पिंपरी चिंचवड: “प्रत्येक हाताला काम आणि प्रत्येक कुटुंबाला रोजगाराची संधी” हे ब्रीदवाक्य उराशी बाळगून मावळ लोकसभेचे संसद रत्न खासदार श्रीरंग आप्पा बारणे यांच्या मार्गदर्शनाखाली चिंचवड येथील चिंचवडे लॉन्स येथे रविवार, दि. ३० ऑगस्ट २०२६ रोजी सकाळी भव्य नोकरी मेळाव्याचे आयोजन करण्यात आले आहे.

या मेळाव्याचे नियोजन शिवसेना उपनेत्या व नगरसेविका सुलभाताई उबाळे आणि पिंपरी-चिंचवड महानगरपालिकेचे गटनेते व नगरसेवक विश्वजीत बारणे यांनी केले असून, ‘युवा हब स्किल मॅनेजमेंट प्रायव्हेट लिमिटेड’चे संचालक दिपक पवार व किरण रहाणे यांचे या कामी विशेष सहकार्य लाभले आहे.

या नोकरी मेळाव्यात बँकिंग, आयटी, आयटीआय, बीपीओ, केपीओ, रिअल इस्टेट, मॅन्युफॅक्चरिंग, ऑटोमोबाईल आणि टेक्नॉलॉजी यांसारख्या विविध क्षेत्रांतील बहुराष्ट्रीय आणि नामांकित कंपन्या सहभागी होणार आहेत. यामध्ये प्रामुख्याने अ‍ॅक्सिस बँक, आयसीआयसीआय बँक, टाटा मोटर्स, बजाज, ह्युंदाई, हुडास टेक्नॉलॉजी, विगल स्पेस, डॉ. रेड्डीज फाउंडेशन, बीव्हीजी इंडिया यांसारख्या दिग्गज कंपन्यांचा समावेश आहे. या मेळाव्याचे मुख्य वैशिष्ट्य म्हणजे ५ वी पास उमेदवारांपासून ते आयटीआय (ITI), डिप्लोमा, पदवीधर, इंजिनिअरिंग तसेच इतर उच्चशिक्षित उमेदवारांना त्यांच्या शैक्षणिक पात्रता आणि कौशल्यानुसार थेट रोजगाराच्या संधी मिळणार आहेत.

 या मेळाव्यात दिव्यांग उमेदवारांसाठी विशेष सहभागाची व्यवस्था करण्यात आली असून, त्यांच्या क्षमता व शैक्षणिक पात्रतेनुसार योग्य रोजगाराच्या संधी उपलब्ध करून दिल्या जातील. नोकरीच्या शोधात असलेल्या महिलांना स्वयंरोजगार, उद्योजकता, कौशल्य विकास आणि स्वतःचा व्यवसाय कसा उभारावा, याचे विशेष प्रशिक्षण व मार्गदर्शन देऊन त्यांना आर्थिकदृष्ट्या सक्षम केले जाणार आहे. मेळाव्यात सहभागी झालेल्या प्रत्येक उमेदवाराला रोजगाराच्या संधीशी जोडण्याचा ध्यास आयोजकांनी घेतला आहे. ज्या उमेदवारांना मेळाव्याच्या दिवशी थेट नोकरी मिळणार नाही, त्यांना ‘खासदार शिवसेना जॉब कार्ड’ देण्यात येईल.

या जॉब कार्डद्वारे उमेदवारांची शैक्षणिक पात्रता, कौशल्ये व रोजगाराची गरज यांची संपूर्ण माहिती संकलित केली जाईल. सोमवारपासून उपलब्ध संधींनुसार उमेदवारांना मेसेजद्वारे (SMS/WhatsApp) थेट माहिती पाठवली जाईल. त्यामुळे हा मेळावा केवळ एका दिवसापुरता मर्यादित न राहता भविष्यातील रोजगाराची दार उघडी करणारा ठरणार आहे.

पिंपरी-चिंचवड, मावळ व परिसरातील जास्तीत जास्त बेरोजगार युवक-युवती, महिला, दिव्यांग बांधव आणि रोजगाराच्या शोधात असलेल्या उमेदवारांनी ३० ऑगस्ट २०२६ रोजी चिंचवडे लॉन्स अँड बँक्वेट्स हॉल येथे होणाऱ्या या भव्य नोकरी मेळाव्यात मोठ्या संख्येने सहभागी होऊन उपलब्ध संधींचा लाभ घ्यावा, असे आवाहन आयोजकांच्या वतीने करण्यात आले आहे.