आदिवासी विद्यार्थ्यांच्या ‘LC’ वर आता धर्माचा उल्लेख नको! पिंपरी-चिंचवड महापालिकेचे मुख्याध्यापकांना कडक आदेश; जात पडताळणीतील मोठी तांत्रिक अडचण दूर होणार

पिंपरी चिंचवड प्रतिनिधी बालाजी नवले, १८ फेब्रुवारी २०२६ | मॅक्स मंथन डेली न्यूज:

पिंपरी : आदिवासी विद्यार्थ्यांच्या शाळा सोडल्याच्या दाखल्यावर (LC) जात नमूद करताना त्यापुढे धर्माचा उल्लेख केल्यास असा दाखला जात पडताळणीसाठी अवैध ठरण्याची दाट शक्यता असते. ही बाब गांभीर्याने घेत पिंपरी-चिंचवड महानगरपालिकेच्या शिक्षण विभागाने शहरातील सर्व शाळांना कडक सूचना दिल्या आहेत. दाखल्यांवर केवळ ‘जमातीचा’ उल्लेख करावा, धर्माचा उल्लेख टाळावा, असे आदेश प्रशासन अधिकारी ज्योत्स्ना शिंदे यांनी परिपत्रकाद्वारे दिले आहेत.

अनेक शाळांमध्ये अनुसूचित जमातीच्या (ST) विद्यार्थ्यांचे दाखले देताना ‘हिंदू-भिल्ल’, ‘हिंदू-ठाकूर’, ‘हिंदू-कोकणी’, ‘हिंदू-वारली’, ‘हिंदू-कातकरी’ किंवा ‘हिंदू-कोळी महादेव’ असा उल्लेख केला जातो. मात्र, महाराष्ट्र शासनाच्या आदिवासी विकास विभागाच्या १२ जानेवारी २००० रोजीच्या परिपत्रकानुसार, अशा प्रकारे धर्माचा उल्लेख करून दिलेले जातीचे दाखले वैध समजले जात नाहीत. यामुळे विद्यार्थ्यांना भविष्यात जात पडताळणी (Caste Validity) करताना मोठ्या तांत्रिक अडचणींचा सामना करावा लागतो आणि त्यांचे शैक्षणिक नुकसान होते.

पिंपरी-चिंचवड महापालिकेच्या शिक्षण विभागाने (प्राथमिक) यासंदर्भात काढलेल्या परिपत्रकात स्पष्ट केले आहे की:

• शहरातील सर्व मनपा, खासगी, अनुदानित आणि विनाअनुदानित प्राथमिक शाळांच्या मुख्याध्यापकांनी शासन निर्णयाचे काटेकोर पालन करावे.

• शाळा सोडल्याच्या दाखल्यावर नोंदी करताना शासन परिपत्रक क्र. एसटीसी-१०९९/प्र.क्र.३१/का-१० (दिनांक १२ जानेवारी २०००) नुसारच कार्यवाही करावी.

• विद्यार्थ्यांचे शैक्षणिक नुकसान टाळण्यासाठी जात आणि जमातीच्या नोंदी अत्यंत अचूक असाव्यात.

या निर्णयामुळे आदिवासी समाजातील विद्यार्थ्यांना जातीचे प्रमाणपत्र आणि वैधता प्रमाणपत्र मिळवताना होणारा मानसिक आणि तांत्रिक त्रास कमी होणार आहे. महापालिकेच्या या ऐतिहासिक आणि सकारात्मक भूमिकेचे ‘अनुसूचित जमाती शिक्षक कर्मचारी संघटना, पिंपरी १८’ यांच्या वतीने स्वागत करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.