पिंपरी चिंचवड: शालेय विद्यार्थ्यांच्या आरोग्याचे रक्षण करण्यासाठी महाराष्ट्र अन्न व औषध प्रशासनाने (FDA) राज्यातील सर्व शाळांच्या आवारात आणि ५० मीटर परिघात जंकफूडच्या (Junk Food) विक्रीवर, मोफत वाटपावर आणि जाहिरातींवर पूर्णपणे बंदी घातली आहे. मात्र, पिंपरी-चिंचवड शहरातील चित्र पाहिले तर या सरकारी नियमांना पार हरताळ फासला गेल्याचे दिसत आहे. शहरातील नामांकित शाळांच्या प्रवेशद्वाराजवळच अस्वच्छ आणि आरोग्यास अपायकारक खाद्यपदार्थांची उघडपणे विक्री सुरू असून, महापालिका आणि एफडीएच्या (FDA) अक्षम्य दुर्लक्षामुळे विद्यार्थ्यांच्या आरोग्याचा प्रश्न अत्यंत ऐरणीवर आला आहे.

शाळा सुटण्याच्या वेळेस प्रवेशद्वाराजवळ आणि ५० मीटरच्या परिघात छोटे स्टॉल, हातगाड्या आणि फिरते विक्रेते गर्दी करतात. विद्यार्थ्यांना पौष्टिक आहाराची सवय लागावी म्हणून पालक व शिक्षक प्रयत्न करत असताना, शाळेच्या बाहेर पडताच कमी पोषणमूल्य असलेले पदार्थ सहज उपलब्ध होत आहेत. शाळांच्या आसपास असणाऱ्या लहान-मोठ्या दुकानांमध्ये आणि टपऱ्यांवरही प्रक्रिया केलेले (Processed Food) व अतिसाखर/मीठ असलेले पदार्थ विकले जात आहेत. वेफर्स, चिप्स, कुरकुरे व फ्रेंच फ्राईज, पेस्ट्री, बिस्किटे, केक व बेकरी उत्पादने, चॉकलेट, मिठाई व अति-साखरयुक्त पदार्थ, शीतपेये (Carbonated Soft Drinks) व कृत्रिम ज्यूस, जास्त मीठ, साखर व चरबीयुक्त प्रक्रिया केलेले स्नॅक्स. लहान वयातच जंकफूडची सवय लागल्यामुळे मुलांमध्ये भविष्यात लठ्ठपणा, मधुमेह, पचनाचे विकार आणि जीवनशैलीशी संबंधित इतर गंभीर आजारांचा धोका मोठ्या प्रमाणावर वाढतो. केवळ बंदीचे कागदी आदेश काढून जबाबदारी संपत नाही, तर प्रत्यक्ष मैदानावर उतरून कडक अंमलबजावणी करणे गरजेचे आहे.

पिंपरी-चिंचवड शहरातील हजारो विद्यार्थ्यांचे आरोग्य सुरक्षित ठेवण्यासाठी पिंपरी-चिंचवड महानगरपालिकेचा आरोग्य/अतिक्रमण विभाग आणि राज्य अन्न व औषध प्रशासन (FDA) यांनी परस्परांवर जबाबदारी ढकलणे थांबवले पाहिजे.

दोन्ही यंत्रणांनी तातडीने संयुक्त पथके (Joint Task Force) स्थापन करून शाळांच्या परिसराची नियमित पाहणी करावी. नियमांचे उल्लंघन करून जंकफूड विकणाऱ्या दुकानदारांवर, हातगाड्यांवर आणि बेकायदेशीर टपऱ्यांवर धडक जप्ती व दंडात्मक कारवाई करावी, अशी जोरदार मागणी शहरातील पालकवर्गातून केली जात आहे.