जनगणनेतील प्रत्येक टप्पा अचूक आणि सुलभ पद्धतीने पार पाडा; अतिरिक्त आयुक्त कुलदीप जंगम यांचे आदेश

पिंपरी चिंचवड प्रतिनिधी आकाश कांबळे, २४ एप्रिल २०२६ मॅक्स मंथन डेली न्यूज:

पिंपरी: पिंपरी-चिंचवड महानगरपालिकेच्या वतीने राबविण्यात येत असलेल्या जनगणना मोहिमेला आता वेग आला आहे. या मोहिमेअंतर्गत नियुक्त करण्यात आलेल्या प्रगणक, पर्यवेक्षक आणि फील्ड ट्रेनर्सच्या प्रशिक्षण सत्राला अतिरिक्त आयुक्त कुलदीप जंगम यांनी आज भेट देऊन मार्गदर्शन केले. आकुर्डी येथील ग.दि. माडगूळकर सभागृहात हे प्रशिक्षण पार पडले.

यावेळी उपायुक्त तथा शहर जनगणना अधिकारी सचिन पवार, सहायक आयुक्त किरणकुमार मोरे, क्षेत्रीय अधिकारी निवेदिता घार्गे आणि इतर प्रशासकीय अधिकारी उपस्थित होते.

अतिरिक्त आयुक्तांनी प्रशिक्षणाची रचना, विषयांची मांडणी आणि अंमलबजावणीचा सविस्तर आढावा घेतला. प्रगणकांना घरगुती सर्वेक्षण कसे करावे, नागरिकांशी संवाद साधण्याचे कौशल्य आणि विशेषतः ॲप-आधारित डेटा नोंदणी या तांत्रिक बाबींचे प्रशिक्षण दिले जात आहे. डिजिटल साधनांच्या वापरामुळे ही प्रक्रिया अधिक सुलभ, पारदर्शक आणि वेगवान होणार असल्याचे जंगम यांनी नमूद केले.

जनगणनेचा पहिला टप्पा १६ मे ते १४ जून २०२६ या कालावधीत पार पडणार आहे. शहराच्या पायाभूत सुविधा, आरोग्य, शिक्षण आणि पाणीपुरवठा यांसारख्या सेवांचे भविष्यकालीन नियोजन करण्यासाठी अचूक लोकसंख्यात्मक माहिती आवश्यक असते. त्यामुळे प्रत्येक कर्मचाऱ्याने आपली जबाबदारी ओळखून अत्यंत दक्षतेने काम करावे, अशा सूचना प्रशासनाकडून देण्यात आल्या आहेत.

“जनगणना ही शहराच्या नियोजनासाठी अत्यंत महत्त्वाची प्रक्रिया आहे. आरोग्य, शिक्षण, वाहतूक यांसारख्या क्षेत्रांतील भविष्यातील नियोजन अचूक माहितीवरच अवलंबून असते. ही केवळ शासकीय जबाबदारी नसून शहराच्या सर्वांगीण विकासासाठी योगदान देण्याची एक महत्त्वाची संधी आहे.”

– कुलदीप जंगम, अतिरिक्त आयुक्त, पिंपरी-चिंचवड महानगरपालिका

“अचूक माहिती संकलन आणि वेळेवर डेटा सादर करणे हीच या प्रक्रियेची खरी किल्ली आहे. डिजिटल साधनांचा प्रभावी वापर आणि नागरिकांशी सकारात्मक संवाद यामुळे ही प्रक्रिया यशस्वी होईल.”

– सचिन पवार, उपायुक्त तथा शहर जनगणना अधिकारी

© २०२६ मॅक्स मंथन डेली न्यूज. सर्व हक्क राखीव.