‘ऑपरेशन सिंदूर’चे परदेशात नेतृत्व, हे केवळ तुमच्यामुळेच! – सुप्रिया सुळे

‘बळीराजा सहकार बचाव पॅनल’च्या प्रचाराचा बारामतीत रणशिंग फुंकले! (मॅक्स मंथन डेली न्यूज)

खा. सुप्रिया सुळे यांचा माळेगाव कारखान्यासाठी वज्रनिर्धार; ‘स्व. यशवंतराव चव्हाणांच्या विचारांचा वारसा घेऊन पारदर्शक कारभाराचे आणि शेतकऱ्यांना अधिक दर देण्याचे आश्वासन!’

बारामती, १५ जून २०२५: दि माळेगाव सहकारी साखर कारखाना लि. पंचवार्षिक निवडणूक २०२५-२०३० साठी बळीराजा सहकार बचाव पॅनलच्या प्रचाराचा शानदार शुभारंभ आज पणदरे, ता. बारामती येथे करण्यात आला. याप्रसंगी राष्ट्रवादी काँग्रेस पार्टी (शरदचंद्र पवार पक्ष) च्या खासदार सुप्रिया सुळे यांनी उपस्थितांशी संवाद साधत, कारखान्याच्या भवितव्यासाठी आणि शेतकरी हितासाठी आपल्या पॅनलला विजयी करण्याचे आवाहन केले.

‘चव्हाणांच्या विचारांचा वारसा अन् सत्तेचे विकेंद्रीकरण’: सुप्रिया सुळेंचे राजकीय सूत्र!

खा. सुप्रिया सुळे यांनी आपल्या भाषणात स्व. यशवंतराव चव्हाण साहेबांच्या विचारांचा वारसा आपल्यावर असल्याचे अभिमानाने सांगितले. “चव्हाण साहेबांनी सत्तेचे विकेंद्रीकरण झाले पाहिजे, असे विचार मांडले होते. सत्ता एका ठिकाणी असता कामा नये असे माझे मत आहे, पण आत्ता वेगळी परिस्थिती आहे,” असे नमूद करत त्यांनी अप्रत्यक्षपणे सद्यस्थितीवर भाष्य केले. लोकसभा निवडणुकीच्या वेळी आलेल्या संघर्षाच्या काळातही बारामतीकरांनी दिलेल्या प्रचंड मतांबद्दल त्यांनी सर्वांचे आभार मानले. महत्त्वाच्या संसदीय समितीवर राष्ट्रवादी काँग्रेस पार्टी (शरदचंद्र पवार पक्ष) चे खासदार महत्त्वाची भूमिका पार पाडत असल्याचे सांगून, ‘ऑपरेशन सिंदूर’चे परदेशात नेतृत्व करण्याची संधी माझ्यासारख्या बारामतीच्या लेकीला फक्त तुमच्यामुळे मिळाली, असे त्यांनी अभिमानाने नमूद केले.

नीरा नदी प्रदूषणमुक्ती ते पारदर्शक भरती: सुळे यांची आश्वासनांची मालिका!

माळेगाव कारखान्याच्या निवडणुकीसाठी चर्चेतून मार्ग निघेल असे वाटत होते, पण तसे झाले नाही, असे सांगत त्यांनी निवडणुकीची अपरिहार्यता स्पष्ट केली. यावेळी त्यांनी नीरा नदी प्रदूषणाच्या गंभीर मुद्द्याकडे लक्ष वेधले. “बारामतीकर आणि माझे प्रेमाचे नाते आहे, आणि त्या नात्यासाठी ही निवडणूक लढवत असल्याचे सांगून, नीरा नदी प्रदूषणमुक्त करण्यासाठी काम आपण करणार,” असे आश्वासन त्यांनी दिले.

• पारदर्शक भरती: सत्ता आल्यानंतर सर्वसमावेशक आणि पारदर्शक पद्धतीने भरती केली जाईल, असा शब्द त्यांनी दिला.
• संचालक मंडळाला स्वायत्तता: संचालक मंडळाला पूर्ण स्वायत्त दिले जाईल, असेही त्यांनी आवर्जून सांगितले.
• निधीचा योग्य वापर: ९० हजाराच्या भेळचा उल्लेख करत, वैयक्तिक खर्चासाठी कारखान्याचा निधी वापरला जाणार नाही, याची ग्वाही दिली.
• शेतकरी हिताला प्राधान्य: कारखाना पारदर्शक पद्धतीने चालेल आणि शेतकऱ्यांना उसाला जास्त पैसे मिळाले पाहिजेत, याकडे लक्ष देणार असल्याचे त्यांनी सांगितले.
• तंत्रज्ञानाचा वापर: सोमेश्वर कारखान्याच्या धर्तीवर ऊसतोडणी ऍप माळेगाव कारखान्यात आणणार असल्याचे आश्वासन दिले. तसेच, एआय (AI) चा वापर उत्पादन वाढीसाठी करण्यात येईल, यासाठी आदरणीय पवार साहेब, प्रतापकाका पवार आणि राजेंद्र दादा पवार हे काम करत असल्याचे सांगितले. देशाने निर्णय घेण्याअगोदर बारामतीत एआय लॅबचे काम सुरु करण्यात आले होते, असेही त्यांनी अधोरेखित केले.

पवार साहेबांचे परदेशातही आदराने घेतले जाणारे नाव अन् ‘लक्ष्मी नव्हे, सरस्वती आपल्यासोबत!’

दक्षिण आफ्रिकेतील एक आठवण सांगताना खा. सुप्रिया सुळे म्हणाल्या की, परदेशातही आदरणीय पवार साहेबांचे नाव आदराने घेतले जाते. द. आफ्रिकेतील ज्या पत्रकाराने पवार साहेब मुख्यमंत्री असताना त्यांची मुलाखत घेतली होती, तोच पत्रकार आता आपली मुलाखत घेत होता, हा एक अनोखा योगायोग असल्याचे त्यांनी सांगितले. “काहीजणांकडे लक्ष्मी आहे, पण आपल्याकडे सरस्वती आहे,” असे सूचक विधान करत त्यांनी विरोधकांना टोला लगावला. यावेळी त्यांनी वैभवी देशमुखचे नीट उत्तीर्ण झाल्याबद्दल अभिनंदन केले आणि कारखान्याच्या शिक्षण संस्थेत चांगले बदल घडवण्यासाठी काम केले जाईल, असा शब्दही दिला.

‘सहकार वाचलाच पाहिजे!’ – बळीराजा पॅनलला ‘तुतारी’वर विजयी करण्याचे आवाहन!

“सहकार हा वाचलाच पाहिजे आणि आपले बळीराजा सहकार बचाव पॅनेलला मतदार साथ देतील,” असा विश्वास खा. सुळे यांनी व्यक्त केला. कारखान्यासाठी केंद्रातून देखील मदत मिळवून देण्याचा शब्द देत, विरोधात असतानाही कामे होतात, असे त्यांनी आवर्जून सांगितले. ही लोकसभेला नेटाने लढणाऱ्या कार्यकर्त्याची निवडणूक असल्याचे अभिमानाने सांगत त्यांनी कार्यकर्त्यांचा उत्साह वाढवला. पुढील आठ दिवस अतिआत्मविश्वास न बाळगता शेवटच्या घटकापर्यंत आपले तुतारी हे चिन्ह पोहोचवा, असे आवाहन त्यांनी केले. शेवटी, शेतकरी आणि कामगार हितासाठी तुतारी या चिन्हावर शिक्का मारून सर्व वीस उमेदवारांना विजयी करण्याचे आवाहन त्यांनी केले.

बळीराजा सहकार बचाव पॅनलचे उमेदवार

गट क्र. १ माळेगांव (सर्व साधारण ऊस उत्पादक गट)

• तावरे अमित (आण्णा) चंद्रकांत
• ॲड. काटे राजेंद्र दौलतराव
• येळे श्रीहरी पांडुरंग

गट क्र. २ पणदरे (सर्व साधारण ऊस उत्पादक गट)

• कोकरे दयानंद चंद्रकांत
• जगताप भगतसिंग (आबा) हनुमंतराव
• जगताप सुशिलकुमार (पिनुआण्णा) उत्तम

गट क्र. ३ सांगवी (सर्व साधारण ऊस उत्पादक गट)

• तावरे संजय नामदेव
• खलाटे सुरेश तुकाराम
• जाधव राजेंद्र अशोकराव

गट क्र. ४ खांडज – शिरवली (सर्व साधारण ऊस उत्पादक गट)

• आटोळे सोपान तुकाराम
• पोंदकुले तानाजी भागुजी

गट क्र. ५ नीरावागज (सर्व साधारण ऊस उत्पादक गट)

• तुपे शरदचंद्र शंकरराव
• देवकाते गणपत शंकर

गट क्र. ६ बारामती (सर्व साधारण ऊस उत्पादक गट)

• वरे प्रल्हाद गुलाबराव
• गवळी अमोल देविदास

महिला राखीव प्रतिनिधी

• कोकरे शकुंतला शिवाजी
• गावडे पुष्पा मोहनराव

अनुसूचित जाती जमाती प्रतिनिधी

• भोसले राजु श्रीरंग

भ. वि. जाती जमाती प्रतिनिधी

• बुरुंगले ज्ञानदेव गुलाबराव

इतर मागास प्रवर्ग प्रतिनिधी

• बनकर भरत दतात्रय

याप्रसंगी युगेंद्र पवार, सभासद, शेतकरी यांच्यासह राष्ट्रवादी काँग्रेस पार्टी (शरदचंद्र पवार पक्ष) चे पदाधिकारी, कार्यकर्ते आदी मोठ्या संख्येने उपस्थित होते.

© २०२५ मॅक्स मंथन डेली न्यूज. सर्व हक्क राखीव.