‘खोदा पहाड, निकला चुहा!’ सांगवीत महापालिकेच्या कारवाईचा केवळ देखावा? दुजाभावाचा नागरिकांचा आरोप

सांगवीत पालिकेच्या अनधिकृत बांधकाम विरोधी कारवाईचा फार्स; नागरिकांमध्ये संताप, कारवाई की केवळ दहशत?

पिंपरी चिंचवड प्रतिनिधी मनोज प्रधान, १० एप्रिल २०२६ मॅक्स मंथन डेली न्यूज:

सांगवी: पिंपरी-चिंचवड महानगरपालिकेच्या अनधिकृत बांधकाम विरोधी पथकाने काल (दि. ९ एप्रिल) सांगवी परिसरात मोठी कारवाई केली. मात्र, प्रचंड फौजफाटा आणि गाजावाजा करून करण्यात आलेली ही कारवाई म्हणजे ‘डोंगर पोखरून उंदीर काढण्या’सारखाच प्रकार असल्याची टीका स्थानिक नागरिकांकडून केली जात आहे. पालिकेच्या या दिखाऊ मोहिमेमुळे सर्वसामान्यांमध्ये तीव्र संतापाचे वातावरण निर्माण झाले आहे.

काल सांगवीत पालिकेचे पथक भल्यामोठ्या ताफ्यासह दाखल झाले. तीन ते चार मोठ्या बसेस, पोलीस बंदोबस्त, पालिकेचे सुरक्षा बल, अधिकारी आणि कर्मचारी असा मोठा लवाजमा सोबत होता. अनधिकृत बांधकामासमोर हा फौजफाटा उभा करून कारवाईचा केवळ देखावा केला गेल्याचा आरोप नागरिकांनी केला आहे. प्रत्यक्ष कारवाई करण्याऐवजी केवळ हमरीतुमरी आणि वादावादी करण्यातच पथकाचा वेळ गेला. शेवटी केवळ ‘कारवाई केली’ हे दाखवण्यासाठी विटांचे किरकोळ बांधकाम तोडून पथक पुढे रवाना झाले.

या कारवाईच्या निमित्ताने नागरिकांनी प्रशासनावर प्रश्नांची सरबत्ती केली आहे. अनधिकृत बांधकामे सुरू होताना पालिका प्रशासन गाढ झोपलेले असते का? तीन-चार मजल्यांचे बांधकाम पूर्ण झाल्यावरच हा फौजफाटा का आठवतो? असे सवाल उपस्थित केले जात आहेत. पथकावर होणारा अवाढव्य खर्च हा नागरिकांनी कररूपाने भरलेला पैसा आहे. हा पैसा विकासकामांसाठी वापरण्याऐवजी केवळ दहशत निर्माण करण्यासाठी आणि दिखाऊ कारवाईसाठी वापरला जात असल्याचा आरोप होत आहे.

“नियम सर्वांसाठी समान असायला हवा, मात्र पालिकेची कारवाई निवडक आहे,” अशा भावना नागरिकांनी व्यक्त केल्या आहेत. राजकीय वरदहस्त असलेल्या मोठ्या बांधकामांना अभय दिले जाते आणि ज्यांचा कोणी वाली नाही अशा गोरगरीब लोकांच्या घरांवर हातोडा चालवला जातो, असा दुजाभाव या मोहिमेत दिसून येत असल्याची चर्चा परिसरात रंगली होती.

• आर्थिक हितसंबंधांची कुजबुज: ही वरवरची कारवाई केवळ तडजोडीसाठी केली जाते का? असा संशय नागरिकांनी व्यक्त केला आहे.

• आयुक्तांचा ‘पुरुषार्थ’ काय?: नवीन आयुक्तांच्या कार्यकाळात अशा प्रकारच्या दिखाऊ आणि पालिकेचा खर्च वाढवणाऱ्या कारवाया हाच प्रशासकीय पुरुषार्थ आहे का?

• फार्स कशासाठी?: जर प्रत्यक्ष बांधकाम पाडायचे नसेल, तर इतक्या मोठ्या लवाजम्याचे नाटक करून नागरिकांमध्ये दहशत का निर्माण केली जाते?

एकूणच, सांगवीतील या कारवाईने प्रशासनाच्या कार्यपद्धतीवर मोठे प्रश्नचिन्ह निर्माण केले आहे. “खोदा पहाड, निकला चुहा” अशा स्वरूपाच्या या कारवाईमुळे पालिकेची नाचक्की होत असून, नागरिकांमधील रोष वाढत चालला आहे.

© २०२६ मॅक्स मंथन डेली न्यूज. सर्व हक्क राखीव.