ऊर्जा क्रांती! पिंपरी-चिंचवड महापालिकेची सौर ऊर्जेतून तब्बल ₹५ कोटी ९१ लाखांची विक्रमी वीजबिल बचत

८६ शासकीय इमारतींवर सोलर रुफटॉप कार्यान्वित; अपारंपरिक ऊर्जेमुळे शहराच्या ‘नेट झिरो’ ध्येयाला गती

पिंपरी प्रतिनिधी शाम सोनवणे, दि. ३० ऑक्टोबर २०२५, मॅक्स मंथन डेली न्यूज:

पिंपरी-चिंचवड महापालिकेने (PCMC) हरित ऊर्जेच्या दिशेने टाकलेल्या महत्त्वपूर्ण पावलांमुळे महापालिकेच्या वीजबिलात मोठी बचत झाली आहे. महापालिकेच्या विविध इमारतींवर सौर ऊर्जा यंत्रणा (सोलर रुफटॉप) यशस्वीरित्या कार्यान्वित करण्यात आल्यामुळे सप्टेंबर २०२५ पर्यंत तब्बल ५ कोटी ९१ लाख ७६ हजार ११२ रुपयांची बचत झाली आहे. अपारंपरिक ऊर्जा स्त्रोतांचा प्रभावी वापर करून महापालिका ऊर्जा स्वावलंबनाचा नवा टप्पा गाठत आहे.

महापालिकेने पारंपरिक ऊर्जेवरील अवलंबित्व कमी करत स्वमालकीच्या ८६ विविध ठिकाणी सौर पॅनेल्स बसवले आहेत.

• सध्याची क्षमता: ३ मेगावॅट प्रतितास
• वीज निर्मिती: सप्टेंबर २०२५ अखेर ५९ लाख १७ हजार ११२ युनिट्स वीज निर्मिती करण्यात आली.
• झालेली बचत: वीजबिलामध्ये ₹५ कोटी ९१ लाख ७६ हजार ११२ रुपयांची मोठी बचत झाली आहे.

या ८६ ठिकाणांमध्ये महापालिकेची मुख्य प्रशासकीय इमारत, शाळा, स्मशानभूमी, जलतरण तलाव, नाट्यगृह, बॅडमिंटन हॉल आणि रुग्णालये यांचा समावेश आहे.

भविष्यातील ऊर्जेची गरज आणि शाश्वत विकासाचे उद्दिष्ट लक्षात घेऊन महापालिकेने या प्रकल्पाचा विस्तार करण्याचे नियोजन केले आहे:

• प्रगतीपथावर: सध्या १३ ठिकाणी ४५० किलोवॅट क्षमतेच्या सौर यंत्रणेचे काम प्रगतीपथावर आहे.
• नियोजित क्षमता: याशिवाय, महापालिकेच्या एकूण ५८ ठिकाणी ४ मेगावॅट क्षमतेची सौर प्रणाली उभारण्याचे महत्त्वाकांक्षी नियोजन करण्यात आले आहे.

या प्रकल्पामुळे पारंपरिक ऊर्जा स्त्रोतांवरील ताण कमी होऊन शहराच्या स्वच्छ आणि पर्यावरणपूरक वाटचालीस गती मिळणार आहे. 

अतिरिक्त आयुक्त प्रदीप जांभळे पाटील यांनी महापालिकेचा मानस व्यक्त केला:

“पिंपरी चिंचवड महापालिकेसाठी आवश्यक असणारी विजेची गरज वेस्ट टू एनर्जी (Waste to Energy) व सोलर एनर्जी यांसारख्या अपारंपरिक ऊर्जास्त्रोतांचा प्रभावीपणे वापर करून भागवली जात आहे. यातून आर्थिक बचतीसह आगामी काळात हे शहर ‘नेट झिरो’ बनवण्याचा महापालिकेचा मानस आहे.”

सह शहर अभियंता अनिल भालसाखळे यांनी या प्रयत्नांचे महत्त्व सांगितले:

“हरित ऊर्जेकडे वाटचाल ही केवळ विजेची बचत नसून, ती शहराच्या शाश्वत विकासाच्या दृष्टीने एक महत्त्वपूर्ण गुंतवणूक आहे. सौर ऊर्जेचा वापर वाढवून महापालिका पर्यावरण संवर्धन आणि आर्थिक बचत या उद्दिष्टांना साध्य करत असून, यापुढेही असे उपक्रम राबविण्यात येतील.”

© २०२५ मॅक्स मंथन डेली न्यूज. सर्व हक्क राखीव.