पिंपरी चिंचवड महापालिकेचा पाणीकर वसुलीत सर्वकालीन विक्रम; ८० कोटी ७४ लाखांचा टप्पा पार!

पिंपरी चिंचवड प्रतिनिधी बालाजी नवले, दिनांक: १ एप्रिल २०२६,मॅक्स मंथन डेली न्यूज:

पिंपरी: पिंपरी चिंचवड महानगरपालिकेच्या पाणीपुरवठा विभागाने आर्थिक वर्ष २०२५-२६ मध्ये ऐतिहासिक कामगिरी नोंदवली आहे. १ एप्रिल २०२५ ते ३१ मार्च २०२६ या कालावधीत महापालिकेने तब्बल ८० कोटी ७४ लाख ९ हजार ८१० रुपये पाणीकर वसूल केला असून, हा आतापर्यंतचा सर्वोच्चांक ठरला आहे. यामध्ये सांगवी क्षेत्राने ७ कोटी ६५ लाख रुपयांची विक्रमी वसुली करत शहरात प्रथम क्रमांक पटकावला आहे.

पाणीकर वसुलीसाठी महापालिका प्रशासनाने गेल्या वर्षभरापासून आक्रमक पवित्रा घेतला होता. नियमित आढावा बैठका, थकीत देयकांसाठी डिजिटल नोटिसा आणि ऑनलाइन पेमेंट सुविधेचा विस्तार यामुळे वसुली प्रक्रियेला मोठी गती मिळाली. पारदर्शक कार्यपद्धती आणि थकीत मिळकतधारकांवर नियमानुसार केलेली कारवाई यामुळे महसुलात ही मोठी वाढ साध्य झाली आहे.

या विक्रमी महसुलातून शहराची पाणीपुरवठा यंत्रणा अधिक सक्षम करण्यात येणार असल्याचे प्रशासनाने स्पष्ट केले आहे. यामध्ये प्रामुख्याने:

• नवीन जलवाहिन्यांची उभारणी आणि विस्तार.

• पाणी गळती शोधणे व त्यावर नियंत्रण मिळवण्यासाठी आधुनिक यंत्रणा.

• जलशुद्धीकरण प्रकल्पांचे (WTP) आधुनिकीकरण.

• वितरण यंत्रणेची क्षमता वाढवणे.

पाणीकर वसुलीचा सहा वर्षांतील आलेख:

“८० कोटींचा टप्पा पार करणे ही नागरिकांनी महापालिकेवर दाखविलेल्या विश्वासाची पावती आहे. या निधीचा वापर शहराला गुणवत्तापूर्ण पाणीपुरवठा करण्यासाठी केला जाईल.”

— रवि लांडगे, महापौर, पिंपरी चिंचवड महानगरपालिका

“ही विक्रमी वाढ आर्थिक शिस्त आणि प्रभावी अंमलबजावणीचे उदाहरण आहे. यातून जलशुद्धीकरण आणि वितरण यंत्रणेच्या सक्षमीकरणावर विशेष भर दिला जाईल.”

— डॉ. विजय सूर्यवंशी, आयुक्त, पिंपरी चिंचवड महानगरपालिका

“नियोजनबद्ध पाठपुरावा आणि तंत्रज्ञानाचा वापर यामुळे हा उच्चांक गाठता आला. नागरिकांनी असाच सहकार्य करावे, तर कर चुकवणाऱ्यांवर कठोर कारवाई केली जाईल.”

— प्रमोद ओंभासे, मुख्य अभियंता, पिंपरी चिंचवड महानगरपालिका

महापालिकेच्या वतीने सर्व प्रामाणिक करदात्यांचे आभार मानण्यात आले असून, उर्वरित थकबाकीदारांनी आपला कर तातडीने भरून शहराच्या विकासात योगदान द्यावे, असे आवाहन करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.