पिंपरी: “तंत्रज्ञान बदलले, संवादाची साधने बदलली; पण टपाल कर्मचाऱ्यांची सेवाभावना आणि कर्तव्यनिष्ठा आजही कायम आहे. आजच्या डिजिटल युगात व्हॉट्सॲप, ई-मेलच्या माध्यमातून अवघ्या काही सेकंदांत निरोप पोहोचत असले, तरी टपाल खात्याची विश्वासार्हता आणि पोस्टमनचे नागरिकांशी असलेले जिव्हाळ्याचे नाते आजही अढळ आहे,” असे प्रतिपादन प्रसिद्ध कामगार नेते काशिनाथ नखाते यांनी केले.

‘जागतिक टपाल दिना’चे औचित्य साधून पिंपरी-चिंचवड परिसरातील प्रामाणिक आणि कष्टाळू टपाल कर्मचारी तसेच पोस्टमन बांधवांचा निगडी प्राधिकरणात महासंघाच्या वतीने शाल, श्रीफळ आणि मिठाई देऊन विशेष गौरव करण्यात आला. त्या वेळी नखाते बोलत होते.

कामगार नेते काशिनाथ नखाते पुढे म्हणाले की, “लाल रंगाची टपालपेटी आणि खाकी वर्दीतील पोस्टमन यांचे नाते भारतीय समाजजीवनात विसरणे अशक्य आहे. ऊन, वारा आणि पावसाची तमा न बाळगता प्रत्येक घरापर्यंत पत्रे, पार्सल आणि महत्त्वाच्या शासकीय सेवांशी संबंधित कागदपत्रे पोहोचविण्याचे काम पोस्टमन बांधव अत्यंत निष्ठेने करत आहेत. अगदी कोरोनाच्या अत्यंत कठीण काळातही स्वतःच्या आरोग्याची पर्वा न करता त्यांनी जनतेला अविरत सेवा दिली. या समर्पित कार्याचा सन्मान करणे ही समाजाची मोठी नैतिक जबाबदारी आहे.”

या सन्मान सोहळ्याबद्दल टपाल कर्मचाऱ्यांनी कष्टकरी कामगार महासंघाचे मनापासून आभार मानले. या प्रसंगी उप पोस्ट मास्तर कृष्णकुमार केंगार, टपाल सहाय्यक रूपाली वाडेकर, महासंघाचे सहदेव होनमाने, इरफान चौधरी, मनोज यादव, तसेच पोस्टमन शीतल नागवे, अश्विनी जाधव, वर्षा सुभे, अनंत जाधव, सर्जेराव ठोंबरे, संतोष चव्हाण, संदेश गायकवाड, अमृत वाघमारे, घनश्याम पाटील, वैशाली कोल्हे, दत्तात्रय जाधव, बापू डोळसे व लीना बेगमपुरे आदी पदाधिकारी व पोस्ट कर्मचारी मोठ्या संख्येने उपस्थित होते.