पिंपरी-चिंचवडच्या विकासासाठी भाजपचा ‘मास्टर प्लॅन’! हॉटेल सौंदर्य येथे नवनिर्वाचित नगरसेवकांचा स्नेहमेळावा; विकासाची नवी दिशा ठरली
पिंपरी चिंचवड प्रतिनिधी बालाजी नवले, १८ फेब्रुवारी २०२६ | मॅक्स मंथन डेली न्यूज:
पिंपरी : पिंपरी-चिंचवड महानगरपालिकेतील सत्ताधारी भारतीय जनता पक्षाच्या वतीने नवनिर्वाचित नगरसेवकांसाठी हॉटेल सौंदर्य येथे विशेष स्नेहभोजन आणि विकास नियोजन बैठकीचे आयोजन करण्यात आले होते. सत्तारुढ पक्षनेते प्रशांत शितोळे यांच्या पुढाकाराने झालेल्या या कार्यक्रमात शहराच्या आगामी पाच वर्षांतील विकासाचा आराखडा आणि नागरिकांच्या अपेक्षांवर सविस्तर मंथन करण्यात आले.
निवडणुकीच्या रणधुमाळीनंतर सर्व नगरसेवक एकत्रित आल्याने वातावरण अत्यंत आपुलकीचे आणि उत्साहाचे होते. यावेळी केवळ स्नेहभोजनच झाले नाही, तर प्रत्येक प्रभागातील प्रलंबित प्रश्न, विकासकामांचे प्राधान्यक्रम आणि प्रशासकीय अडचणींवर मुक्त संवाद झाला. शहराचा सर्वांगीण विकास करताना नागरिकांना केंद्रस्थानी ठेवून पारदर्शक कारभार करण्याचा निर्धार यावेळी सर्व लोकप्रतिनिधींनी व्यक्त केला.
या कार्यक्रमाला चिंचवड विधानसभेचे आमदार शंकरशेठ जगताप, महापालिकेच्या उपमहापौर शर्मिला बाबर तसेच शहराध्यक्ष शत्रुघ्न बापू काटे यांची प्रमुख उपस्थिती होती. या नेत्यांनी नवनिर्वाचित नगरसेवकांना मार्गदर्शन करताना, प्रभागातील प्रश्नांचा पाठपुरावा कसा करावा आणि शासन स्तरावरून निधी कसा मिळवावा, याबाबत मोलाच्या सूचना दिल्या.
सत्तारुढ पक्षनेते प्रशांत शितोळे यांनी यावेळी सर्वांचे स्वागत करून आभार मानले. “आपल्याला जनतेने विश्वासाने निवडून दिले आहे, त्यामुळे त्यांच्या अपेक्षा पूर्ण करणे ही आपली नैतिक जबाबदारी आहे. एकजुटीने आणि ठोस नियोजनासह आपण पिंपरी-चिंचवडला राज्याच्या नकाशावर अव्वल स्थानी नेण्यासाठी कार्य करू,” असा विश्वास शितोळे यांनी व्यक्त केला.
या कार्यक्रमामुळे सत्ताधारी पक्षातील ताळमेळ अधिक घट्ट झाला असून, आगामी महासभेमध्ये विकासाचे अनेक महत्त्वाचे विषय मार्गी लागण्याची शक्यता निर्माण झाली आहे.
© २०२६ मॅक्स मंथन डेली न्यूज. सर्व हक्क राखीव.
