पिंपरी: कधी शब्दांतून फुलणारे प्रेम, कधी मिश्कील ओळींतून उमटणारा हास्याचा खळखळाट, तर कधी आईच्या आठवणीने मनाच्या कोपऱ्यात दाटून येणारी हुरहूर… कवितेच्या अशा विविध भावछटांनी सजलेली मैफल म्हणजे ‘द मनमौजी’. प्रसिद्ध कवी आणि गीतकार वैभव जोशी यांच्या शब्दांनी, सादरीकरणाने आणि मनमोकळ्या संवादाने चिंचवड येथील प्रा. रामकृष्ण मोरे प्रेक्षागृहात रंगलेल्या या कार्यक्रमाने रसिकांना कधी हसवले, कधी प्रेमाच्या तरल भावविश्वात रमवले, तर कधी भावुक केले. पिंपरी-चिंचवड महानगरपालिकेच्या वतीने आयोजित ‘अभिजात मराठी भाषा सप्ताहा’च्या सहाव्या दिवशी या बहारदार कार्यक्रमाचे आयोजन करण्यात आले होते.

वैभव जोशी यांनी आपल्या विविध रचनांमधून प्रेम, सौंदर्य, निसर्ग, मानवी स्वभाव, आयुष्यातील गमतीजमती आणि आईविषयीचे प्रेम अशा विविध विषयांना स्पर्श केला. त्यांच्या सादरीकरणातील सहजता, शब्दांमधील लय आणि आशयातील विविधता यामुळे संपूर्ण मैफल उत्तरोत्तर रंगत गेली.

कार्यक्रमात काही रचनांनी आपल्या मिश्कील शैलीतून रसिकांना खळखळून हसवले. “एक पेग म्हणता म्हणता दोन-चार झाले, सशासारखे जिने एकदम पाणीदार झाले” अशा ओळींमधून त्यांनी मानवी स्वभावातील गमतीशीर पैलू प्रभावीपणे उलगडले.

त्याचप्रमाणे, “तिला पाहून सळसळत्या वनाची आठवण येते…” आणि “तिच्या गंधाळण्याने चंदनाची आठवण येते…” अशा निसर्गप्रतिमांनी नटलेल्या ओळींमधून प्रिय व्यक्तीच्या सौंदर्याचे सुरेख चित्र उभे राहिले. वैभव जोशी यांची अत्यंत लोकप्रिय रचना ‘मन तुझे जलतरंग, लहरी तुझा साज’ या कवितेला प्रेक्षकांनी टाळ्यांच्या गजर करत उत्स्फूर्त दाद दिली.

मैफलीतील सर्वाधिक भावस्पर्शी क्षण ठरला तो म्हणजे आईविषयीच्या कवितेचा. “आयुष्याला घाबरण्याचा स्वभाव नाही आई, तुझ्याविना जगण्याचा सराव नाही आई…” या ओळींमधून आईचे आयुष्यातील महत्त्व आणि तिच्या सहवासातून मिळणारे बळ अत्यंत हळव्या शब्दांत व्यक्त झाले. या कवितेने उपस्थित रसिकांच्या डोळ्यांच्या कडा अतिशय भावुकतेने विनाविलंब ओलावल्या.

‘चांगभलं’ या सांगीतिक कार्यक्रमातून मराठी संगीत, लोकसंस्कृती आणि परंपरेचे विविध रंग उलगडले. महाराष्ट्राच्या सांस्कृतिक जीवनाशी नाते सांगणाऱ्या या कार्यक्रमाने रसिकांना मराठीपणाचा सुरेल आनंद दिला. गझलेचे साहित्यिक सौंदर्य आणि तिची रचनापद्धती समजून घेण्याची संधी या विशेष वर्गातून मिळाली. शब्दांच्या अर्थछटा आणि त्यातून व्यक्त होणाऱ्या भावनांचा आस्वाद गझलप्रेमींनी घेतला.  दिग्गज गायकांच्या सुरेल आवाजात मराठी संगीताचे विविध पैलू आणि लोकप्रिय गीतांचा ठेवा रसिकांसमोर सादर झाला.’सूर नवा ध्यास नवा’ फेम विनल देशमुख, वर्षा एखंडे आणि ‘इंडियन आयडल मराठी’ फेम अश्विनी मिटे यांच्या सुमधुर स्वरांनी तसेच महिला वाद्यवृंदाच्या दमदार सादरीकरणाने नवपिढीची ऊर्जा प्रेक्षकांपर्यंत पोहोचवली.

अभिजात मराठी भाषा सप्ताहाच्या निमित्ताने आयोजित या सर्व उपक्रमांमुळे पिंपरी-चिंचवडमधील रसिकांना मराठी भाषेच्या समृद्ध शब्दवैभवाची आणि संगीताची अप्रतिम पर्वणी अनुभवायला मिळाली.