीठ मिळाले, नागरिकांमध्ये सांस्कृतिक चळवळ जागृत करून राष्ट्रीय एकात्मतेचा संदेश देण्यात आला.

आमदार शंकर जगताप यांनी आयोजक सचिन साठे आणि त्यांच्या फाउंडेशनच्या सर्व कार्यकर्ते व पदाधिकाऱ्यांचे याबद्दल अभिनंदन केले, तसेच सर्व नागरिकांना दिवाळीनिमित्त हार्दिक शुभेच्छा दिल्या.

मैत्री आणि संगीताचा अविस्मरणीय संगम

दिवाळी निमित्त पिंपळे निलख येथे सचिन साठे सोशल फाउंडेशनतर्फे दोन दिवसीय “शुभ दिवाळी पहाट – फराळ” हा कार्यक्रम मोठ्या उत्साहात संपन्न झाला. हा कार्यक्रम शनिवारी (१८ ऑक्टोबर) देवांग कोष्टी कार्यालय, शारदा कॉलनी येथे आणि रविवारी (१९ ऑक्टोबर) विशाल नगर, पिंपळे निलख येथे आयोजित करण्यात आला होता. यामध्ये संगीत, मैत्री आणि सणाचा उत्साह यांचा सुंदर संगम अनुभवायला मिळाला.

कार्यक्रमातील उत्साह शिगेला पोहोचला असताना आमदार शंकर जगताप आणि आयोजक सचिन साठे यांनी आपल्या महाविद्यालयीन काळातील जुन्या आठवणींना उजाळा देत “तेरे जैसा यार कहा, कहा ऐसा याराना, याद करेगी दुनिया, तेरा मेरा अफसाना” हे गाणे सादर केले. भाजप शहराध्यक्ष शत्रुघ्न काटे यांनी यावेळी त्यांचा उत्साह वाढवला. या अप्रतिम सादरीकरणाने आमदार शंकर जगताप आणि सचिन साठे या दोघांच्या मैत्रीतील आपुलकी, जिव्हाळा आणि वर्षानुवर्षांच्या नात्याचा स्नेह प्रकट झाला, ज्याला उपस्थित प्रेक्षकांनी उत्स्फूर्त दाद दिली.

“दिवाळीचा आनंद नागरिकांनी एकत्र येऊन साजरा करण्याची ही परंपरा अत्यंत सुंदर आहे. सचिन साठे आणि त्यांच्या फाउंडेशनचे मनःपूर्वक अभिनंदन.”

— शत्रुघ्न (बापू) काटे (भाजप शहराध्यक्ष)

स्वागत आणि प्रास्ताविक करताना आयोजक सचिन साठे म्हणाले की, “नकारात्मकतेवर मात करून सकारात्मकतेचा, प्रकाशाचा मार्ग दाखवणारा सण म्हणजे दिवाळी. ‘दिवाळी पहाट – फराळ’ या उपक्रमामुळे संगीत, संस्कृती आणि आपले स्नेहबंध आणखी दृढ करण्याचा क्षण आहे.”

• पहिला दिवस: स्वरधारा म्युझिकल ग्रुपने हिंदी आणि मराठी गीतांचा कार्यक्रम सादर केला.

• दुसरा दिवस: स्वरानंद म्युझिकल ग्रुपतर्फे स्थानिक कलाकारांनी सादरीकरण केले. यामध्ये डॉ. विजय पाटील, अश्विन भुते, सतीश इंगळे, पृथ्वीराज इंगळे, बबन ठोंबरे, किशोर देशमुख, विश्वास करंजे, सोमनाथ बरगुजे, स्मिता पाटील, मंगला जगताप, वैष्णवी शेवंते आणि गार्विका सोलंकी यांचा समावेश होता.

सकाळच्या उत्साहपूर्ण वातावरणात, विविध कलाकारांनी सादर केलेल्या उत्कृष्ट जुन्या, नव्या सुरेल संगीत रचनांमुळे ही ‘दिवाळी पहाट’ प्रेक्षकांसाठी अविस्मरणीय ठरली.

या कार्यक्रमाला भुलेश्वर नांदगुडे, नितीन इंगवले, दिलीप बालवडकर, विजय जगताप, अनंत कुंभार, अनिल संचेती, अरविंद रणदिवे, गणेश कस्पटे, जेष्ठ नागरिक पिंपरी चिंचवड महासंघाचे अध्यक्ष वृषालीताई मरळ, सुरेश साठे, आप्पा थोपटे आदींसह परिसरातील नागरिक, युवा, महिला आणि विविध संस्थांचे प्रतिनिधी मोठ्या संख्येने उपस्थित होते.

© २०२५ मॅक्स मंथन डेली न्यूज. सर्व हक्क राखीव.