चिंचवडमध्ये भक्ती आणि कलेचा संगम! ४६४ वा मोरया गोसावी संजीवन समाधी सोहळा ६ ते १० डिसेंबर दरम्यान

‘इथेनॉल मॅन’ डॉ. प्रमोद चौधरी यांना जीवनगौरव पुरस्कार; प्रथमेश-मुग्धा, पं. भुवनेश्वर कोमकली, संकर्षण-स्पृहा आणि योगेश सोमण यंदाचे खास आकर्षण

पिंपरी प्रतिनिधी शाम सोनवणे, दि. ३ डिसेंबर २०२५, मॅक्स मंथन डेली न्यूज: 

श्रीमंत महासाधू श्री मोरया गोसावी महाराजांचा ४६४ वा संजीवन समाधी सोहळा यंदा चिंचवड येथे ६ ते १० डिसेंबर २०२५ या कालावधीत संजीवन समाधी मंदिर आणि श्री मंगलमूर्ती वाडा येथे मोठ्या उत्साहात आयोजित करण्यात आला आहे. या पंचदिवसीय सोहळ्यात धार्मिक विधींसह संगीत, कला आणि समाजोपयोगी उपक्रमांची भव्य पर्वणी मोरया भक्तांना अनुभवता येणार आहे.

यंदाच्या सोहळ्याचे प्रमुख आकर्षण प्राज इंडस्ट्रीजचे संस्थापक व ‘इथेनॉल मॅन’ म्हणून ओळखले जाणारे डॉ. प्रमोद चौधरी यांना ‘श्री मोरया गोसावी महाराज जीवनगौरव पुरस्कार’ प्रदान करण्यात येणार आहे. मंगळवार, ९ डिसेंबर रोजी ज्येष्ठ उद्योजक अभय फिरोदिया यांच्या हस्ते सायंकाळी त्यांना हा पुरस्कार दिला जाईल.

सोहळ्याचे उद्घाटन शनिवार, ६ डिसेंबर रोजी सायंकाळी ५.३० वाजता होणार आहे.

• प्रमुख पाहुणे: मत्स्य व्यवसाय व बंदरे मंत्री तथा सिंधुदुर्गचे पालकमंत्री नितेश राणे, पिंपरी-चिंचवड महानगरपालिकेचे आयुक्त व प्रशासक श्रावण हर्डीकर आणि सहधर्मादाय आयुक्त रजनी क्षीरसागर.

• उपस्थित मान्यवर: खासदार श्रीरंग आप्पा बारणे, खासदार डॉ. अमोल कोल्हे, विधानसभेचे उपाध्यक्ष अण्णा बनसोडे, आमदार शंकर जगताप, आमदार महेशदादा लांडगे, उमाताई खापरे, अमित गोरखे आणि बापूसाहेब पठारे.

• संत संस्थानांचे प्रतिनिधी: संत ज्ञानेश्वर महाराज संस्थान (आळंदी) चे प्रमुख विश्वस्त योगी निरंजननाथ आणि जगद्गुरु श्री संत तुकाराम महाराज संस्थान (देहू) चे मुख्य विश्वस्त जालिंदर महाराज मोरे.

यावेळी मुख्य विश्वस्त मंदार देव महाराज यांनी पत्रकार परिषदेत माहिती दिली. विश्वस्त जितेंद्र देव, केशव विद्वांस आणि ॲड. देवराज डहाळे तसेच माजी महापौर अपर्णा डोके, माजी नगरसेवक सुरेश भोईर, मोरेश्वर शेडगे, अश्विनी चिंचवडे आदी उपस्थित होते.

पाच दिवस चालणाऱ्या या सोहळ्यात दररोज सकाळी ६.०० वाजता सनई चौघडा वादन आणि सकाळी ८.३० वाजता श्री मोरया गोसावी महाराज ओवीबद्ध चरित्र पठण होणार आहे.

• सांस्कृतिक सत्र आकर्षण:

  • गायन: प्रथमेश लघाटे आणि मुग्धा वैशंपायन यांचा ‘मर्मबंधनातली ठेव’ कार्यक्रम.

  • शास्त्रीय संगीत: योगिता गोडबोले आणि संदीप उबाळे यांचे सुगम संगीत, तसेच पं. भुवनेशकुमार कोमकल्ली यांचे उपशास्त्रीय गायन.

  • नाट्य/साहित्य: संकर्षण आणि स्पृहा यांचे विशेष सादरीकरण, तसेच योगेश सोमण यांचा बहुप्रतीक्षित ‘आनंदडोह’ कार्यक्रम.

  • व्याख्यान: सोमवार, ८ डिसेंबर रोजी ज्येष्ठ पत्रकार डॉ. उदय निरगुडकर यांचे ‘सध्याचा सामर्थ्यशाली भारत’ या विषयावर व्याख्यान आयोजित करण्यात आले आहे.

• प्रमुख धार्मिक विधी (रविवार, ७ डिसेंबर): सामुदायिक अथर्वशीर्ष पठण (स. ७ वा.), सामुदायिक महाभिषेक (स. ९ ते ११ वा.) आणि वैदिक पद्धतीने संपन्न होणारे मन्युसुक्त हवन.

• नवीन उपक्रम: दर संकष्टी चतुर्थीला पवनामाईची आरती सुरू करण्यात येणार असून, पर्यावरण आणि नदी विषयी जनजागृती करणे हा यामागील उद्देश आहे.

• शिबिरे (७ आणि ८ डिसेंबर): आरोग्य, दंत व नेत्र तपासणी शिबिरे, तसेच रक्तदान शिबिरांचे आयोजन.

• योग वर्ग (९ डिसेंबर): सकाळी ‘सोहम योग साधना मंडळा’तर्फे योग वर्ग आयोजित करण्यात आला आहे.

• सांगता (बुधवार, १० डिसेंबर): पहाटे ४.३० वाजता संजीवन समाधीची महापूजा, सकाळी ७ वाजता पुष्पवृष्टी, नगारखाना आणि केरळी वाद्य पथकासह नगरप्रदक्षिणा. ह.भ.प. प्रमोद महाराज जगताप (बारामती) यांचे संजीवन समाधी सोहळ्याचे कीर्तन, महाप्रसाद (दुपारी १२ वा.) आणि रात्री ८ वाजता भव्य आतषबाजी सह सोहळ्याची सांगता होईल.

मुख्य विश्वस्त श्री मंदार जगन्नाथ देव महाराज, तसेच विश्वस्त जितेंद्र देव, केशव विद्वांस, ॲड. राजेंद्र उमाप आणि ॲड. देवराज डहाळे यांनी सर्व भक्तांना या सोहळ्यास सहकार्य करून सेवा रुजू करण्याचे आवाहन केले आहे.

© २०२५ मॅक्स मंथन डेली न्यूज. सर्व हक्क राखीव.