अनैतिक संबंधातून खून! सामाजिक कार्यकर्ते नकुल भोईर यांच्या हत्येमागे पत्नी आणि प्रियकराचे संगनमत

पत्नी चैताली भोईर आणि प्रियकर सिद्धार्थ पवार यांना १ नोव्हेंबरपर्यंत पोलीस कोठडी; पुरावा नष्ट करण्याचा प्रयत्न उघड

पिंपरी-चिंचवड, प्रतिनिधी शाम सोनवणे, दि. ३० ऑक्टोबर २०२५, मॅक्स मंथन डेली न्यूज::

चिंचवड येथील सामाजिक कार्यकर्ते नकुल आनंदा भोईर (वय ४०, रा. माणिक कॉलनी, चिंचवड) यांच्या खूनप्रकरणात रोज नवनवीन आणि धक्कादायक खुलासे होत आहेत. पोलीस तपासात, नकुल भोईर यांच्या पत्नीने प्रियकराशी संगनमत करून नकुलचा गळा आवळून खून केल्याचे निष्पन्न झाले आहे.

या प्रकरणी पोलिसांनी नकुलची पत्नी चैताली भोईर आणि तिचा प्रियकर सिद्धार्थ दीपक पवार (वय २१, रा. बालाजी अपार्टमेंट, लिंकरोड, चिंचवड) या दोघांनाही अटक केली असून, बुधवारी (दि. २९) त्यांना न्यायालयासमोर हजर केले असता न्यायालयाने दोघांनाही १ नोव्हेंबर २०२५ पर्यंत पोलीस कोठडी सुनावली आहे.

• २४ ऑक्टोबर २०२५ रोजी नकुल भोईर यांचा खून करण्यात आला. सुरुवातीला पत्नी चैताली हिने आपण एकटीनेच खून केल्याची माहिती पोलिसांना फोन करून दिली आणि पोलिसांची दिशाभूल करण्याचा प्रयत्न केला.
• अनैतिक संबंध: आरोपी चैताली आणि सिद्धार्थ पवार यांचे अनैतिक संबंध होते. नकुल भोईर हे त्यांच्या संबंधांच्या आड येत असल्याने दोघांनी मिळून नकुलचा काटा काढायचे ठरवले.
• कर्ज आणि भांडण: चैताली हिने अनेकांकडून कर्ज घेतल्याची माहिती नकुल यांना समजली होती. या कारणावरून चैताली आणि नकुल यांच्यात कडाक्याचे भांडण झाले आणि नकुलने पत्नीला मारहाण केली.
• राग अनावर: आपल्या प्रेयसीला मारहाण झाल्यामुळे सिद्धार्थचा राग अनावर झाला आणि दोघांनी संगनमताने ओढणीच्या सहाय्याने नकुलचा गळा दाबून खून केल्याचे उघड झाले.

पोलिसांना या प्रकरणात आणखी कोणीतरी सहभागी असावे अशी शंका आल्याने, त्यांनी चैतालीचा प्रियकर सिद्धार्थ पवार याला चौकशीसाठी ताब्यात घेतले.

• ज्या ओढणीने नकुल यांचा गळा आवळला ती ओढणी सिद्धार्थ जाळून टाकणार होता.
• चैतालीने पोलिसांना दुसरीच ओढणी दाखवून खऱ्या गुन्ह्याची ओढणी लपवून ठेवली. हीच खुनाची ओढणी जप्त करण्यासाठी चैताली हिला पोलीस कोठडी सुनावण्यात आली आहे.

नकुल भोईर हे चिंचवड परिसरातील सामाजिक कार्यकर्ते म्हणून परिचित होते. ते सामाजिक कार्यासोबतच विविध संघटनांमध्ये सक्रिय भूमिका बजावत होते. त्यांच्या निधनाने परिसरात आणि सामाजिक वर्तुळात खळबळ उडाली आहे. शेजाऱ्यांनी दिलेल्या माहितीनुसार, दाम्पत्यात वादविवाद होत असले तरी हा प्रकार इतक्या टोकाचा असेल याची कोणालाच कल्पना नव्हती.

© २०२५ मॅक्स मंथन डेली न्यूज. सर्व हक्क राखीव.