दर्यापूर नगरीत प्रथमच ‘प्रखर राष्ट्रवाद शंखनाद’! मा. श्री. पुष्पेंद्र कुलश्रेष्ठ यांचे जाहीर व्याख्यान

०६ नोव्हेंबर रोजी जिल्हा परिषद कन्या शाळा मैदानावर आयोजन; तरुणांमध्ये राष्ट्र, धर्म आणि संस्कृतीबद्दल जागृती निर्माण करण्याचा उद्देश

दर्यापूर प्रतिनिधी अमोल चव्हाण, दि. ३ नोव्हेंबर २०२५, मॅक्स मंथन डेली न्यूज:

दर्यापूर नगरीच्या वैचारिक आणि सामाजिक पटलावर एक महत्त्वपूर्ण राष्ट्रीय कार्यक्रम आयोजित करण्यात आला आहे. सकल हिंदू समाज, दर्यापूर यांच्या वतीने देशभरातील लाखो तरुणांचे प्रेरणास्रोत आणि प्रखर राष्ट्रचिंतक मा. श्री. पुष्पेंद्र कुलश्रेष्ठ यांच्या जाहीर व्याख्यानाचे आयोजन करण्यात आले आहे.

पुष्पेंद्र कुलश्रेष्ठ यांचे दर्यापूर नगरीत प्रथमच आगमन होत असल्याने शहरवासीयांमध्ये, विशेषतः युवा वर्गामध्ये, प्रचंड उत्साह दिसून येत आहे.

• व्याख्यानाचा विषय: ‘प्रखर राष्ट्रवाद शंखनाद’
• दिनांक व वेळ: येत्या ०६ नोव्हेंबर २०२५ रोजी सायंकाळी ६ वाजता.
• स्थळ: शिवाजी चौक जवळ, जिल्हा परिषद कन्या शाळा मैदान, दर्यापूर.

सकल हिंदू समाजाच्या पदाधिकाऱ्यांनी या ऐतिहासिक कार्यक्रमामागील भूमिका स्पष्ट केली आहे. सध्याच्या परिस्थितीत राष्ट्र, धर्म आणि संस्कृतीबाबत तरुणांमध्ये योग्य विचार आणि जागृती निर्माण करणे, तसेच राष्ट्रीय एकात्मतेची भावना अधिक दृढ करणे हा या व्याख्यानाचा मुख्य उद्देश आहे.

सकल हिंदू समाज, दर्यापूर यांच्या वतीने शहरातील सर्व राष्ट्रप्रेमी नागरिक, विविध सामाजिक व धार्मिक संघटनांचे पदाधिकारी आणि युवा वर्गाला या अभ्यासपूर्ण आणि ओजस्वी विचारांच्या कार्यक्रमाला मोठ्या संख्येने उपस्थित राहण्याचे विनम्र आवाहन करण्यात येत आहे.

© २०२५ मॅक्स मंथन डेली न्यूज. सर्व हक्क राखीव.