पिंपरी: पिंपरी चिंचवड महानगरपालिका आणि जिल्हा क्रीडा परिषद यांच्या संयुक्त विद्यमाने आयोजित सन २०२६ च्या शालेय खो-खो स्पर्धेचा भव्य उद्घाटन सोहळा काल, ५ ऑक्टोबर २०२६ रोजी उत्साहात पार पडला. या स्पर्धेत १४ वर्षांखालील मुलांच्या गटात तब्बल १४८ संघांनी उत्स्फूर्त सहभाग नोंदवला आहे. जापान येथे झालेल्या आशियाई स्पर्धेत आर्चरी (धनुर्विद्या) या क्रीडा प्रकारात सुवर्णपदक विजेती पृशिका प्रदीप हिच्या प्रमुख उपस्थितीत या स्पर्धेचे उद्घाटन करण्यात आले.

या प्रसंगी पुणे विभागीय क्रीडा उपसंचालक युवराज नाईक, पुणे जिल्हा क्रीडा अधिकारी जगन्नाथ लकडे, पिंपरी चिंचवड महानगरपालिकेच्या क्रीडा विभागाचे उपायुक्त पंकज पाटील, सुवर्णपदक विजेत्या खेळाडूचे प्रशिक्षक कुणाल तावरे, इंग्लिश मीडियम स्कूल एस. एस. पी. शिक्षण संस्थेचे अध्यक्ष एस. बी. पाटील, संस्थेचे सहसंचालक सुनील शेवाळे, क्रीडा अधिकारी दीपक कन्हेरे, क्रीडा मार्गदर्शक सिरीन गोडबोले, निवृत्ती काळभोर, क्रीडा पर्यवेक्षक अरुण कडूस आणि सुनिता पालवे आदी मान्यवर उपस्थित होते. या सोहळ्याचे उत्कृष्ट सूत्रसंचालन कुमार कटके यांनी केले, तर उपस्थितांचे आभार रवींद्र गारगोटे यांनी मानले.

१) भोसरी मुले विरुद्ध एम. एस. एस. हायस्कूल चिंचवड– भोसरी मुलांच्या संघाने एम. एस. एस. हायस्कूल चिंचवड संघाचा १०-०२ अशा मोठ्या फरकाने पराभव करत दणदणीत विजय मिळवला.

२) श्रमिक नगर क्रमांक ९४ विरुद्ध स्वामी समर्थ सीबीएसई– श्रमिक नगर क्रमांक ९४ संघाने अत्यंत चुरशीच्या सामन्यात स्वामी समर्थ सीबीएसई संघाचा ८-५ असा पराभव केला.

३) गुरु गणेश विरुद्ध विद्यानिकेतन इंग्लिश मीडियम स्कूल– गुरु गणेश संघाने उत्कृष्ट खेळाचे प्रदर्शन करत विद्यानिकेतन इंग्लिश मीडियम स्कूलवर विजय संपादन केला.