चिंचवड नाट्यगृह की भ्रष्टाचाराचा अड्डा? ५० लाखांचा अपहार, तारखांची दलाली आणि सुविधांची दाणादाण; पालिकेच्या प्रतिमेचे धिंडवडे!

 मॅक्स मंथन एक्सक्लुझिव्ह

पिंपरी चिंचवड , १० मार्च २०२६ | मॅक्स मंथन डेली न्यूज:

पिंपरी : पिंपरी-चिंचवड शहराच्या सांस्कृतिक वैभवाचे प्रतीक असलेले चिंचवडचे प्रा. रामकृष्ण मोरे नाट्यगृह सध्या कलाकृतींमुळे नाही, तर अधिकारी आणि कर्मचाऱ्यांच्या ‘काळ्या’ कारभारामुळे चर्चेत आले आहे. ५० लाख ७० हजार रुपयांच्या अपहार प्रकरणाने संपूर्ण राज्य हादरले असतानाच, आता नाट्यगृहातील ‘तारीख दलाली’ आणि ‘कमिशनखोरी’चा धक्कादायक प्रकार चव्हाट्यावर आला आहे.

या गंभीर प्रकरणी विधानसभेत तारांकित प्रश्न उपस्थित झाल्यानंतर १६ जणांवर कारवाईची प्रक्रिया सुरू असल्याची माहिती उपमुख्यमंत्री एकनाथ शिंदे यांनी दिली आहे. मात्र, केवळ कागदोपत्री कारवाई करून “खरे सूत्रधार” सुटणार का? असा प्रश्न विचारला जात आहे.

नाट्यगृहातील सगळ्यात मोठा घोटाळा ‘तारीख वाटप’ प्रक्रियेत सुरू असल्याचे बोलले जात आहे.

• कृत्रिम टंचाई: ऑनलाईन बुकींगचा दावा केवळ नावापुरता असून, सुट्टीच्या आणि मोक्याच्या तारखा जाणीवपूर्वक रोखून धरल्या जातात.

• दलालांचा सुळसुळाट: नाट्यगृहाबाहेरील काही व्यक्ती “साहेबांना पैसे पोहचवावे लागतात” असे सांगून आयोजकांकडून अव्वाच्या सव्वा पैसे उकळत आहेत.

• कलाकारांची अडवणूक: अनेकदा तिकीट विक्री झालेल्या नाटकांच्या तारखाही ऐनवेळी रद्द केल्या जातात, ज्यामुळे नामवंत कलाकारांना प्रेक्षकांचे पैसे परत करावे लागल्याच्या घटना घडल्या आहेत.

एकेकाळी उत्तम स्वच्छतेसाठी नावाजलेल्या या नाट्यगृहाची अवस्था आता दयनीय झाली आहे:

• नादुरुस्त स्टेज: स्टेजच्या फळ्या उखडलेल्या आहेत, त्यावर चिकटपट्ट्या लावून काम चालवले जाते. साऊंड आणि लाईट सिस्टीमची अवस्थाही बिकट आहे.

• जेवणाची आबाळ: कलाकारांना बसून जेवण्यासाठी जागा नाही, मेकअप रूममध्ये एसी चालत नाहीत.

• साहित्यासाठी दबाव: नाट्यगृहातील साऊंड किंवा एलईडी न वापरता, अधिकाऱ्यांशी ‘सेटिंग’ असलेल्या खाजगी कंत्राटदारांकडूनच साहित्य घेण्यासाठी आयोजकांवर दबाव टाकला जातो.

नाट्यगृहात मद्य आणि मटणाच्या पार्ट्या होत असल्याचे आरोपही आता होत आहेत. जर १ जानेवारी २०२६ पासूनचे सीसीटीव्ही फुटेज आणि कर्मचाऱ्यांचे जाबजबाब घेतले, तर या ‘जहागिरी’मध्ये चालणाऱ्या अनेक काळ्या कृत्यांचा उलगडा होऊ शकतो.

चिंचवडचे आमदार शंकर जगताप यांनी या भ्रष्टाचाराविरुद्ध रणशिंग फुंकले आहे. “केवळ निलंबन पुरेसे नाही, तर अपहाराची संपूर्ण रक्कम व्याजासह वसूल करावी आणि मुख्य सूत्रधाराला जेलमध्ये टाकावे,” अशी मागणी त्यांनी केली आहे.

संपादकीय मत: शशिकांत बोधनी यांच्यासारख्या प्रामाणिक अधिकाऱ्यांनी ज्या नाट्यगृहाचा नावलौकिक वाढवला, तो आज काही भ्रष्ट लोकांमुळे मातीत जात आहे. आयुक्त श्रावण हर्डीकर आणि महापौर रवी लांडगे यांनी या कुंपणानेच शेत खाण्याच्या प्रकाराला वेळीच चाप लावला नाही, तर पिंपरी-चिंचवडची ही सांस्कृतिक वास्तू केवळ ‘लूटमार केंद्र’ म्हणून ओळखली जाईल.

© २०२६ मॅक्स मंथन डेली न्यूज. सर्व हक्क राखीव।