सायबर पोलिसांची धडाकेबाज कामगिरी; फसवणूक झालेली ५६ लाख रुपयांची १००% रक्कम तक्रारदाराला परत मिळवून दिली

पिंपरी चिंचवड प्रतिनिधी लक्ष्मण प्रधान, ६ मे २०२६ मॅक्स मंथन डेली न्यूज:

पिंपरी: पिंपरी-चिंचवड सायबर सेलने एका मोठ्या सायबर फसवणुकीचा छडा लावत तक्रारदाराचे ५६ लाख रुपये पूर्णतः परत मिळवून दिले आहेत. भोसरी येथील एका कंपनीची परदेशातील बँकेच्या नावे फसवणूक झाली होती, ज्याचा तपास करून पोलिसांनी ही रक्कम यशस्वीरीत्या गोठवली आणि परत मिळवली.

भोसरी येथील ‘PHBB VALVES PVT LTD’ या कंपनीचे मालक संजय जाधव यांनी सायबर पोलिसांकडे तक्रार दाखल केली होती. त्यांची कंपनी हार्डवेअरचे काम करते आणि चीनमधील ‘Wenzhou Artech Machinery Technology co. LTD’ या कंपनीसोबत त्यांचे व्यावसायिक व्यवहार सुरू असतात. अज्ञात आरोपीने मूळ कंपनीशी साधर्म्य असलेला बनावट ई-मेल आयडी तयार केला आणि बँकेचे तपशील बदलल्याचे सांगून ५६ लाख रुपये अमेरिकेतील ‘सिटिझन बँक’ (Citizen Bank, USA) मधील एका खात्यावर पाठवण्यास भाग पाडले.

पैसे पाठवल्यानंतर जाधव यांनी मूळ कंपनीच्या प्रतिनिधींशी संपर्क साधला असता, त्यांनी बँक खाते बदलले नसल्याचे स्पष्ट केले. आपली फसवणूक झाल्याचे लक्षात येताच जाधव यांनी ऑनलाईन तक्रार नोंदवली आणि भोसरी पोलीस ठाण्यात गुन्हा (गु.र.नं. १९५/२०२६) दाखल करण्यात आला.

• पोलिसी कारवाई: सायबर पोलिसांनी तातडीने अमेरिकेतील संबंधित बँकेशी आणि नोडल अधिकाऱ्यांशी समन्वय साधला.

• आव्हाने: बँक परदेशातील असल्याने पत्रव्यवहार आणि समन्वयात अडचणी येत होत्या, तरीही पोलिसांनी सविस्तर माहिती देऊन रक्कम गोठवण्यास भाग पाडले.

• यश: पोलिसांच्या सातत्यपूर्ण पाठपुराव्यामुळे ५६ लाख रुपयांची संपूर्ण रक्कम तक्रारदाराच्या बँक खात्यावर परत जमा झाली आहे.

ही कामगिरी पोलीस आयुक्त विनय कुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त सारंग आव्हाड, पोलीस उप-आयुक्त (गुन्हे) डॉ. शिवाजी पवार आणि सहाय्यक पोलीस आयुक्त डॉ. विशाल हिरे यांच्या मार्गदर्शनाखाली करण्यात आली. सायबर पोलीस ठाण्याचे वरिष्ठ पोलीस निरीक्षक रविकिरण नाळे, सपोनि प्रवीण स्वामी, पोउपनि वैभव पाटील, प्रकाश कातकाडे आणि त्यांच्या पथकाने या तपासात महत्त्वाची भूमिका बजावली.

© २०२६ मॅक्स मंथन डेली न्यूज. सर्व हक्क राखीव.