मुंबई: बॉयलर उद्योगातील सुरक्षितता, आधुनिक तंत्रज्ञान, कौशल्य विकास आणि उद्योगस्नेही व्यवस्था अधिक सक्षम करण्यासाठी राज्य शासन कटिबद्ध आहे. ‘बॉयलर इंडिया २०२६’ च्या माध्यमातून या क्षेत्रातील उत्पादक, उद्योजक, तज्ज्ञ, अभियंते, ऑपरेटर आणि ग्राहकांना एकाच व्यासपीठावर आणून तंत्रज्ञान व ज्ञानाच्या देवाणघेवाणीला मोठी चालना मिळत आहे, असे प्रतिपादन राज्याचे कामगार मंत्री ॲड. आकाश फुंडकर यांनी केले.

नवी मुंबईतील वाशी येथील सिडको प्रदर्शन केंद्रात कामगार विभाग, बाष्पके संचालनालयाच्या वतीने आयोजित ‘बॉयलर इंडिया २०२६’ या तीन दिवसीय आंतरराष्ट्रीय प्रदर्शनाचे, कार्यशाळेचे व चर्चासत्राचे उद्घाटन मंत्री ॲड. आकाश फुंडकर यांच्या हस्ते पार पडले. त्याप्रसंगी ते बोलत होते.

या सोहळ्यास वस्त्रोद्योग मंत्री संजय सावकारे, नवी मुंबईच्या महापौर सुजाता पाटील, कामगार विभागाच्या अपर मुख्य सचिव आय. ए. कुंदन, विकास आयुक्त (असंघटीत कामगार) सुशिल खोडवेकर, केंद्रीय बाष्पके मंडळाचे सचिव संदीप कुंभार आणि बाष्पके संचालनालयाचे संचालक संदीप चिवटे यांची प्रमुख उपस्थिती होती.

कामगार मंत्री ॲड. फुंडकर म्हणाले की, ऊर्जा निर्मिती, साखर, वस्त्रोद्योग, रसायने, अन्नप्रक्रिया, औषधनिर्मिती आणि रिफायनरीज यांसारख्या प्रमुख उद्योगांमध्ये बॉयलर हा कणा आहे. त्यामुळे कामगारांची सुरक्षितता (‘Safety First’) ही केवळ घोषणा न राहता प्रत्यक्ष कार्यपद्धती झाली पाहिजे.

 बॉयलर क्षेत्रात अपघात घडण्यापूर्वीच बिघाडाची शक्यता ओळखून प्रतिबंधात्मक उपाययोजना करण्यासाठी एआय तंत्रज्ञानाचा वापर करण्यावर भर दिला जावा. बॉयलर क्षेत्रासाठी नागपूर येथे कौशल्य विकास केंद्र सुरू करण्यात येत असून, त्याचे रूपांतर बॉयलर कौशल्य, वेल्डिंग, तपासणी आणि औद्योगिक सुरक्षिततेसाठीच्या ‘सेंटर ऑफ एक्सलन्स’मध्ये केले जाईल. यामुळे राज्यातील हजारो युवकांना रोजगाराच्या संधी मिळतील.  शासनाच्या १५० दिवसांच्या कार्यक्रमांतर्गत बॉयलर संचालनालयाने ई-गव्हर्नन्स सेवांमध्ये ६८ विभागांमध्ये चौथा क्रमांक पटकावल्याबद्दल त्यांनी संचालनालयाचे कौतुक केले.

वस्त्रोद्योग मंत्री संजय सावकारे यांनी स्पष्ट केले की, प्लेट रोलिंग, वेल्डिंग, हायड्रो व शेल टेस्टिंग यांसारख्या प्रत्येक प्रक्रियेत निर्धारित तांत्रिक मानकांचे काटेकोर पालन आवश्यक आहे. ‘बॉयलर इंडिया’मुळे उत्पादक आणि ग्राहकांना नवीन व्यवसायाच्या संधी उपलब्ध होत आहेत.

कामगार विभागाच्या अपर मुख्य सचिव आय. ए. कुंदन यांनी सांगितले की, प्रदर्शनाच्या यंदाच्या चौथ्या आवृत्तीत देश-विदेशातील सुमारे २४६ प्रदर्शकांनी सहभाग नोंदवला असून हरित ऊर्जा व कार्बन उत्सर्जन कमी करण्यात बॉयलरची भूमिका महत्त्वाची ठरत आहे.

या कार्यक्रमादरम्यान उपस्थित मान्यवरांनी आणि उपस्थितांनी नुकतेच निधन झालेले ज्येष्ठ अभिनेते नाना पाटेकर यांना भावपूर्ण श्रद्धांजली अर्पण केली. यानंतर मान्यवरांच्या हस्ते बॉयलर तंत्रज्ञान व सुरक्षा नियमांवरील माहितीपुस्तिकांचे विमोचन करण्यात आले व प्रदर्शनातील विविध स्टॉल्सची पाहणी करण्यात आली.