महापौरांचा स्तुत्य उपक्रम! “हार-पुष्पगुच्छ नको, शैक्षणिक साहित्य द्या”; विद्यार्थ्यांच्या भविष्यासाठी रवी लांडगे यांचे नागरिकांना कळकळीचे आवाहन

पिंपरी प्रतिनिधी आकाश कांबळे, १० फेब्रुवारी २०२६ | मॅक्स मंथन डेली न्यूज:

पिंपरी-चिंचवड : पिंपरी-चिंचवड महानगरपालिकेच्या महापौर पदाची धुरा सांभाळल्यानंतर नवनिर्वाचित महापौर रवी लांडगे यांनी एक नवा आदर्श शहरासमोर ठेवला आहे. “मला शुभेच्छा देण्यासाठी येताना कोणीही हार, पुष्पगुच्छ किंवा महागड्या भेटवस्तू आणू नयेत. त्याऐवजी महापालिका शाळांमधील गरीब विद्यार्थ्यांना उपयोगी पडतील अशा वह्या, पेन किंवा पुस्तके द्यावीत,” असे आवाहन महापौरांनी केले आहे.

महापौर रवी लांडगे यांनी स्पष्ट केले की, हार आणि पुष्पगुच्छ हे क्षणिक सन्मानाचे प्रतीक असतात, जे काही वेळातच कोमेजून जातात. मात्र, विद्यार्थ्यांसाठी दिलेले शैक्षणिक साहित्य त्यांच्या भविष्यासाठी आयुष्यभर उपयुक्त ठरते. या उपक्रमामुळे महापालिकेच्या शाळांमधील गरजू विद्यार्थ्यांना थेट मदत मिळणार असून, समाजाला शिक्षणाप्रती जागरूक करण्याचा हा एक प्रामाणिक प्रयत्न असल्याचे त्यांनी सांगितले.

गेले दोन दिवस महापौर रवी लांडगे हे वरिष्ठ नेत्यांच्या भेटीगाठी आणि दौऱ्यासाठी शहराबाहेर होते. या कालावधीत अनेक नागरिक त्यांना शुभेच्छा देण्यासाठी प्रतीक्षेत होते. नागरिकांची प्रत्यक्ष भेट घेऊ न शकल्याबद्दल महापौरांनी जाहीर दिलगिरी व्यक्त केली आहे. आता शहरात परतल्यानंतर त्यांनी भेटीसाठी येणाऱ्या नागरिकांना सामाजिक जबाबदारीची जाणीव ठेवून केवळ शैक्षणिक साहित्य आणण्याची विनंती केली आहे.

• शालेय पाठ्यपुस्तके किंवा कथांची पुस्तके.

• वह्या आणि लेखन साहित्य (पेन, पेन्सिल, रबर इ.).

• चित्रकला साहित्य किंवा इतर शैक्षणिक साधने.

महापौरांच्या या निर्णयाचे शहरातून मोठे कौतुक होत आहे. राजकीय सोहळ्यांमध्ये होणारा अवाजवी खर्च टाळून तो शिक्षणाकडे वळवल्यामुळे महापालिका शाळांमधील हजारो विद्यार्थ्यांचे शैक्षणिक बळ वाढण्यास मदत होणार आहे. नागरिकांनी या विधायक उपक्रमात सहभागी व्हावे, असे आवाहन महापौर कार्यालयाकडून करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.