महात्मा फुले यांचा स्त्रीशिक्षणाचा विचार आजही मार्गदर्शक; महापौर रवि लांडगे यांचे प्रतिपादन

पिंपरी चिंचवड प्रतिनिधी मनोज प्रधान, ११ एप्रिल २०२६ मॅक्स मंथन डेली न्यूज:

पिंपरी: “क्रांतिसूर्य महात्मा जोतीराव फुले यांनी स्त्रीशिक्षणाचा जो पाया घातला, तो भारतीय समाज परिवर्तनाच्या इतिहासातील सर्वात महत्त्वाचा टप्पा ठरला. आज स्त्रिया शिक्षणाच्या बळावर प्रशासन, विज्ञान, उद्योग आणि क्रीडा अशा सर्वच क्षेत्रांत जी उत्तुंग प्रगती करत आहेत, ते महात्मा फुले यांनी सुरू केलेल्या विचारप्रवाहाचेच फलित आहे,” असे प्रतिपादन महापौर रवि लांडगे यांनी केले.

पिंपरी-चिंचवड महानगरपालिकेच्या वतीने क्रांतिसूर्य महात्मा जोतीराव फुले यांच्या जयंतीनिमित्त विविध कार्यक्रमांचे आयोजन करण्यात आले होते. महापालिकेच्या मुख्य प्रशासकीय भवनातील महात्मा फुले यांच्या प्रतिमेस आणि पिंपरी येथील ज्ञानज्योती सावित्रीबाई फुले स्मारकातील पुतळ्यास महापौर रवि लांडगे यांच्या हस्ते पुष्पहार अर्पण करून अभिवादन करण्यात आले.

याप्रसंगी महापालिका आयुक्त डॉ. विजय सूर्यवंशी, उपमहापौर शर्मिला बाबर, स्थायी समिती सभापती अभिषेक बारणे, विरोधी पक्षनेते भाऊसाहेब भोईर, शिक्षण समिती सभापती रविना अंगोळकर, नगरसदस्या अनुराधा गोरखे, सुप्रिया चांदगुडे, नगरसदस्य धर्मपाल तंतरपाळे, कुशाग्र कदम, अतिरिक्त आयुक्त विक्रांत बगाडे यांच्यासह वरिष्ठ अधिकारी आणि नागरिक मोठ्या संख्येने उपस्थित होते.

विरोधी पक्षनेते भाऊसाहेब भोईर यांनी महात्मा फुले यांच्या सामाजिक न्यायाच्या लढ्याचा गौरव केला. “महात्मा फुलेंचे विचार केवळ जयंतीपुरते मर्यादित न राहता ते पुढील पिढीपर्यंत पोहोचणे आवश्यक आहे. शालेय विद्यार्थ्यांमध्ये निबंध, वक्तृत्व स्पर्धांच्या माध्यमातून या विचारांची रुजवण व्हायला हवी,” असे त्यांनी नमूद केले.

आयुक्त डॉ. विजय सूर्यवंशी यांनी प्रशासनाची भूमिका मांडताना सांगितले की, “पिंपरी येथील भीमसृष्टी परिसरातील क्रांतिज्योती सावित्रीबाई फुले आणि क्रांतिसूर्य महात्मा फुले यांच्या स्मारकाचे काम हे केवळ एक बांधकाम नसून ते समाजप्रबोधनाचे केंद्र ठरेल. हे काम प्राधान्याने आणि गतीने पूर्ण करण्यासाठी महापालिका कटिबद्ध आहे.”

क्रांतिसूर्य महात्मा जोतीराव फुले यांच्या द्विशताब्दी जयंती वर्षानिमित्त आणि भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त आयोजित ‘सामाजिक समता सप्ताह’ व ‘विचार प्रबोधन पर्व २०२६’ अंतर्गत एका विशेष प्रदर्शनाचे आयोजन करण्यात आले आहे.

• प्रदर्शनाचा कालावधी: ११ ते १५ एप्रिल २०२६.

• स्थळ: सावित्रीबाई फुले स्मारक, पिंपरी.

• स्वरूप: महात्मा फुले आणि डॉ. बाबासाहेब आंबेडकर यांच्या जीवनातील महत्त्वपूर्ण प्रसंगांचे दर्शन घडविणारी दुर्मिळ छायाचित्रे.

या प्रदर्शनाचे उद्घाटन महापौर रवि लांडगे यांच्या हस्ते करण्यात आले. नागरिकांनी मोठ्या संख्येने या प्रदर्शनाचा लाभ घेऊन महापुरुषांच्या प्रेरणादायी प्रवासाची ओळख करून घ्यावी, असे आवाहन यावेळी करण्यात आले.

© २०२६ मॅक्स मंथन डेली न्यूज. सर्व हक्क राखीव.