मानवतेला काळीमा: स्मशानभूमीच्या वादातून मृतदेहाची ‘अनाथासारखी’ स्थिती!

बीडमध्ये ‘माणुसकी’चा अंत! सार्वजनिक स्मशानभूमीत अंत्यविधीस समाजकंटकांचा विरोध; उपमुख्यमंत्री अजित पवारांच्या जिल्ह्यात धक्कादायक प्रकार

शिवशाही व्यापारी संघाकडून तीव्र निषेध; आरोपींवर गुन्हा दाखल करण्याची मागणी!

बीड, १७ जून २०२५ (मॅक्स मंथन डेली न्यूज): महाराष्ट्राचे उपमुख्यमंत्री तथा एकेकाळी बीड जिल्ह्याचे पालकमंत्री राहिलेल्या अजित पवार यांच्या जिल्ह्यातून एक अत्यंत धक्कादायक आणि माणुसकीला काळीमा फासणारी घटना समोर आली आहे. बीड जिल्ह्यातील गेवराई तालुक्यातील सिंदखेड गावात सार्वजनिक स्मशानभूमीत एका दलित समाजातील व्यक्तीच्या अंत्यसंस्कारास काही समाजकंटकांनी जाहीरपणे विरोध केल्याचा संतापजनक प्रकार उघडकीस आला आहे. या निंदनीय कृत्याचा शिवशाही व्यापारी संघ या राज्यव्यापी संघटनेने तीव्र शब्दांत निषेध केला आहे.

७ तासांच्या संघर्षानंतर गायरान जमिनीवर अंत्यविधी

मिळालेल्या माहितीनुसार, सिंदखेड गावातील मातंग समाजाचे रामभाऊ दिनकर धुरंधरे यांचे निधन झाले. त्यांच्या अंत्यविधीसाठी नातेवाईकांनी गावातील सार्वजनिक स्मशानभूमीत जाण्याचा प्रयत्न केला असता, काही समाजकंटकांनी त्यांना विरोध केला. यामुळे अंत्यसंस्कारासाठी मोठा अडथळा निर्माण झाला. ही घटना समोर आल्यानंतर शिवशाही व्यापारी संघाने या कृत्याचा जाहीर निषेध करत तात्काळ हस्तक्षेप करण्याची मागणी केली.

या प्रकारानंतर पोलीस प्रशासनाने गावात धाव घेतली. मात्र, तब्बल सात तासांच्या संघर्षानंतर आणि मध्यस्थीनंतर, अखेर धुरंधरे यांच्यावर गावातील गायरान जमीन परिसरात अंत्यविधी करण्यात आला. या घटनेने समाजात तीव्र संताप व्यक्त केला जात आहे.

आरोपींवर गुन्हा दाखल करण्याची मागणी

शिवशाही व्यापारी संघाने या घटनेची गंभीर दखल घेतली असून, त्यांनी मुख्यमंत्री देवेंद्र फडणवीस यांना ईमेलद्वारे या प्रकरणात विरोध करणाऱ्या समाजकंटकांवर तात्काळ गुन्हा दाखल करण्याची मागणी केली आहे. शिवशाही व्यापारी संघाचे संस्थापक अध्यक्ष युवराज दाखले यांनी या घटनेची सखोल चौकशी करून दोषींवर कठोर कारवाई करण्याची मागणी केली आहे. गावात स्वतंत्र स्मशानभूमीची व्यवस्था करण्यात यावी, अशी मागणीही शिवशाही व्यापारी संघाच्या वतीने करण्यात आली आहे.

एकीकडे महाराष्ट्र पुरोगामी विचारांचा वारसा सांगत असताना, अशा घटना माणुसकी आणि समानतेच्या मूल्यांना आव्हान देत आहेत. प्रशासनाने यावर तात्काळ कठोर पाऊल उचलून, दोषींवर कारवाई करावी, अशी अपेक्षा व्यक्त केली जात आहे.

© २०२५ मॅक्स मंथन डेली न्यूज. सर्व हक्क राखीव.