एम. ए. मराठी उत्तीर्ण कर्मचाऱ्यांना दोन विशेष वेतनवाढ; पिंपरी-चिंचवड महापालिका विधी समितीचा महत्त्वपूर्ण ठराव
पिंपरी चिंचवड प्रतिनिधी आकाश कांबळे, १० एप्रिल २०२६ मॅक्स मंथन डेली न्यूज:
पिंपरी: पिंपरी-चिंचवड महानगरपालिकेच्या दैनंदिन प्रशासकीय कामकाजात मराठी भाषेचा वापर १०० टक्के व्हावा आणि कार्यालयीन व्यवहार अधिक सोप्या व अर्थपूर्ण भाषेत व्हावेत, यासाठी महापालिकेने एक मोठा निर्णय घेतला आहे. एम.ए. मराठी उत्तीर्ण असलेल्या कर्मचाऱ्यांना दोन विशेष वेतनवाढ देण्याचा ठराव विधी समितीच्या विशेष बैठकीत मंजूर करण्यात आला आहे.
विधी समितीची ही बैठक सभापती सुजाता बोराटे यांच्या अध्यक्षतेखाली पार पडली. यावेळी नगरसेवक ज्ञानेश्वर जगताप, कुशाग्र कदम, वर्षा जगताप, तुषार सहाणे, कुंदा भिसे, शेखर चिंचवडे, महापालिका सहआयुक्त मनोज लोणकर आणि उपायुक्त राजेश आगळे उपस्थित होते. हा ठराव आता अंतिम मंजुरीसाठी महापालिका सभेसमोर (General Body) ठेवला जाणार आहे.
राजभाषा मराठीतून कामकाज अधिक सक्षम आणि परिणामकारक करण्यासाठी हा निर्णय घेण्यात आला आहे. प्रशासकीय संवर्गातील कर्मचाऱ्यांनी मराठी विषयात उच्च शिक्षण घेतल्यास, त्याचा उपयोग कार्यालयीन दस्तऐवज तयार करणे, अचूक अनुवाद करणे आणि सर्वसामान्यांना समजेल अशी प्रशासकीय भाषा विकसित करण्यासाठी होणार आहे. मराठीला ज्ञान आणि रोजगाराची भाषा म्हणून प्रस्थापित करण्याच्या उद्देशाने विधी समितीने हे महत्त्वाचे पाऊल उचलले आहे.
-
प्रोत्साहन: कर्मचाऱ्यांना मराठी भाषेचे उच्च शिक्षण घेण्यास प्रवृत्त करणे.
-
प्रभावी संवाद: कार्यालयीन पत्रव्यवहार आणि संवाद अधिक सुटसुटीत व स्पष्ट करणे.
-
जतन व संवर्धन: मराठी भाषेचा प्रचार, प्रसार आणि बोली भाषांचे जतन करणे.
-
पारदर्शकता: नागरिकांशी होणारा संवाद मायबोलीत करून प्रशासन अधिक लोकाभिमुख करणे.
“पिंपरी-चिंचवड महापालिकेच्या कामकाजात मराठीचा प्रभावी आणि व्यापक वापर व्हावा, हा आमचा मुख्य उद्देश आहे. एम.ए. मराठी उत्तीर्ण कर्मचाऱ्यांना विशेष वेतनवाढ दिल्यास त्यांना उच्च शिक्षणाची प्रेरणा मिळेल. यामुळे प्रशासकीय कामकाज अधिक सुलभ, पारदर्शक आणि नागरिकाभिमुख होण्यास मोठी मदत होईल.”
— सुजाता बोराटे, सभापती, विधी समिती, पिंपरी-चिंचवड महापालिका
© २०२६ मॅक्स मंथन डेली न्यूज. सर्व हक्क राखीव.
