गोंड, वारली आणि मधुबनी कलेचा अप्रतिम संगम! मनपा शाळेतील ‘आर्ट मेळा’ ठरला आकर्षणाचा केंद्रबिंदू; विद्यार्थ्यांनी साकारले ३डी मॉडेल्स

पिंपरी चिंचवड प्रतिनिधी बालाजी नवले, ९ फेब्रुवारी २०२६ | मॅक्स मंथन डेली न्यूज:

पिंपरी : पिंपरी चिंचवड महानगरपालिकेच्या शिक्षण विभागांतर्गत श्रीमती अनुसयाबाई नामदेव वाघेरे इंग्लिश मीडियम स्कूल, पिंपरी येथे विद्यार्थ्यांच्या कलागुणांना वाव देणाऱ्या एका भव्य ‘आर्ट मेळा’चे आयोजन करण्यात आले होते. भारतीय लोककला आणि पारंपरिक संस्कृतीचा वारसा जपत विद्यार्थ्यांनी साकारलेल्या कलाकृतींनी उपस्थितांची मने जिंकली.

या मेळाव्याचे उद्घाटन महापालिका अतिरिक्त आयुक्त विक्रांत बगाडे यांच्या प्रमुख उपस्थितीत झाले. यावेळी सुमारे ३० शाळांमधील विद्यार्थ्यांनी सहभाग नोंदवला होता. विद्यार्थ्यांनी केवळ चित्र रेखाटली नाहीत, तर वारली कलेतून ‘शनिवार वाडा’, गोंड आर्टद्वारे ‘गेट वे ऑफ इंडिया’ आणि प्रसिद्ध चित्रकार एस. एच. रझा यांच्या शैलीतील ‘गाव’ अशी विविध ३डी (3D) मॉडेल्स साकारली होती.

या आर्ट मेळ्याचे मुख्य वैशिष्ट्य म्हणजे देशातील विविध राज्यांतील पारंपरिक कलाकारांचा सहभाग. या कलाकारांनी विद्यार्थ्यांना खालील कलांचे प्रत्यक्ष प्रशिक्षण दिले:

• थंगका आर्ट व ऍप्लिक वर्क

  

• गोंड चित्रकला आणि लेदर क्राफ्ट

  या कार्यशाळांमुळे विद्यार्थ्यांना लोककलेचे तंत्र, इतिहास आणि त्याचे सांस्कृतिक महत्त्व थेट तज्ज्ञांकडून जाणून घेण्याची संधी मिळाली.

या उपक्रमाचे आयोजन महापौर रवि लांडगे, उपमहापौर शर्मिला बाबर, आयुक्त श्रावण हार्डिकर, अतिरिक्त आयुक्त विक्रांत बगाडे आणि उपायुक्त ममता शिंदे यांच्या मार्गदर्शनाखाली करण्यात आले होते. ‘आकांक्षा फाउंडेशन’ने याकामी विशेष सहकार्य केले, तर प्रशासन अधिकारी संगिता बांगर व कला नोडल अधिकारी श्रीकांत चौगुले यांनी संयोजनाची जबाबदारी पेलली.

“महापालिकेच्या शाळांमधील विद्यार्थी पारंपरिक व लोककलेच्या माध्यमातून आपली सर्जनशीलता सादर करत आहेत, ही अभिमानाची बाब आहे. अशा उपक्रमांमुळे विद्यार्थ्यांना आपल्या सांस्कृतिक वारशाची ओळख निर्माण होते.”

– रवि लांडगे, महापौर, पिंपरी चिंचवड महापालिका

“आर्ट मेळ्यामुळे विद्यार्थ्यांना प्रत्यक्ष अनुभवातून शिकण्याची संधी मिळाली. यातून संवाद कौशल्य, आत्मविश्वास आणि संघ भावना विकसित होत आहे.”

– विक्रांत बगाडे, अतिरिक्त आयुक्त, पिंपरी चिंचवड महापालिका

© २०२६ मॅक्स मंथन डेली न्यूज. सर्व हक्क राखीव.