“मोठी जीवितहानी झाल्यास प्रशासन जबाबदार असेल!” विरोधी पक्षनेते भाऊसाहेब भोईर यांचा वायसीएमच्या सुरक्षेवरून हल्लाबोल

वायसीएम रुग्णालयाची सुरक्षा ‘रामभरोसे’! घातपाताचा मोठा धोका; मेटल डिटेक्टर आणि बॅग चेकिंग मशिन बसवण्याची विरोधी पक्षनेते भाऊसाहेब भोईर यांची आक्रमक मागणी

पिंपरी चिंचवड प्रतिनिधी आकाश कांबळे, १८ फेब्रुवारी २०२६ | मॅक्स मंथन डेली न्यूज:

पिंपरी : पिंपरी चिंचवड महानगरपालिकेचे सर्वात मोठे आणि महत्त्वाचे समजले जाणारे यशवंतराव चव्हाण स्मृती रुग्णालय (YCMH) सध्या सुरक्षेच्या कारणास्तव चर्चेत आले आहे. रुग्णालयाच्या प्रवेशद्वारावर सक्षम सुरक्षा यंत्रणा नसल्याने कोणत्याही वेळी मोठी जीवितहानी किंवा अनुचित प्रकार घडू शकतो, अशी भीती व्यक्त करत विरोधी पक्षनेते भाऊसाहेब भोईर यांनी पालिका आयुक्तांना पत्र लिहून कडक शब्दांत इशारा दिला आहे.

विरोधी पक्षनेते भाऊसाहेब भोईर यांनी नुकताच वायसीएम रुग्णालयाचा पाहणी दौरा केला. या दौऱ्यात त्यांना धक्कादायक बाबी निदर्शनास आल्या. रुग्णालयाच्या मुख्य प्रवेशद्वाराजवळ येणाऱ्या हजारो नागरिकांची साधी तपासणीही केली जात नाही. सुरक्षा रक्षक तैनात असले तरी, त्यांच्याकडे तांत्रिक साधनांची कमतरता असल्याने कोणीही सहजपणे आत प्रवेश करू शकतो, असे या पाहणीत दिसून आले.

आयुक्तांना दिलेल्या पत्रात भाऊसाहेब भोईर यांनी अत्यंत गंभीर बाबींकडे लक्ष वेधले आहे. त्यांनी म्हटले आहे की:

“रुग्णालयाच्या प्रवेशद्वारावर सध्या कोणतीही मेटल डिटेक्टर मशिन किंवा बॅग चेकिंग मशिन कार्यान्वित नाही. काही समाजकंटक बॉम्ब किंवा घातक शस्त्रे घेऊन रुग्णालयात प्रवेश करू शकतात. अशा स्थितीत रुग्ण, त्यांचे नातेवाईक आणि अहोरात्र सेवा देणारे डॉक्टर यांच्या जीवावर प्राणघातक हल्ला होण्याची शक्यता नाकारता येत नाही. सुरक्षेच्या या त्रुटींमुळे मोठी जीवितहानी झाल्यास त्याला प्रशासन जबाबदार असेल.”

शहरातील काही हिंसक वृत्तीच्या लोकांमुळे रुग्णालयाचे वातावरण बिघडू शकते. या पार्श्वभूमीवर भाऊसाहेब भोईर यांनी खालील मागण्या प्रशासनासमोर मांडल्या आहेत:

• रुग्णालयाच्या सर्व प्रवेशद्वारांवर तात्काळ मेटल डिटेक्टर मशिन बसवण्यात यावीत.

• संशयास्पद वस्तूंची तपासणी करण्यासाठी बॅग चेकिंग मशिन (X-Ray Scanner) उपलब्ध करून द्यावे.

• सुरक्षा रक्षकांना अत्याधुनिक साधने पुरवून त्यांना सक्षम करावे.

• रुग्णालयात येणाऱ्या प्रत्येक नागरिकाची कडक तपासणी झाल्याशिवाय प्रवेश देऊ नये.

राष्ट्रवादी काँग्रेस पक्षाचे (अजितदादा पवार गट) गट नेते आणि विरोधी पक्षनेते भाऊसाहेब भोईर यांनी या संदर्भात संबंधित विभागातील अधिकाऱ्यांना तात्काळ आदेश निर्गत करण्याची विनंती केली आहे. वायसीएम हे केवळ रुग्णालय नसून हजारो नागरिकांचा आधार आहे, त्यामुळे येथील सुरक्षिततेशी तडजोड करणे म्हणजे मृत्यूला निमंत्रण देण्यासारखे आहे, अशी भावना नागरिकांमधून व्यक्त होत आहे.

© २०२६ मॅक्स मंथन डेली न्यूज. सर्व हक्क राखीव.