दिव्यांग बांधवांना मुख्य प्रवाहात आणण्यासाठी उद्योग क्षेत्र एकत्र; ‘मिशन संधी’ची दमदार सुरुवात

पिंपरी चिंचवड प्रतिनिधी बालाजी नवले, ४ मे २०२६ मॅक्स मंथन डेली न्यूज:

पिंपरी: पिंपरी चिंचवड महानगरपालिकेने उभारलेले दिव्यांग भवन हे केवळ शहरापुरते मर्यादित न राहता आंतरराष्ट्रीय स्तरावर एक आदर्श मॉडेल म्हणून उभे राहत आहे। या केंद्राच्या माध्यमातून दिव्यांग बांधवांना सक्षम करण्यासाठी आता शहरातील उद्योगसमूह आणि कॉर्पोरेट क्षेत्राने ‘मिशन संधी’ या उपक्रमात सक्रिय सहभाग घ्यावा, असे आवाहन महापौर रवि लांडगे यांनी केले।

वाकड येथील हॉटेल सयाजी येथे पिंपरी चिंचवड महानगरपालिका दिव्यांग भवन फाऊंडेशनच्या वतीने आयोजित ‘मिशन संधी’ उपक्रमाचा शुभारंभ उत्साहात पार पडला। दिव्यांग बांधवांना स्वयंपूर्ण आणि मुख्य प्रवाहात आणण्यासाठी शाश्वत ‘एम्प्लॉयर इकोसिस्टम’ उभारणे, हा या वर्षभर चालणाऱ्या मोहिमेचा मुख्य उद्देश आहे।

महापौर रवि लांडगे यांनी नमूद केले की, २०२४ पासून सुरू झालेल्या या उपक्रमामुळे अनेक दिव्यांगांच्या जीवनात सकारात्मक बदल घडला आहे। दिव्यांग भवनमध्ये २१ प्रकारच्या दिव्यांगत्वासाठी आधुनिक थेरपी आणि उपचार सुविधा उपलब्ध आहेत। आगामी काळात त्यांच्यासाठी स्वतंत्र वसतीगृह उभारण्याचा महापालिकेचा मानस असून, यासाठी व्यावसायिकांनी सीएसआर (CSR) च्या माध्यमातून मोठे योगदान द्यावे, अशी अपेक्षा त्यांनी व्यक्त केली।

• भाऊसाहेब भोईर (विरोधी पक्षनेते): हा उपक्रम अंतर्मुख करणारा असून व्यावसायिकांनी दिव्यांगांसाठी ‘देवदूत’ बनून प्रत्यक्ष कृतीतून सहकार्य करावे।

• अभिषेक बारणे (स्थायी समिती सभापती): कंपन्यांनी केवळ सहानुभूती न दाखवता ‘समावेशक कार्यसंस्कृती’ निर्माण करण्यासाठी आणि प्रत्यक्ष रोजगाराच्या संधी उपलब्ध करून देण्यासाठी पुढाकार घ्यावा।

• डॉ. विजय सूर्यवंशी (आयुक्त): अशा प्रकारचे व्यापक कार्य करणारी पिंपरी चिंचवड ही जगातील एकमेव महानगरपालिका आहे। सध्या शहरात दिव्यांगांची ओळख पटवण्यासाठी ‘होम टू होम सर्वे’ सुरू असल्याची माहिती त्यांनी दिली।

• ओमप्रकाश देशमुख (व्यवस्थापकीय संचालक, DBF): दिव्यांगांना केवळ मदतीची गरज नसून त्यांना ‘सक्षम मनुष्यबळ’ म्हणून मुख्य प्रवाहात स्थान देणे काळाची गरज आहे।

प्रसिद्ध दिव्यांग उद्योजक भावेश भाटिया यांनी यावेळी मार्गदर्शन केले। ते म्हणाले, “दिव्यांगत्व ही मर्यादा नसून स्वतःची ताकद ओळखण्याची संधी आहे। उद्योगांनी दिव्यांगांकडे उत्तम मनुष्यबळ म्हणून पाहण्याची मानसिकता बदलणे आवश्यक आहे।”

• औपचारिक प्रतिज्ञा: सहभागी संस्थांनी केवळ चर्चा न करता दिव्यांगांच्या उपजीविकेसाठी ठोस आणि औपचारिक बांधिलकीची प्रतिज्ञा घेतली।

• कौशल्य विकास: वर्षभर दिव्यांगांना रोजगारक्षम बनवण्यासाठी विविध प्रशिक्षण उपक्रम राबवले जातील।

• भागीदार संस्था: या उपक्रमासाठी ‘इन्क्लुझ्झा, बेंगळुरू’ यांनी नॉलेज पार्टनर तर ‘रोहिणी पीपल टेक्नॉलॉजी’ यांनी इम्प्लिमेंटेशन पार्टनर म्हणून सहकार्य केले।

या कार्यक्रमास उप आयुक्त अण्णा बोदडे, सहाय्यक आयुक्त निवेदिता घार्गे, लघुउद्योग संघटनेचे अध्यक्ष अभय भोर आणि विविध कंपन्यांचे एचआर (HR) व सीएसआर प्रमुख उपस्थित होते।

© २०२६ मॅक्स मंथन डेली न्यूज. सर्व हक्क राखीव.