पिंपरी चिंचवड: निगडी येथील अमरधाम स्मशानभूमी परिसर सध्या ठेकेदाराचा मनमानी कारभार, कर्मचाऱ्यांचा उद्धटपणा आणि प्रशासकीय दुर्लक्षामुळे वादाच्या भोवऱ्यात सापडला आहे. स्मशानभूमीच्या विद्युत दाहिनीच्या मुख्य प्रवेशद्वारासमोरच अधिकारी आणि कर्मचाऱ्यांची वाहने थेट पार्क केली जात असून, त्यामुळे अंत्यसंस्कारासाठी येणाऱ्या नागरिकांना मृतदेह लोखंडी जिन्यावरून वाहून नेताना मोठ्या अडथळ्यांना सामोरे जावे लागत आहे. या अत्यंत गंभीर व संवेदनशील प्रकाराची तात्काळ दखल घेत भारतीय जनता पार्टीचे निष्ठावंत कार्यकर्ते व सामाजिक कार्यकर्ते सचिन काळभोर यांनी पिंपरी-चिंचवड महानगरपालिकेचे आयुक्त डॉ. विजय सूर्यवंशी यांच्याकडे ईमेलद्वारे अधिकृत तक्रार दाखल करून कडक कारवाईची जोरदार मागणी केली आहे.

सचिन काळभोर यांनी प्रशासनाच्या निदर्शनास आणून दिले आहे की, दुःखाच्या प्रसंगी अंत्यसंस्कारासाठी येणाऱ्या शोकाकुल नागरिकांना या ठिकाणी अत्यंत अपमानास्पद आणि भयानक परिस्थितीचा सामना करावा लागत आहे. स्मशानभूमीत कार्यरत कर्मचारी व अधिकारी मद्यपान करून उद्धट वर्तन करत असून थेट स्मशानभूमीच्या आवारातच दारूच्या पार्ट्या आणि धिंगाणा घातला जात असल्याचा खळबळजनक आरोप त्यांनी केला आहे.

त्याहूनही गंभीर बाब म्हणजे, आपल्या आप्तांचा अंतिम संस्कार करण्यासाठी आलेल्या नागरिकांकडून अंत्यसंस्काराच्या कामासाठी बेकायदेशीरपणे आर्थिक रकमेची मागणी उघडपणे केली जात आहे. या प्रकारामुळे नागरिकांमध्ये तीव्र संतापाची लाट उसळली आहे.

सर्वसामान्यांच्या अडीअडचणींना नेहमीच धावून जाणारे सामाजिक कार्यकर्ते सचिन काळभोर यांनी या गंभीर समस्येवर तात्काळ तोडगा काढण्यासाठी पुढाकार घेतला आहे. आयुक्तांना पाठवलेल्या तक्रारीत त्यांनी  प्रमुख मागण्या केल्या आहेत.  स्मशानभूमीत नागरिकांची पिळवणूक करणाऱ्या आणि दारूच्या पार्ट्या चालवणाऱ्या संबंधित ठेकेदाराचा ठेका रद्द करून त्याच्यावर कडक कारवाई करण्यात यावी. विद्युत दाहिनीच्या मुख्य प्रवेशद्वारासमोर गाड्या पार्क करणाऱ्या अधिकारी व कर्मचाऱ्यांवर दंडात्मक व शिस्तभंगाची कारवाई केली जावी.  मद्यपान करून नागरिकांशी उद्धट वर्तन करणाऱ्या कर्मचारी व कर्तव्यदक्षतेत अपयशी ठरलेल्या सुरक्षा रक्षकांना तात्काळ सेवेतून निलंबित करण्यात यावे.

नागरिकांच्या दुःखाचा आणि भावनावश परिस्थितीचा फायदा घेणाऱ्यांविरोधात सचिन काळभोर यांनी घेतलेल्या या कणखर भूमिकेचे निगडी व पिंपरी-चिंचवड शहरातील नागरिकांकडून मनापासून कौतुक केले जात आहे. जनसामान्यांच्या प्रश्नांवर नेहमीच तत्परतेने धावून जाणाऱ्या काळभोर यांच्या या धडक पाठपुराव्यामुळे स्मशानभूमीतील गैरप्रकारांना चाप बसून नागरिकांना न्याय मिळेल, असा विश्वास व्यक्त केला जात आहे.