सत्यनिष्ठेच्या संस्कृतीवर देशाचा विकास! अमरावतीत विभागीय आयुक्त डॉ. श्वेता सिंघल यांनी दिली भ्रष्टाचार निर्मूलनाची ‘प्रतिज्ञा’
‘सतर्कता जागरूकता सप्ताह’ सुरू; भ्रष्टाचाराविरुद्ध लढण्यासाठी अधिकारी-कर्मचारी कटीबद्ध, ‘लाच घेणार नाही आणि देणार नाही’ची शपथ
अमरावती, प्रतिनिधी अविनाश वानखेडे, दि. २८ ऑक्टोबर २०२५, मॅक्स मंथन डेली न्यूज:
केंद्रीय सतर्कता आयोगाच्या (Central Vigilance Commission) निर्देशानुसार संपूर्ण देशात २७ ऑक्टोबर ते २ नोव्हेंबर या कालावधीत भ्रष्टाचार निर्मूलन सप्ताह पाळण्यात येत आहे. याच निमित्ताने अमरावती विभागीय आयुक्त कार्यालयात आज, सोमवार (२७ ऑक्टोबर) विभागीय आयुक्त डॉ. श्वेता सिंघल यांनी उपस्थित सर्व अधिकारी आणि कर्मचाऱ्यांना भ्रष्टाचार निर्मूलनाची प्रतिज्ञा दिली.
यावर्षीचा सप्ताह ‘देशाचा विकास सत्यनिष्ठेच्या संस्कृतीवर अवलंबून असतो’ या बोधवाक्यावर आधारित आहे. भ्रष्टाचार हा देशाच्या आर्थिक, राजकीय आणि सामाजिक प्रगतीमधील प्रमुख अडथळा असून, तो दूर करण्यासाठी सरकार, नागरिक आणि खाजगी क्षेत्र या सर्व घटकांनी संघटितपणे काम करणे आवश्यक आहे.
या प्रतिज्ञेद्वारे विभागीय आयुक्तांनी उपस्थित सर्वांना मार्गदर्शन केले आणि सच्चेपणा व सचोटीच्या उच्चतम मानकांप्रती वचनबध्द राहण्याचे आवाहन केले. अधिकारी-कर्मचारी यांनी यावेळी अशी शपथ घेतली की:
- ‘जीवनाच्या सर्व क्षेत्रांत सच्चेपणा आणि कायद्याचे पालन करेन.’
- ‘लाच घेणार नाही आणि लाच देणार नाही.’
- ‘सर्व कामे प्रामाणिकपणाने आणि पारदर्शक पद्धतीने करेन.’
- ‘जनहितासाठी कार्य करेन’ आणि ‘व्यक्तिगत वागणुकीत सचोटी दाखवून उदाहरण घालून देईन.’
- ‘भ्रष्टाचाराच्या कोणत्याही घटनेची माहिती योग्य अभिकरणास देईन.’
या सप्ताहाचे उद्दिष्ट भ्रष्टाचाराविरुद्ध लढणाऱ्यांना एकत्र आणून जनप्रबोधन करणे आणि प्रशासनाच्या कारभारात नैतिकता व पारदर्शीपणा आणून अधिक संवेदनशीलतेने नागरिकांचे प्रश्न सोडविण्यासाठी कटीबध्द होणे आहे.
यावेळी अपर आयुक्त रामदास सिध्दभट्टी, सुरज वाघमारे, अजय लहाने, उपायुक्त संतोष कवडे, रविंद्र हजारे, सहाय्यक आयुक्त वैशाली पाथरे यांच्यासह अन्य अधिकारी आणि कर्मचारी मोठ्या संख्येने उपस्थित होते.
© २०२५ मॅक्स मंथन डेली न्यूज. सर्व हक्क राखीव.
