इन्सेप्टिया हॅकेथॉन २०२५: नवसंकल्पनांना राष्ट्रीय व्यासपीठ!
अभियांत्रिकी विद्यार्थ्यांच्या तांत्रिक कौशल्यांचे प्रदर्शन; ‘सायलेंट ब्रिज’ टीम ठरली विजेती!
पिंपरी, पुणे (दि. ३० जुलै २०२५): ‘इन्सेप्टिया हॅकेथॉन २०२५’ ही राष्ट्रीय स्पर्धा अभियांत्रिकी क्षेत्रातील विद्यार्थ्यांना त्यांच्या नवीन संकल्पना, नव उपक्रम आणि तांत्रिक कौशल्ये सादर करण्यासाठी एक व्यापक राष्ट्रीय व्यासपीठ उपलब्ध करून देते. ही स्पर्धा केवळ जिंकण्यासाठी नसून, राष्ट्राच्या तांत्रिक विकासात योगदान देण्याची एक अनोखी संधी आहे, असे प्रतिपादन पीसीसीओईआरचे प्राचार्य डॉ. हरीश तिवारी यांनी केले.
राष्ट्रीय स्तरावरील स्पर्धेचे यशस्वी आयोजन
पिंपरी चिंचवड एज्युकेशन ट्रस्टच्या (पीसीईटी) रावेत येथील पिंपरी चिंचवड कॉलेज ऑफ इंजीनियरिंग अँड रिसर्च (पीसीसीओइआर) येथे या राष्ट्रीय स्तरावरील इन्सेप्टिया हॅकेथॉन स्पर्धेचे यशस्वी आयोजन करण्यात आले होते. या स्पर्धेत देशभरातील प्रतिभावान विद्यार्थ्यांनी सहभाग घेऊन आपले नाविन्यपूर्ण प्रकल्प सादर केले.
विजेत्यांचा गौरव: ‘सायलेंट ब्रिज’ टीम ठरली प्रथम
या अटीतटीच्या स्पर्धेत ‘सायलेंट ब्रिज’ या टीमने प्रथम क्रमांकासह २५ हजार रुपयांचे रोख बक्षीस पटकावले. या विजयी संघात पिंपरी चिंचवड विद्यापीठाच्या नेहा जगताप, मानसी साबळे, मिताली दहिफळे आणि वेल्लोर इन्स्टिट्यूट ऑफ टेक्नॉलॉजीच्या रितेश चौधरी यांचा समावेश होता.
द्वितीय क्रमांक वाघोली येथील जी. एच. रायसोनी कॉलेजच्या ‘टीम डीएमएस’ ने मिळवला, त्यांना १५ हजार रुपयांचे बक्षीस मिळाले. तर, पिंपरी येथील डॉ. डी. वाय. पाटील इन्स्टिट्यूट ऑफ टेक्नॉलॉजीच्या ‘टीम लोकलहोस्ट’ ने तृतीय क्रमांक पटकावत १० हजार रुपयांचे बक्षीस जिंकले.
उच्च तंत्रज्ञान आणि शैक्षणिक मूल्यांवर भर
यावेळी उपसंचालक डॉ. राहुल मापारी, विद्यार्थी कल्याण विभाग अधिष्ठाता डॉ. महेंद्र साळुंखे, संगणक विभाग प्रमुख डॉ. विजय कोटकर, आयटी विभाग प्रमुख संतोषकुमार चौबे, विद्यार्थी संघटनाप्रमुख अथर्व सातपुते आदी मान्यवर उपस्थित होते.
डॉ. तिवारी यांनी सांगितले की, पीसीईटी नेहमीच उच्च तंत्रज्ञान, कला आणि शैक्षणिक मूल्य विद्यार्थ्यांमध्ये रुजवण्यासाठी प्रयत्नशील असते. या स्पर्धेत आरोग्य सेवा, शिक्षण, वेब ३, फिनटेक, आर्टिफिशियल इंटेलिजन्स, मशीन लर्निंग आणि ओपन इनोव्हेशन यांसारख्या विविध महत्त्वाच्या विषयांशी संबंधित सर्जनशील आणि तांत्रिक कौशल्यपूर्ण प्रकल्प सादर करण्यात आले.
या स्पर्धेच्या यशस्वी आयोजनासाठी करण मालोरे, अथर्व सातपुते, आदित्य वाघमारे, राजस नांदेडकर, सृष्टी पाटील, मानसी चित्राल, श्रीराज डोंगरे या विद्यार्थ्यांनी समन्वयक म्हणून मोलाचे काम पाहिले. प्रास्ताविक डॉ. संतोषकुमार चौबे यांनी केले, तर आभार प्रदर्शन प्रा. भावना भदाणे यांनी केले.
पीसीईटीचे अध्यक्ष ज्ञानेश्वर लांडगे, उपाध्यक्षा पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त तथा पीसीयुचे कुलपती हर्षवर्धन पाटील, उद्योजक नरेंद्र लांडगे, अजिंक्य काळभोर आणि कार्यकारी संचालक डॉ. गिरीश देसाई यांच्या मार्गदर्शनाखाली ही स्पर्धा आयोजित करण्यात आली होती. त्यांनी विजेत्या विद्यार्थ्यांचे अभिनंदन करून पुढील वाटचालीस शुभेच्छा दिल्या.
© २०२५ मॅक्स मंथन डेली न्यूज. सर्व हक्क राखीव.
