महापालिका निवडणुकीचे बिगुल! ॲड. बाळासाहेब तथा प्रकाश आंबेडकर १२ डिसेंबरला पिंपरी-चिंचवडमध्ये; ‘एक संधी वंचितला’ सभेचे आयोजन

सूर्यपुत्र भैय्यासाहेब आंबेडकर जयंतीनिमित्त भव्य निर्धार सभा; पाणी, वाहतूक कोंडी आणि कामगारांच्या प्रश्नांवर पक्षाची भूमिका होणार स्पष्ट

पिंपरी चिंचवड प्रतिनिधी बालाजी नवले, दि.११ डिसेंबर २०२५, मॅक्स मंथन डेली न्यूज:

पिंपरी-चिंचवड महानगरपालिकेच्या आगामी निवडणुकीच्या पार्श्वभूमीवर वंचित बहुजन आघाडीतर्फे ‘एक संधी वंचितला’ ही भव्य निर्धार सभा शहरात आयोजित करण्यात आली आहे. या सभेला वंचितचे सर्वेसर्वा ॲड. बाळासाहेब तथा प्रकाश आंबेडकर हे उपस्थित राहणार असून, सभेमुळे शहरातील राजकीय वातावरण तापणार आहे. ही सभा शुक्रवार, दिनांक १२ डिसेंबर २०२५ रोजी पिंपरी येथील डॉ. बाबासाहेब आंबेडकर पुतळ्याच्या (भीमसृष्टी) मागील मैदानात होणार आहे.

या सभेमधून वंचित बहुजन आघाडी निवडणुकीचे बिगुल फुंकणार असल्याचे स्पष्ट संकेत शहराध्यक्ष नितीन गवळी यांनी दिले. बुधवारी (दि. १०) पिंपरीतील हॉटेल नमस्कार येथे आयोजित पत्रकार परिषदेत ते बोलत होते.

नितीन गवळी यांनी पत्रकार परिषदेत माहिती दिली की, सूर्यपुत्र भैय्यासाहेब आंबेडकर यांच्या ११३ व्या जयंतीनिमित्त ही शक्तिप्रदर्शन सभा आयोजित केली आहे. सभेच्या सुरुवातीला भैय्यासाहेब आंबेडकर यांना अभिवादन करण्यात येईल.

• रणनीती: महापालिका निवडणुकीस काहीच महिने बाकी असताना, वंचित बहुजन आघाडी ‘एक संधी वंचितला’ या सभेतून पक्ष शहरातील निवडणूक रणनीतीचा पहिला इशारा देणार आहे.

• प्रकाश आंबेडकरांचे मार्गदर्शन: प्रमुख मार्गदर्शक ॲड. बाळासाहेब तथा प्रकाश आंबेडकर हे कार्यकर्त्यांना दिशा देणार असून, त्यांच्या भाषणातून आगामी निवडणुकीवर मोठी घोषणा अपेक्षित आहे.

• प्रमुख मुद्दे: शहरातील वाढती वाहतूक कोंडी, पाणी समस्या, अनियंत्रित विकास, कामगारांचे प्रलंबित प्रश्न, तसेच विस्थापितांच्या मागण्या या सर्व मुद्द्यांवर वंचित बहुजन आघाडीची ठोस भूमिका या सभेतून जाहीर होईल.

या सभेमध्ये नेत्या अंजलीताई आंबेडकर, प्रदेश उपाध्यक्ष डॉ. अनिल अण्णा जाधव, ॲड सर्वजीत बनसोडे प्रमुख उपस्थित राहणार आहेत. या कार्यक्रमाचे अध्यक्षस्थान शहराध्यक्ष नितीन गवळी भूषवणार आहेत.

पत्रकार परिषदेला राज्य उपाध्यक्ष अनिल जाधव, सर्वजीत बनसोडे, शहर कार्याध्यक्ष राजेंद्र साळवे, शहर उपाध्यक्ष संतोष जोगदंड, महिला शहराध्यक्षा शारदा बनसोडे, युवक शहराध्यक्ष विनोद गायकवाड, महासचिव जितेंद्र मोटे, सचिन ओव्हाळ, सुजाता निकाळजे, मंदाकिनी गायकवाड, सुनील जावळे इत्यादी पदाधिकारी उपस्थित होते.

वंचित बहुजन आघाडी, युवा आघाडी, महिला आघाडी, माथाडी ट्रान्सपोर्ट व जनरल कामगार युनियन, सम्यक विद्यार्थी आंदोलन, भारतीय बौद्ध महासभा व समता सैनिक दल पिंपरी-चिंचवड शहर (जिल्हा) यांच्या वतीने या सभेचे आयोजन करण्यात आले आहे.

वंचित बहुजन आघाडीचे राज्य उपाध्यक्ष अनिल जाधव यांनी विश्वास व्यक्त केला की, पिंपरी-चिंचवड महानगरपालिकेच्या निवडणुकीत वंचित समाजाच्या हक्कांसाठी आता निर्णायक लढा उभारला जाणार आहे. ‘एक संधी वंचितला’ या सभेतून पक्ष आपली दिशा, ध्येय आणि ठोस भूमिका जनतेसमोर मांडणार आहे. प्रकाश आंबेडकरांचे भाषण नागरिकांना नव्या राजकीय पर्यायाची हमी देईल.

© २०२५ मॅक्स मंथन डेली न्यूज. सर्व हक्क राखीव.