मतदान हा केवळ हक्कच नव्हे, तर लोकशाहीप्रती आपले कर्तव्य; आयुक्त श्रावण हर्डीकर यांनी केले मतदानाचे आवाहन

महापालिकेच्या ‘मतदान जनजागृती’ चित्रफितीचे अनावरण; डिजिटल माध्यमांतून मतदारांपर्यंत पोहोचणार लोकशाहीचा संदेश

पिंपरी चिंचवड प्रतिनिधी बालाजी नवले दिनांक २८ डिसेंबर २०२५ मॅक्स मंथन डेली न्यूज :

पिंपरी (दि. २८ डिसेंबर २०२५): “लोकशाहीची खरी ताकद ही नागरिकांच्या सक्रिय सहभागावर अवलंबून असते. मतदान हा केवळ हक्क नसून ते लोकशाहीप्रती आपले कर्तव्य आहे. प्रत्येक मत महत्त्वाचे असून त्यातून शहराच्या भवितव्याची दिशा ठरते. त्यामुळे आगामी निवडणुकीत कोणताही नागरिक मतदानापासून वंचित राहू नये,” असे प्रतिपादन आयुक्त तथा निवडणूक अधिकारी श्रावण हर्डीकर यांनी केले.

पिंपरी-चिंचवड महानगरपालिका सार्वत्रिक निवडणुकीच्या पार्श्वभूमीवर, राज्य निवडणूक आयोग व महापालिकेच्या वतीने राबविण्यात येणाऱ्या ‘स्वीप’ (SVEEP) कार्यक्रमांतर्गत तयार करण्यात आलेल्या विशेष मतदान जनजागृती चित्रफितीचे (Video) अनावरण हर्डीकर यांच्या हस्ते करण्यात आले.

पिंपरी येथील मुख्य प्रशासकीय इमारतीतील दिवंगत माजी महापौर मधुकर पवळे सभागृहात हा कार्यक्रम पार पडला. यावेळी आयुक्तांनी डिजिटल माध्यमांच्या प्रभावी वापराबाबत मार्गदर्शन केले.

• नावीन्यपूर्ण उपक्रम: युवक, महिला, ज्येष्ठ नागरिक आणि प्रथमच मतदान करणाऱ्या मतदारांना मतदानाचे महत्त्व पटवून देण्यासाठी ही चित्रफित भावनिक आणि प्रभावी माध्यम ठरेल.

• व्यापक प्रसिद्धी: महापालिकेचा भर सोशल मीडिया आणि डिजिटल प्लॅटफॉर्मवर असून, याद्वारे शहरातील प्रत्येक पात्र नागरिकापर्यंत मतदानाचा संदेश पोहोचविला जाईल.

• सकारात्मक दृष्टिकोन: चित्रफितीच्या माध्यमातून मतदारांमध्ये मतदानाबाबत सकारात्मकता निर्माण होऊन मतदानाची टक्केवारी वाढेल, असा विश्वास आयुक्तांनी व्यक्त केला.

या कार्यक्रमावेळी प्रशासनातील अनेक वरिष्ठ अधिकारी उपस्थित होते:

• विजयकुमार खोराटे (अतिरिक्त आयुक्त)

• सचिन पवार (उपायुक्त, निवडणूक विभाग)

• अण्णा बोदडे (उपायुक्त)

• किरणकुमार मोरे (सहाय्यक आयुक्त)

• विजय बोरुडे (मुख्य माहिती तंत्रज्ञान अधिकारी)

• किरण गायकवाड (विशेष अधिकारी)

• प्रफुल्ल पुराणिक (जनता संपर्क अधिकारी)

या जनजागृती मोहिमेअंतर्गत महापालिका केवळ पारंपरिक पद्धतीवर अवलंबून न राहता आधुनिक तंत्रज्ञानाचा वापर करून लोकशाहीचा जागर करत आहे. शहरातील गृहनिर्माण सोसायट्या, सार्वजनिक ठिकाणे आणि डिजिटल स्क्रीनवर ही चित्रफित प्रदर्शित केली जाणार आहे.

© २०२५ मॅक्स मंथन डेली न्यूज. सर्व हक्क राखीव.