सावित्रीबाई फुले पुणे विद्यापीठाचा महाविद्यालयांना अल्टिमेटम; १८ मे पर्यंत शिक्षकांची माहिती न दिल्यास प्रवेश प्रक्रियेवर बंदी

पुणे/पिंपरी प्रतिनिधी आकाश कांबळे, १२ मे २०२६ मॅक्स मंथन डेली न्यूज:

पुणे: सावित्रीबाई फुले पुणे विद्यापीठाशी (SPPU) संलग्न असलेल्या ज्या महाविद्यालयांनी आणि मान्यताप्राप्त संस्थांनी अद्याप आपल्या पात्र शिक्षकांची माहिती विद्यापीठाच्या ‘बीओडी’ (BOD) पोर्टलवर अपलोड केलेली नाही, त्यांना विद्यापीठाने कठोर इशारा दिला आहे. येत्या १८ मे २०२६ पर्यंत ही प्रक्रिया पूर्ण न केल्यास, संबंधित महाविद्यालयांच्या शैक्षणिक वर्ष २०२६-२७ मधील प्रथम वर्ष प्रवेशावर बंदी घातली जाईल, असे विद्यापीठाने स्पष्ट केले आहे.

विद्यापीठाने सोमवारी प्रसिद्ध केलेल्या परिपत्रकानुसार, ही शेवटची संधी असून यानंतर कोणतीही मुदतवाढ दिली जाणार नाही.

विद्यापीठाच्या नियमानुसार, प्रत्येक महाविद्यालयामध्ये अखिल भारतीय तंत्रशिक्षण परिषद (AICTE), विद्यापीठ अनुदान आयोग (UGC) आणि राज्य सरकारने विहित केलेल्या किमान शिक्षक संख्येच्या किमान ५० टक्के शिक्षक असणे अनिवार्य आहे. यामध्ये ३१ मार्च २०२६ पर्यंत विद्यापीठाच्या मान्यतेने नियुक्त केलेले नियमित आणि तदर्थ (Ad-hoc) शिक्षकांचा समावेश करण्यात येईल.

यापूर्वी विद्यापीठाने शिक्षक भरती आणि माहिती अपलोड करण्यासाठी ३१ मार्च ही मुदत दिली होती. त्यानंतर १५ एप्रिल आणि ९ मे पर्यंत मुदतवाढ देण्यात आली. मात्र, तरीही अनेक महाविद्यालयांनी ही प्रक्रिया पूर्ण केली नसल्याचे विद्यापीठाच्या निदर्शनास आले आहे. विद्यार्थ्यांचे नुकसान टाळण्यासाठी विद्यापीठाच्या विद्या परिषदेने (Academic Council) २४ जानेवारी २०२६ रोजी झालेल्या बैठकीत, निकष पूर्ण न करणाऱ्या संस्थांच्या प्रवेश प्रक्रियेवर बंदी घालण्याचा निर्णय घेतला होता.

१८ मे ही माहिती अपलोड करण्याची अंतिम तारीख असेल. जे महाविद्यालय या मुदतीत माहिती देणार नाहीत, ते नियम पाळण्यास इच्छुक नसल्याचे गृहीत धरले जाईल. अशा महाविद्यालयांना शैक्षणिक वर्ष २०२६-२७ साठी प्रथम वर्षाचे प्रवेश घेता येणार नाहीत. या गंभीर निर्णयामुळे आता महाविद्यालयांमध्ये शिक्षकांच्या माहितीसाठी धावपळ सुरू झाली आहे.

© २०२६ मॅक्स मंथन डेली न्यूज. सर्व हक्क राखीव.