पिंपरी चिंचवड: स्वातंत्र्याचा अमृत महोत्सवांतर्गत केंद्र व राज्य शासनाच्या सूचनेनुसार पिंपरी-चिंचवड शहरात ९ ते १७ ऑगस्ट २०२६ या कालावधीत ‘हर घर तिरंगा’ मोहीम राबवण्यात येत आहे. या मोहिमेअंतर्गत विविध देशभक्तीपर आणि सांस्कृतिक उपक्रम यशस्वीपणे राबवण्यासाठी अपेक्षित असलेल्या ₹२१ लाख (+ GST) खर्चास पिंपरी-चिंचवड महानगरपालिकेच्या स्थायी समितीच्या साप्ताहिक सभेत मंजुरी देण्यात आली आहे.

नगरपरिषद प्रशासन संचालनालयाच्या २७ जुलै २०२६ च्या पत्रानुसार सर्व नागरी स्थानिक स्वराज्य संस्थांना केंद्र व राज्य शासनाच्या मार्गदर्शक सूचनांचे पालन करून तात्काळ नियोजन करण्याचे निर्देश देण्यात आले होते. उपक्रम अत्यंत वेळेत राबवायचा असल्याने या कामी येणारा खर्च कोटेशन अथवा थेट पद्धतीने करण्यास मान्यता देण्यात आली आहे.

मागील वर्षी पिंपरी-चिंचवड महानगरपालिकेच्या वतीने ‘हर घर तिरंगा’ उपक्रमासाठी ₹१६,५०,०००/- इतका खर्च झाला होता. यावर्षी उपक्रमांची व्याप्ती वाढल्यामुळे आणि विविध सेलिब्रिटींच्या हजेरीसह भव्य प्रसिद्धी उपक्रम आखल्यामुळे अपेक्षित खर्च ₹२१ लाख निश्चित करण्यात आला असून प्रत्यक्ष कामाच्या स्वरूपानुसार यामध्ये वाढ किंवा घट होऊ शकते.

शहरातील सार्वजनिक जागा, रेल्वे स्थानके, शासकीय इमारतींवर तिरंगा प्रदर्शन भरवण्यात येणार असून संपूर्ण शहरात देशभक्तीचे वातावरण निर्माण करण्यासाठी मनपा प्रशासनाने कंबर कसली आहे.