सोलापूर (पंडित गवळी, मॅक्स मंथन डेली न्यूज, विशेष): अमर पाटील यांची शिवसेना जिल्हाप्रमुखपदी निवड! दक्षिण सोलापूर आणि अक्कलकोटमध्ये शिवसेनेचा भगवा फडकवण्याचा निर्धार!
अमर रतिकांत पाटील यांची शिवसेना (एकनाथ शिंदे गट) पक्षाच्या सोलापूर जिल्हाप्रमुखपदी निवड झाली आहे. मुंबईतील शिवसेना भवनात पक्षाचे सचिव संजय मोरे यांच्या हस्ते त्यांना नियुक्तीपत्र देण्यात आले. या वेळी माजी मंत्री सिद्धाराम म्हेत्रे आणि संपर्कप्रमुख महेश साठे यांच्यासह अनेक प्रमुख नेते उपस्थित होते.
अमर पाटील यांचा राजकीय प्रवास
अमर पाटील हे शिवसेनेचे एक अनुभवी नेते म्हणून ओळखले जातात. नुकत्याच झालेल्या विधानसभा निवडणुकीत त्यांनी महाविकास आघाडीचे प्रतिनिधित्व केले होते. मात्र, शिवसेना (उद्धव ठाकरे गट) पक्षातील अंतर्गत गटबाजीमुळे नाराज होऊन त्यांनी शिंदे गटात प्रवेश केला. अमर पाटील यांच्या कामाची पद्धत, कार्यकर्त्यांमधील लोकप्रियता आणि त्यांनी आजपर्यंत केलेली विकास कामे लक्षात घेऊन शिवसेना नेतृत्वाने त्यांच्यावर जिल्हाप्रमुखपदाची मोठी जबाबदारी सोपवली आहे. त्यांच्याकडे दक्षिण सोलापूर आणि अक्कलकोट विधानसभा मतदारसंघाची जबाबदारी असेल.
निवडीनंतर अमर पाटील यांची प्रतिक्रिया
मुंबईतील ‘बाळासाहेब भवन’ येथे निवडपत्र स्वीकारल्यानंतर अमर पाटील यांनी कार्यकर्त्यांना संबोधित केले. ते म्हणाले, “राज्याचे उपमुख्यमंत्री एकनाथ शिंदे आणि खासदार डॉ. श्रीकांत शिंदे यांच्या आशीर्वादाने आणि शिवसेना सचिव संजय मोरे, संपर्कमंत्री प्रताप सरनाईक आणि संपर्कप्रमुख महेश साठे यांच्या सहकार्याने माझी जिल्हाप्रमुखपदी निवड झाली आहे. आगामी काळात ‘गाव तेथे शाखा, घर तिथे शिवसैनिक’ हे ध्येय घेऊन मी काम करणार आहे. तसेच, सोलापूर महानगरपालिका, जिल्हा परिषद, पंचायत समिती आणि ग्रामपंचायतीच्या निवडणुकांमध्ये शिवसेनेचा भगवा फडकवण्यासाठी प्रयत्न करेन.” उपमुख्यमंत्री एकनाथ शिंदे यांच्या माध्यमातून सोलापूर शहर, दक्षिण सोलापूर आणि अक्कलकोट तालुक्याचा विकास साधण्यासाठी आपण कटिबद्ध आहोत, असेही त्यांनी सांगितले.
या कार्यक्रमाला अक्कलकोटचे माजी आमदार आणि माजी मंत्री सिद्धाराम म्हेत्रे, बोरामणी पंचायत समितीचे माजी सदस्य धनेश आचलारे, सोलापूर शहर प्रमुख सचिन चव्हाण आणि महिला आघाडीच्या अनिता माळगे, प्रियंका परांडे, संजय कोकाटे यांच्यासह अनेक कार्यकर्ते उपस्थित होते.
