4
महापौर रवि लांडगे यांच्या हस्ते १६ व्या हॉकी इंडिया ज्युनियर महिला राष्ट्रीय अजिंक्यपद स्पर्धेचे शानदार उद्घाटन!
पिंपरी चिंचवड प्रतिनिधी लक्ष्मण प्रधान, दि. १२ ऑगस्ट २०२६ मॅक्स मंथन डेली न्यूज:
पिंपरी-चिंचवड: पिंपरी-चिंचवड शहरात आयोजित १६ व्या हॉकी इंडिया ज्युनियर महिला राष्ट्रीय अजिंक्यपद स्पर्धा २०२६ चे शानदार उद्घाटन पिंपरी-चिंचवड महानगरपालिकेचे महापौर रवि लांडगे यांच्या हस्ते उत्साही वातावरणात पार पडले. देशभरातील विविध राज्यांतून सहभागी झालेल्या युवा महिला हॉकीपटूंच्या उपस्थितीमुळे उद्योगनगरीत मोठा उत्साह आणि क्रीडामय वातावरण निर्माण झाले आहे.
राष्ट्रीय स्तरावरील या प्रतिष्ठेच्या स्पर्धेत देशाच्या सर्वच कोनांतून आलेल्या युवा महिला खेळाडू आपले क्रीडाकौशल्य पणाला लावणार आहेत. या स्पर्धेच्या माध्यमातून खेळाडूंना राष्ट्रीय स्तरावर स्वतःची गुणवत्ता सिद्ध करण्याची आणि भविष्यातील आंतरराष्ट्रीय स्पर्धांसाठी आवश्यक अनुभव मिळवण्याची मोठी संधी उपलब्ध झाली आहे.
या भव्य उद्घाटन सोहळ्यास अतिरिक्त पोलीस महासंचालक कृष्ण प्रकाश, महापालिका आयुक्त डॉ. विजय सूर्यवंशी, कला, क्रीडा व सांस्कृतिक समितीचे सभापती कैलास कुटे, पुणे वस्तू व सेवा कर (GST) विभागाचे मुख्य आयुक्त नीरज बन्सल, भारतीय स्टेट बँकेचे मुख्य महाव्यवस्थापक नंदकिशोर सिंह, उपमहाव्यवस्थापक मनोज कुमार टाक, संजीव कुमार यांच्यासह हॉकी क्षेत्रातील विविध पदाधिकारी, प्रशिक्षक, खेळाडू आणि नागरिक मोठ्या संख्येने उपस्थित होते.
पिंपरी-चिंचवड शहराची ओळख एक सक्षम ‘स्पोर्ट्स सिटी’ म्हणून अधिक मजबूत करण्यासाठी महापालिकेकडून दर्जेदार पायाभूत सुविधा, आधुनिक प्रशिक्षण आणि खेळाडूंना पोषक वातावरण उपलब्ध करून देण्यावर विशेष भर दिला जात आहे.
“हॉकी हा भारताच्या गौरवशाली क्रीडा परंपरेचा मानबिंदू आणि अभिमान आहे. १६ व्या हॉकी इंडिया ज्युनियर महिला राष्ट्रीय अजिंक्यपद स्पर्धेचे यजमानपद पिंपरी-चिंचवडला मिळाले, याचा आम्हाला सार्थ अभिमान आहे. देशभरातून आलेल्या युवा महिला खेळाडूंना स्वतःला सिद्ध करण्याची ही मोठी संधी आहे. महिला खेळाडूंना दर्जेदार व्यासपीठ उपलब्ध करून देण्याबरोबरच शहराची क्रीडा संस्कृती अधिक बळकट करण्यासाठी महापालिका सर्वतोपरी प्रयत्न करत राहील. स्पर्धेत सहभागी सर्व खेळाडूंना माझ्या मनःपूर्वक शुभेच्छा!”— रवि लांडगे, महापौर (पिंपरी-चिंचवड महानगरपालिका)
या राष्ट्रीय स्पर्धेच्या यशस्वी आयोजनामुळे पिंपरी-चिंचवड शहराच्या क्रीडा क्षेत्रातील योगदानाला अधिक बळ मिळणार असून, भविष्यात राष्ट्रीय व आंतरराष्ट्रीय स्तरावर चमकणारे खेळाडू घडवण्यास मोठी चालना मिळणार आहे.
© २०२६ मॅक्स मंथन डेली न्यूज. सर्व हक्क राखीव.
