चाकणनंतर आता थेरगावात अंमली पदार्थ विरोधी पथकाचा कडक प्रहार! ३.९ किलो गांज्यासह पिंपरीचा तस्कर जेरबंद

थेरगावात अंमली पदार्थ विरोधी पथकाचा छापा; मोपेड गाडीसह ३.९ किलो गांजा जप्त, एकाला बेड्या!

काळेवाडी पोलीस हद्दीतील थेरगाव स्मशानभूमी परिसरात कारवाई; सव्वा तीन लाखांचा मुद्देमाल हस्तगत

पिंपरी चिंचवड प्रतिनिधी बालाजी नवले, २९ मे २०२६ मॅक्स मंथन डेली न्यूज:

थेरगाव (चिंचवड): पिंपरी-चिंचवड शहराला अंमली पदार्थांच्या विळख्यातून मुक्त करण्यासाठी गुन्हे शाखेने धडक कारवायांचे सत्र सुरूच ठेवले आहे. चाकणमधील मोठ्या कारवाईनंतर, अंमली पदार्थ विरोधी पथकाने काळेवाडी पोलीस ठाण्याच्या हद्दीत थेरगाव येथे दुसरी मोठी कारवाई केली आहे. थेरगाव स्मशानभूमी जवळील लाकूड वखारीजवळ संशयास्पदरीत्या फिरणाऱ्या एका तरुणाला मोपेड दुचाकीसह ताब्यात घेऊन, त्याच्याकडून तब्बल ३ किलो ९१५ ग्रॅम वजनाचा गांजा जप्त करण्यात आला आहे.या कारवाईत पोलिसांनी एकूण ३ लाख ३० हजार ७५० रुपयांचा मुद्देमाल जप्त केला असून एका तस्कराला अटक केली आहे. पिंपरी-चिंचवड आयुक्तालय हद्दीत अंमली पदार्थांची विक्री व वाहतूक रोखण्यासाठी पोलीस आयुक्त विनयकुमार चौबे यांच्या आदेशानुसार अंमली पदार्थ विरोधी पथकाकडून गस्त (पेट्रोलिंग) घातली जात आहे. गुन्हे शाखेचे पोलीस उप आयुक्त प्रदीप जाधव व सहाय्यक पोलीस आयुक्त प्रवीण मोरे यांच्या मार्गदर्शनाखाली पथके तैनात करण्यात आली आहेत.

दि. २७ मे २०२६ रोजी सायंकाळी ६.१० वाजण्याच्या सुमारास, अंमली पदार्थ विरोधी पथकाचे पोलीस अंमलदार सदानंद रुद्राक्षे आणि गोविंद डोके हे थेरगाव परिसरात गस्त घालत होते. यावेळी थेरगाव स्मशानभूमी जवळील लाकूड वखारीच्या शेजारी, गोपाळ जगताप यांच्या घरासमोर त्यांना एम.एच.१४/एन.जे./४१७० (MH-14-NJ-4170) या मोपेड गाडीवर एका इसम संशयास्पदरीत्या थांबलेला आढळला. पोलिसांना पाहताच त्याची धावपळ उडाली. यावर पोलिसांनी तत्परतेने त्याला जागच्या जागी पकडले आणि त्याच्या गाडीची झडती घेतली. पोलिसांनी केलेल्या कसून चौकशीत व झडतीमध्ये त्याच्याकडे मोठ्या प्रमाणावर गांजा आढळून आला. अटक करण्यात आलेल्या आरोपीचे नाव खालीलप्रमाणे आहे:

• अशोक संतोष आडवाणी (वय २८ वर्षे, रा. पवनेश्वर कॉलनी, थेरगाव गावठाण, पुणे. मूळ पत्ता: भारत नगर झोपडपट्टी, पिंपरी रेल्वे स्टेशनजवळ, पिंपरी, पुणे).

आरोपी अशोक आडवाणी याच्या ताब्यातून पोलिसांनी खालील मुद्देमाल जप्त केला आहे: १) ३ किलो ९१५ ग्रॅम गांजा (अंमली पदार्थ) २) १ मोपेड दुचाकी (MH-14-NJ-4170) ३) १ मोबाईल फोन या एकूण जप्त केलेल्या मुद्देमालाची बाजारातील किंमत ३,३०,७५०/- रुपये आहे.

याप्रकरणी आरोपीविरुद्ध काळेवाडी पोलीस ठाण्यात अंमली पदार्थ विरोधी कायदा (NDPS Act) कलम ८ (क), २० (ब) (ii) (ब) आणि २९ अन्वये गुन्हा दाखल करण्यात आला आहे. पुढील तपास काळेवाडी पोलीस ठाण्याचे सहाय्यक पोलीस निरीक्षक (API) चव्हाण करत आहेत. सदरची कारवाई पोलीस आयुक्त विनयकुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त सारंग आवाड, पोलीस उप आयुक्त (गुन्हे) प्रदीप जाधव आणि सहाय्यक पोलीस आयुक्त प्रवीण मोरे यांच्या मार्गदर्शनाखाली यशस्वीरित्या पार पडली.

या धडक कारवाईत अंमली पदार्थ विरोधी पथकाचे वरिष्ठ पोलीस निरीक्षक महेश पाटील, सहाय्यक पोलीस निरीक्षक स्वप्निल चव्हाण, पोलीस उपनिरीक्षक जिलानी मोमीन, महिला पोलीस हवालदार सुषमा पाटील, पोलीस अंमलदार सदानंद रुद्राक्षे, गोविंद डोके, कपिलेश इगवे आणि सुभाष गुरव यांच्या पथकाने महत्त्वाची भूमिका बजावली. या कारवाईच्या तांत्रिक विश्लेषणात पोलीस अंमलदार सुभाष गुरव यांनी महत्त्वाची मदत केली. पिंपरी-चिंचवड पोलिसांनी शहरातील नागरिकांना आवाहन केले आहे की, परिसरात कोठेही अमली पदार्थांचा व्यवहार होत असल्याचे आढळल्यास तात्काळ माहिती द्यावी.

• अंमली पदार्थ विरोधी पथक, पिंपरी चिंचवड: ८६००००२३२०
• पोलीस राष्ट्रीय हेल्पलाईन: ११२
• केंद्रीय ‘मानस’ हेल्पलाईन: १९३३ (infoncbmanas@gov.in)

© २०२६ मॅक्स मंथन डेली न्यूज. सर्व हक्क राखीव.