चाकणमध्ये अंमली पदार्थ विरोधी पथकाचा मोठा छापा; गांजा मिश्रित ‘बटा’ गोळ्यांसह २.४१ लाखांचा मुद्देमाल जप्त
पिंपरी चिंचवड प्रतिनिधी बालाजी नवले, ११ मे २०२६ मॅक्स मंथन डेली न्यूज:
चाकण: पिंपरी-चिंचवड पोलीस आयुक्तालय हद्दीतील अंमली पदार्थांच्या अवैध विक्रीवर अंकुश ठेवण्यासाठी गुन्हे शाखेने मोठी कारवाई केली आहे. अंमली पदार्थ विरोधी पथकाने नानेकरवाडी (ता. खेड) येथे छापा टाकून गांजा मिश्रित ‘बटा’ गोळ्या आणि प्रतिबंधित गुटख्याचा साठा जप्त केला असून एका आरोपीला बेड्या ठोकल्या आहेत.
पोलीस आयुक्त विनयकुमार चौबे यांनी शहरातील अंमली पदार्थांचे समूळ उच्चाटन करण्याचे आदेश दिले होते. त्यानुषंगाने गुन्हे शाखेचे पोलीस उप-आयुक्त शिवाजी पवार आणि सहायक पोलीस आयुक्त प्रवीण मोरे यांच्या मार्गदर्शनाखाली वरिष्ठ पोलीस निरीक्षक महेश पाटील यांनी विशेष पथके तैनात केली होती.
पोलीस उपनिरीक्षक जिलानी मोमीन यांना माहिती मिळाली होती की, नानेकरवाडी येथील संदीप नानेकर यांच्या भाड्याच्या खोलीत एक तरुण गांजा मिश्रित गोळ्यांची बेकायदेशीर विक्री करत आहे. या माहितीच्या आधारे पथकाने खोली क्रमांक २ मध्ये छापा टाकला.
गांजा मिश्रित ‘बटा’ गोळ्या: १४९ किलो ७१५ ग्रॅम (किंमत ६४,८०० रुपये), प्रतिबंधित गुटखा: १,६६,९७० रुपये किमतीचा साठा, इतर: एक मोबाईल फोन, एकूण किंमत: २,४१,७७० रुपये या कारवाईत पोलिसांनी खालील मुद्देमाल हस्तगत केला आहे.
याप्रकरणी पोलिसांनी राहुलसिंग हेमरोजसिंग लोधी (वय २५, रा. नानेकरवाडी, मूळ रा. मध्य प्रदेश) याला अटक केली आहे. त्याच्याविरुद्ध दक्षिण चाकण पोलीस ठाण्यात एन.डी.पी.एस. ॲक्ट (NDPS Act) आणि भारतीय न्याय संहितेच्या विविध कलमांनुसार गुन्हा दाखल करण्यात आला आहे. पुढील तपास दक्षिण चाकण पोलीस करत आहेत.
शहरात कुठेही अंमली पदार्थांची विक्री किंवा वापर होत असल्यास नागरिकांनी तात्काळ खालील क्रमांकांवर संपर्क साधावा:
अंमली पदार्थ विरोधी पथक: ८६००००२३२० , पोलीस हेल्पलाईन: ११२ , मानस हेल्पलाईन: १९३३
सदरची कामगिरी वरिष्ठ पोलीस निरीक्षक महेश पाटील, उपनिरीक्षक जिलानी मोमीन, निखिल शेटे, कपिलेश इगवे, निखिल वप्पे, सदानंद रुद्राक्षे आणि सपकाळ यांच्या पथकाने केली. पोलीस अंमलदार सुभाष गुरव यांनी तांत्रिक विश्लेषणासाठी मदत केली.
© २०२६ मॅक्स मंथन डेली न्यूज. सर्व हक्क राखीव.
