प्रभाग २८ मध्ये विकासकामांसाठी नगरसेवक ‘ॲक्शन मोड’वर; बापू काटेंनी पालिका अधिकाऱ्यांना धरले धारेवर

पिंपरी प्रतिनिधी आकाश कांबळे, ३ फेब्रुवारी २०२६ | मॅक्स मंथन डेली न्यूज:

पिंपरी-चिंचवड : निवडणुकीत नागरिकांना दिलेल्या शब्दाची पूर्तता करण्यासाठी प्रभाग क्रमांक २८ (पिंपळे सौदागर-रहाटणी) चे लोकप्रतिनिधी आक्रमक झाले आहेत. विकासकामांमध्ये होणारी दिरंगाई खपवून घेतली जाणार नाही, असा कडक इशारा देत नगरसेवक श्री. शत्रुघ्न (बापू) काटे, नगरसेविका सौ. अनिताताई काटे आणि नगरसेविका सौ. कुंदाताई भिसे यांनी पालिका यंत्रणेला थेट धारेवर धरले.

प्रभागातील रखडलेल्या विकासकामांना गती देण्यासाठी तिन्ही नगरसेवकांनी महापालिका अधिकाऱ्यांसोबत मॅरेथॉन आढावा बैठक घेतली. केवळ चर्चाच नाही, तर कामांच्या ठिकाणी प्रत्यक्ष जाऊन पाहणी करत कामाचा दर्जा आणि प्रगतीचा अहवाल मागवला. यावेळी कामातील विलंब आणि गुणवत्तेबाबत काही त्रुटी आढळल्याने नगरसेवक शत्रुघ्न काटे यांनी संबंधित विभागाच्या अधिकाऱ्यांना स्पष्ट शब्दांत सुनावले.

बैठकीत नागरिकांच्या दैनंदिन गरजांशी संबंधित असलेल्या खालील विषयांचा सविस्तर आढावा घेण्यात आला:

• पाणीपुरवठा व ड्रेनेज: अपूर्ण असलेल्या ड्रेनेज लाईन आणि पाणीपुरवठ्यातील अडचणी तातडीने दूर करणे.

• विद्युत व पथदिवे: प्रभागातील स्ट्रीट लाईट्सची देखभाल आणि नवीन दिवे बसवणे.

• आरोग्य व उद्याने: सार्वजनिक आरोग्याशी संबंधित कामे आणि उद्यानांची नियमित देखभाल-दुरुस्ती.

• रस्ते दुरुस्ती: प्रलंबित रस्त्यांची कामे कालमर्यादेत पूर्ण करण्याचे निर्देश.

“नागरिकांना दिलेली आश्वासने वेळेत पूर्ण करणे ही आमची जबाबदारी आहे. विकासकामांत कंत्राटदार किंवा अधिकाऱ्यांकडून होणारी कोणतीही दिरंगाई खपवून घेतली जाणार नाही,” असा ठाम संदेश या बैठकीतून देण्यात आला. प्रलंबित कामांमुळे नागरिकांना होणारा त्रास तातडीने थांबवण्याचे आदेश यावेळी देण्यात आले.

या पाहणी दौऱ्यास पालिकेचे संबंधित विभागांचे अधिकारी आणि कंत्राटदार उपस्थित होते. लोकप्रतिनिधींच्या या आक्रमक पवित्र्यामुळे प्रशासकीय यंत्रणेची चांगलीच धावपळ उडाली असून, प्रलंबित कामांना आता वेग मिळण्याची शक्यता आहे.

© २०२६ मॅक्स मंथन डेली न्यूज. सर्व हक्क राखीव.