आता औद्योगिक नगरीत नोकरी मिळणार मोफत! ‘महापौर युवा संकल्प केंद्रा’चे भोसरीत दिमाखात उद्घाटन

युवकांनो फसवणूक टाळा! भोसरी आणि चाकणमध्ये महापौर रवि लांडगे यांच्या पुढाकारातून ‘युवा संकल्प रोजगार केंद्रा’चा शुभारंभ

पिंपरी चिंचवड प्रतिनिधी बालाजी नवले, १० एप्रिल २०२६ मॅक्स मंथन डेली न्यूज:

भोसरी: रोजगाराच्या शोधात पिंपरी-चिंचवड आणि चाकण या औद्योगिक नगरीत येणाऱ्या हजारो तरुण-तरुणींची एजंटांकडून होणारी आर्थिक फसवणूक थांबवण्यासाठी महापौर रवि लांडगे यांनी एक महत्त्वाचे पाऊल उचलले आहे. महापौरांच्या संकल्पनेतून भोसरी आणि चाकण येथे ‘महापौर युवा संकल्प रोजगार, कौशल्य विकास व करिअर मार्गदर्शन केंद्र’ सुरू करण्यात आले असून, याचे उद्घाटन (दि. ९) उत्साहात पार पडले.

भोसरी येथील संविधान चौकाजवळ असलेल्या फुगे प्रायमा येथे या मुख्य कार्यालयाचे लोकार्पण महापौर रवि लांडगे यांच्या हस्ते करण्यात आले. याप्रसंगी डॉ. संजय झोपे, संदीप पलांडे, प्रकाश लांडगे, कैलास लांडगे, प्रथमेश शेलार, आकाश कंद, प्रतीक शिंदे, ॲड. प्रतीक बोराडे, संदीपक राठी, निखिल मसने, प्रशांत पवार, रुपेश खोपडे, जयश्री वाघमोडे, कांचन जगताप, कृष्णा अगरवाल, अब्दुल अहमद आदी मान्यवर उपस्थित होते.

औद्योगिक क्षेत्रात नोकरी मिळवून देण्याच्या नावाखाली अनेकदा तरुणांकडून मोठी रक्कम उकळली जाते. ही वणवण थांबवण्यासाठी महापौरांनी ‘शून्य रुपये’ खर्चात नोकरी मिळवून देण्याचे उद्दिष्ट ठेवले आहे. या केंद्रात नोंदणीपासून ते प्रत्यक्ष नोकरी मिळेपर्यंत सर्व सेवा पूर्णपणे विनामूल्य असतील. आतापर्यंत सुमारे दोन हजार युवक-युवतींनी या उपक्रमाचा लाभ घेतला आहे.

• १००% मोफत सेवा: नोंदणी, नोकरीच्या संधी आणि करिअर समुपदेशनासाठी एकही रुपया घेतला जाणार नाही.

• राहण्याबाबत मार्गदर्शन: परगावाहून येणाऱ्या मुला-मुलींना राहण्याच्या जागेसाठीही योग्य मार्गदर्शन केले जाईल.

• सर्व शैक्षणिक पात्रतेसाठी संधी: दहावी, बारावी, आयटीआय (ITI), डिप्लोमा, इंजिनिअरिंग (B.E/M.E) तसेच बी.ए, बी.कॉम, बी.एससी पदवीधरांसाठी रोजगाराचे दालन खुले.

• फसवणुकीला लगाम: एजंटांच्या जाचातून तरुणांची मुक्तता करणे हा या केंद्राचा मुख्य उद्देश आहे.

“ज्या मुलांकडे कौशल्य आहे पण आर्थिक परिस्थिती बेताची आहे, अशा शेवटच्या घटकातील मुला-मुलींना सन्मानाचे आयुष्य देणे हे आमचे कर्तव्य आहे. ‘विनामूल्य नोकरी’ हेच आमचे मुख्य ध्येय असून तरुणांनी कोणत्याही एजंटाला बळी न पडता या केंद्राचा लाभ घ्यावा. विकसित महाराष्ट्राच्या उभारणीत तरुणांचा सहभाग महत्त्वाचा आहे.”

— रवि लांडगे, महापौर, पिंपरी-चिंचवड

१) भोसरी: संविधान चौक, फुगे प्रायमा, ‘A’ विंग, तिसरा मजला, ऑफिस नं. १२.

२) चाकण: कॅपिटल स्क्वेअर.

तरुणांनी आपल्या उज्ज्वल भविष्यासाठी या सुवर्णसंधीचा लाभ घ्यावा, असे आवाहन महापौर कार्यालयाकडून करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.