जुनी सांगवीतील ‘कचरा संवेदनशील’ जागेचे आकर्षक सौंदर्यीकरण; महापालिकेच्या उपक्रमामुळे परिसराचा चेहरामोहरा बदलला

कै. शकुंतलाबाई शितोळे शाळेसमोरचा परिसर झाला स्वच्छ आणि सुंदर; आरोग्य विभागाकडून जनजागृतीचे आवाहन

पिंपरी प्रतिनिधी शाम सोनवणे, दि.१० डिसेंबर २०२५, मॅक्स मंथन डेली न्यूज: 

पिंपरी-चिंचवड महानगरपालिकेच्या आरोग्य विभागातर्फे शहरात स्वच्छतेसोबतच सौंदर्यीकरणाचे अभिनव उपक्रम राबविले जात आहेत. याचाच एक भाग म्हणून, ‘ह’ क्षेत्रीय कार्यालयाच्या अंतर्गत प्रभाग क्रमांक ३२ मधील जुनी सांगवी परिसरात असलेल्या कै. सौ. शकुंतलाबाई आनंदराव शितोळे प्राथमिक शाळेसमोरील कचरा संवेदनशील जागेचे निर्मूलन करून, त्या ठिकाणी आकर्षक पद्धतीने सौंदर्यीकरण करण्यात आले आहे.

महापालिका आयुक्त श्रावण हर्डीकर, अतिरिक्त आयुक्त विजयकुमार खोराटे यांच्या मार्गदर्शनाखाली आणि उपायुक्त डॉ. प्रदीप ठेंगल, सहाय्यक आयुक्त अमित पंडित यांच्या अधिपत्याखाली हा उपक्रम यशस्वी करण्यात आला.

या उपक्रमामुळे शाळेसमोरील रस्त्याच्या कडेला असणारे पूर्वीचे कचरा संवेदनशील स्वरूप आता पूर्णपणे बदलले आहे. येथील जागा स्वच्छ, सुंदर आणि उपयोगी बनवण्यात आली आहे.

• हा उपक्रम परिसरातील पर्यावरण सुधारण्यात सकारात्मक ठरत आहे.

• नागरिकांना आणि विद्यार्थ्यांना स्वच्छतेचे महत्त्व पटवून देणारा हा महत्त्वपूर्ण उपक्रम आहे.

हा उपक्रम यशस्वी करण्यासाठी ‘ह’ क्षेत्रीय कार्यालयाचे सहायक आरोग्य अधिकारी अंकुश झिटे, मुख्य आरोग्य निरीक्षक उद्धव डवरी, आरोग्य निरीक्षक संदीप राठोड तसेच संबंधित अधिकारी व कर्मचाऱ्यांनी परिश्रम घेतले.

महापालिकेकडून शहरातील कचरा संवेदनशील ठिकाणांचे निर्मूलन, सौंदर्यीकरण आणि स्वच्छतेबाबत जनजागृती करण्याचे उपक्रम सातत्याने राबवले जात आहेत. या उपक्रमांमध्ये नागरिकांनी देखील सहभागी होऊन सहकार्य करावे, असे आवाहन आरोग्य विभागाच्या वतीने करण्यात आले आहे.

© २०२५ मॅक्स मंथन डेली न्यूज. सर्व हक्क राखीव.