गुंडा विरोधी पथकाची धडक कारवाई: कोयत्याने हल्ला करून लुटमार करणाऱ्या चौघांना अटक

मालमत्ता चोरीची टिप देणाऱ्या कामगारासह आरोपी गजाआड; चिंचवडमधील ‘श्रीजी सिरामिक’ दुकानाच्या घटनेत ३ लाख ८० हजार रुपयांचा मुद्देमाल हस्तगत

पिंपरी चिंचवड प्रतिनिधी बालाजी नवले, दि. ३ डिसेंबर २०२५, मॅक्स मंथन डेली न्यूज:

पिंपरी-चिंचवड गुन्हे शाखेच्या गुंडा विरोधी पथकाने अत्यंत जलद आणि उल्लेखनीय कामगिरी करत, कोयत्याने हल्ला करून ३ लाख ८० हजार रुपये लुटणाऱ्या चार आरोपींना अटक केली आहे. या आरोपींमध्ये लुटमारीची नेमकी टिप देणाऱ्या एका कामगाराचाही समावेश असल्याची माहिती समोर आली आहे.

दिनांक ०२/१२/२०२५ रोजी रात्री ९:५० वाजता चिंचवड येथील केशवनगर भागातील दीपक नरसाना यांच्या ‘श्रीजी सिरामिक’ दुकानात ही घटना घडली. आशिष अरजनमा बुवा हे थांबलेले असताना, अनोळखी चार इसमांनी त्यांच्यावर धारदार हत्याराने वार करून त्यांना जखमी केले.

• गुन्ह्याचे स्वरूप: आरोपींनी फिर्यादीकडील एकुण ३,८०,०००/- रुपये असलेली बॅग जबरदस्तीने हिसकावून चोरी केली. यावेळी आरोपींनी त्यांच्या हातातील धारदार हत्याराने परिसरात दहशत माजवली आणि उपस्थित लोकांना धमकावत तेथून पळून गेले.

• दाखल गुन्हा: या प्रकरणी चिंचवड पोलीस ठाण्यात गु.र.नं. ५१६/२०२५ भारतीय न्याय संहिता कलम ३०९(६), ३११, ३(५), भारतीय शस्त्र अधिनियम कलम ४, २७, क्रिमिनल अमेंडमेंट ॲक्ट ३, ७ सह महाराष्ट्र पोलीस अधिनियम कलम ३७(१) (३) सह १३५ प्रमाणे गुन्हा दाखल आहे.

घटनेची माहिती मिळताच मा. पोलीस आयुक्त श्री. विनयकुमार चौबे साहेब आणि मा. सह पोलीस आयुक्त श्री. शशिकांत महावरकर साहेब यांनी तात्काळ गुन्हा उघडकीस आणण्याचे आदेश दिले. मा. अपर पोलीस आयुक्त श्री. एस.डी. आवाड साहेब आणि मा. पोलीस उप आयुक्त (गुन्हे) डॉ. शिवाजी पवार साहेब यांनी घटनास्थळी भेट देऊन तपासकामी वेगवेगळ्या टीम बनवून मार्गदर्शन केले.

त्यानुसार, सपोनि एच. व्ही. माने, पोउपनि समीर लोंढे आणि गुंडा विरोधी पथकातील अंमलदार यांनी तांत्रिक तपास (CCTV फुटेज) आणि बातमीदारांमार्फत तपास सुरू केला.

पथकाने स्मशानभूमी जवळ, थेरगाव गावठाण येथून खालील आरोपींना व विधी संघर्षित बालकाला ताब्यात घेतले:

१. यश रमेश अंधारे (वय १८ वर्षे, रा. थेरगाव, मूळ रा. भोनजे, ता. बार्शी, जि. सोलापूर)

२. रितेश मुकेश चव्हाण (वय १८ वर्षे, रा. जगताप नगर नं. ४ व ५, थेरगाव, पुणे)

३. रूपेंद्र रूपबसंत बैद (वय १९ वर्षे, रा. सुभाष नगर झोपडपट्टी, रिव्हर रोड, आंबेडकर कॉलनी, पिंपरी, पुणे)

४. एक विधी संघर्षित बालक (टिप देणारा कामगार)

चौकशीत या आरोपींनी गुन्ह्यात सहभागी असल्याची कबुली दिली आहे. या आरोपींना पुढील कार्यवाहीसाठी चिंचवड पोलीस ठाण्याच्या ताब्यात देण्यात आले आहे.

© २०२५ मॅक्स मंथन डेली न्यूज. सर्व हक्क राखीव.