‘सरकारला दिलेला शब्द पाळा!’: अनिल देशमुखांनी मुख्यमंत्र्यांना धारेवर धरले

सरकारला दिलेला शब्द पाळा! ‘सातबारा कोरा’ कधी करणार? बच्चू कडूंच्या भेटीनंतर अनिल देशमुखांचे मुख्यमंत्री फडणवीसांना थेट आवाहन!

‘कर्जमाफीचे आश्वासन देणारेच आता शेतकऱ्यांना फसवत आहेत’, देशमुखांचा आरोप; बावनकुळे यांच्या भाषेवरही आक्षेप.

अमरावती, १३ जून २०२५ (मॅक्स मंथन डेली न्यूज): शेतकऱ्यांची कर्जमाफी, पिकांना हमीभाव यांसह विविध मागण्यांसाठी प्रहार जनशक्ती पक्षाचे अध्यक्ष तथा माजी मंत्री बच्चू कडू यांच्या अन्नत्याग आंदोलनाचा आज सहावा दिवस आहे. या आंदोलनाला भेट देत शरद पवार राष्ट्रवादी काँग्रेस पक्षाचे नेते तथा माजी गृहमंत्री अनिल देशमुख यांनी मुख्यमंत्री देवेंद्र फडणवीस यांना थेट आवाहन केले आहे. “सात महिन्यांपूर्वी झालेल्या विधानसभा निवडणुकीत मुख्यमंत्री देवेंद्र फडणवीस यांनीच आश्वासन दिले होते की, आमचं भाजप सरकार आल्यास शेतकऱ्यांचे सातबारा कोरा करू आणि कर्जमाफी देऊ. आता सरकार येऊन सात महिने झाले तरी त्यांनी आश्वासन पूर्ण केलेले नाही,” असे देशमुख यांनी म्हटले.

‘फडणवीसांनीच निर्णय घ्यावा, इतरांना विचारू नका!’

अनिल देशमुख यांनी मुख्यमंत्री फडणवीसांवर थेट निशाणा साधत म्हटले की, कर्जमाफी आणि सातबारा कोरा करण्याबाबतचा निर्णय त्यांनाच घ्यायचा आहे. फडणवीसांनीच आश्वासन दिले असल्याने उपमुख्यमंत्री अजित पवार आणि उपमुख्यमंत्री एकनाथ शिंदे यांना विचाराची आवश्यकता नाही, असेही देशमुख यांनी ठणकावले.

शेतकऱ्यांची फसवणूक: कर्जमाफी की कर्जाची वसुली?

अनिल देशमुख यांनी सरकारवर शेतकऱ्यांची फसवणूक करत असल्याचा आरोप केला. “इकडे मुख्यमंत्री देवेंद्र फडणवीस तीन-तीन वेळा म्हणतात की, कर्जमाफी देऊ आणि सातबारा कोरा करू, आणि तिकडे राज्याचे उपमुख्यमंत्री शेतकऱ्यांना सांगतात की, बँकेचे कर्जाचे पैसे ३० तारखेपर्यंत भरा. हे सर्व शेतकऱ्यांना फसवण्याचे नाटक आहे हे सर्वांना समजले पाहिजे,” असे देशमुख म्हणाले.

कर्मचाऱ्यांवरील खर्च आणि शेतकऱ्यांवरील अनास्था

देशमुख यांनी सरकारी खर्चाचे आकडेवारी मांडत सरकारला धारेवर धरले. “आज जेवढे राज्य शासनात कर्मचारी, अधिकारी आहेत, त्यांना एका वर्षाला १ लाख १३ हजार कोटी रुपये त्यांच्या पगारासाठी लागतात, त्यांच्या निवृत्ती वेतनासाठी १३ हजार ६०० कोटी लागतात, कर्मचाऱ्यांच्या वेतनवाढीसाठी २१ हजार कोटी लागतात. कर्मचाऱ्यांवर दोन ते सव्वादोन लाख कोटी खर्च करणारे सरकार शेतकऱ्यांना कर्जमाफीचा दिलेला शब्द पाळत नाही,” असा आरोप त्यांनी केला.

बच्चू कडूंच्या आंदोलनाला व्यापक पाठिंबा

बच्चू कडू यांनी शेतकऱ्यांना संपूर्ण कर्जमाफी, त्यांच्या मुलांना शिष्यवृत्ती, दिव्यांग आणि विधवा महिलांना ६ हजार रुपये मानधन, वंचित घटकांचे प्रश्न या मागण्यांसाठी हे आंदोलन सुरू केले आहे. अनिल देशमुख यांनी, “बच्चू भाऊंनी ज्या शेतकऱ्यांसाठी मागण्या केलेल्या आहेत आणि आंदोलन सुरू केले आहे, त्याला आमच्या राष्ट्रवादी काँग्रेस पक्षाचे पूर्ण समर्थन आहे. आदरणीय शरद पवार यांच्याशी सुद्धा माझी चर्चा झाली असून त्यांनी सुद्धा बच्चू कडू यांनी शेतकऱ्यांसाठी केलेल्या मागण्या रास्त असल्याचे सांगितले आहे,” असे स्पष्ट केले. दरम्यान, आज आंदोलनाच्या सहाव्या दिवशी छत्रपती संभाजीनगरचे मनसेचे नेते प्रकाश महाजन यांनीही बच्चू कडूंना भेटून कार्यकर्त्यांशी संवाद साधला.

बावनकुळे यांच्या भाषेवर आक्षेप

उपोषण सुरू असताना महसूलमंत्री तथा अमरावतीचे पालकमंत्री चंद्रशेखर बावनकुळे यांनी बच्चू कडूंना फोन करून कथितपणे ‘जमत असेल तर उपोषण सोडा, नाही तर…’ अशी भाषा वापरली होती. यावर अनिल देशमुख यांनी बावनकुळे यांची मंत्री म्हणून अशी भाषा वापरणे योग्य नसल्याचे स्पष्टपणे सांगितले.

अनिल देशमुख यांनी केलेल्या या आवाहनानंतर आता मुख्यमंत्री देवेंद्र फडणवीस शेतकऱ्यांच्या प्रश्नांवर काय भूमिका घेतात, याकडे संपूर्ण महाराष्ट्राचे लक्ष लागले आहे.

© २०२५ मॅक्स मंथन डेली न्यूज. सर्व हक्क राखीव.