मोर्शीकरांची पायपीट थांबणार! भव्य एकात्मिक प्रशासकीय इमारतीचे पालकमंत्री चंद्रशेखर बावनकुळे यांच्या हस्ते लोकार्पण; सर्व शासकीय कार्यालये आता एकाच छताखाली

अमरावती/मोर्शी, ०९ मार्च २०२६ | मॅक्स मंथन डेली न्यूज:

अमरावती/मोर्शी : मोर्शी येथील नागरिकांना आता विविध शासकीय कामांसाठी शहरात ठिकठिकाणी फिरण्याची गरज उरणार नाही. रस्ते, पाणी आणि वीज या मूलभूत सुविधांसोबतच प्रशासकीय सुलभता देण्यासाठी उभारण्यात आलेल्या भव्य एकात्मिक प्रशासकीय इमारतीचे उद्घाटन जिल्ह्याचे पालकमंत्री चंद्रशेखर बावनकुळे यांच्या हस्ते रविवारी (८ मार्च) करण्यात आले. १२.८० कोटी रुपये खर्चून उभारलेली ही इमारत मोर्शीच्या विकासात मैलाचा दगड ठरणार आहे.

याप्रसंगी खासदार डॉ. अनिल बोंडे, अमर काळे, आमदार उमेश उर्फ चंदू यावलकर, राजेश वानखडे, नगराध्यक्ष प्रतीक्षा गुल्हाने, जिल्हाधिकारी आशिष येरेकर, उपविभागीय अधिकारी प्रदीपकुमार पवार आणि तहसीलदार सागर ढवळे यांसह अनेक मान्यवर उपस्थित होते.

लोकार्पणानंतर मार्गदर्शन करताना पालकमंत्री बावनकुळे म्हणाले की, “प्रशासकीय कामात वेग आणि पारदर्शकता आणणे हे शासनाचे मुख्य उद्दिष्ट आहे. ‘जिवंत सातबारा’ आणि ‘छत्रपती शिवाजी महाराज राजस्व अभियान’ यांसारख्या उपक्रमांतून सामान्य नागरिकांचे प्रश्न मार्गी लावले जात आहेत.” तसेच मोर्शी शहरासाठी पिण्याच्या पाण्याची टाकी, घनकचरा निर्मूलन आणि शहराचे सीटीएस (City Survey) करण्यासाठी विशेष निधी उपलब्ध करून देण्याची घोषणाही त्यांनी यावेळी केली.

• एकूण खर्च: १२.८० कोटी रुपये.

• क्षेत्रफळ: २७२८.४ चौरस मीटर.

• तळमजला: तहसील कार्यालय आणि दुय्यम निबंधक कार्यालय.

• पहिला मजला: उपविभागीय अधिकारी (SDO), कृषी विभाग, उपकोषागार आणि सहाय्यक निबंधक कार्यालय.

• दुसरा मजला: महिला व बालकल्याण विभाग आणि भव्य मीटिंग हॉल.

पालकमंत्र्यांनी यावेळी स्पष्ट केले की, ‘मुख्यमंत्री बळीराजा पाणंद रस्ता’ योजनेतून शेतकऱ्यांचे रस्ते प्राधान्याने पूर्ण केले जातील. तसेच तालुक्यातील घरकुल पट्टेवाटपाचा प्रश्नही लवकरच निकाली काढला जाईल. शहराचे सीटीएस झाल्यामुळे रहिवाशांच्या मालमत्तेला कायदेशीर आधार मिळणार असून शहराचा नकाशा अधिकृतरीत्या अद्ययावत होणार आहे.

कार्यक्रमाचे प्रास्ताविक तहसीलदार सागर ढवळे यांनी केले. यावेळी मान्यवरांच्या हस्ते ‘शासन निर्णय संग्रहाचे’ विमोचनही करण्यात आले. सर्व कार्यालये एकाच ठिकाणी आल्यामुळे वेळेची बचत होऊन प्रशासकीय कामात मोठी गती येईल, असा विश्वास उपस्थित मान्यवरांनी व्यक्त केला.

© २०२६ मॅक्स मंथन डेली न्यूज. सर्व हक्क राखीव।