महापुरुषांच्या स्मारकांकडे दुर्लक्ष नको! नियमित साफसफाई अन् डागडुजी करा; विशाल जाधव यांची महापौरांकडे आग्रही मागणी

पिंपरी प्रतिनिधी शाम सोनवणे, ९ फेब्रुवारी २०२६ | मॅक्स मंथन डेली न्यूज:

पिंपरी-चिंचवड : पिंपरी-चिंचवड शहराच्या विविध भागांत उभारण्यात आलेली महापुरुषांची स्मारके ही केवळ स्मारके नसून ती नागरिकांसाठी प्रेरणास्थाने आहेत. मात्र, सध्या शहरातील अनेक पुतळ्यांची दुरवस्था झाली असून, त्यांची तातडीने शास्त्रोक्त पद्धतीने साफसफाई आणि डागडुजी करण्यात यावी, अशी मागणी राष्ट्रीय काँग्रेस पक्षाचे नेते विशाल अनंतराव जाधव यांनी केली आहे. यासंदर्भात त्यांनी आज पिंपरी-चिंचवड महानगरपालिकेचे नवनिर्वाचित महापौर रवी लांडगे यांची भेट घेऊन त्यांना लेखी निवेदन दिले.

शहरात छत्रपती शिवाजी महाराज, डॉ. बाबासाहेब आंबेडकर, महात्मा जोतिराव फुले, क्रांतीज्योती सावित्रीबाई फुले यांसह अनेक महापुरुषांचे भव्य पुतळे आहेत. “गेल्या काही दिवसांपासून या स्मारकांकडे प्रशासनाचे दुर्लक्ष होत आहे. अनेक ठिकाणी पुतळ्यांवर धूळ साचली असून पक्ष्यांच्या विष्ठेमुळे विद्रुपीकरण झाले आहे. तसेच चबुतऱ्यांचीही पडझड झाली आहे,” असे विशाल जाधव यांनी निवेदनात नमूद केले आहे.

यावेळी बोलताना विशाल जाधव म्हणाले की, “महापुरुषांच्या जयंती किंवा ठराविक दिवसांपुरतीच साफसफाई मर्यादित न ठेवता, ती नियमितपणे होणे आवश्यक आहे. देखभालीअभावी स्मारकांची अशी स्थिती होणे हे शहराच्या वैभवाला साजेसे नाही. प्रशासनाने कायमस्वरूपी देखभाल वेळापत्रक (Maintenance Schedule) निश्चित करून त्याची अंमलबजावणी करावी.”

• शहरातील सर्व महापुरुषांच्या पुतळ्यांची तातडीने शास्त्रोक्त पद्धतीने साफसफाई व्हावी.

  

• पुतळे आणि चबुतऱ्यांची आवश्यक तिथे रंगरंगोटी व डागडुजी करण्यात यावी.

• स्मारकांच्या परिसरातील बंद असलेले विद्युत दिवे (Focus Lights) त्वरित दुरुस्त करावेत.

• उद्यान आणि स्थापत्य विभागाने समन्वयाने देखभालीचे कायमस्वरूपी नियोजन करावे.

यावेळी पत्रकार शहनाज कुरणे व इतर मान्यवर उपस्थित होते. महापौरांनी या विषयाचे गांभीर्य लक्षात घेऊन संबंधित विभागांना तातडीने कार्यवाही करण्याचे आदेश दिले आहेत. आता महापालिका प्रशासन या प्रेरणास्थानांच्या वैभवासाठी काय पावले उचलणार, याकडे शहरवासीयांचे लक्ष लागले आहे.

© २०२६ मॅक्स मंथन डेली न्यूज. सर्व हक्क राखीव.