काळेवाडी पोलिसांची मोठी कारवाई: ८.४० लाखांच्या २० दुचाकी जप्त, वाहनचोर टोळीला अटक
विविध पोलीस ठाण्यांमधील १० गुन्हे उघड, आरोपी रायगडचे रहिवासी
२१ ऑगस्ट २०२५, मॅक्स मंथन डेली न्यूज:
पिंपरी, प्रतिनिधी शाम सोनवणे – काळेवाडी पोलिसांनी वाहनचोरी करणाऱ्या एका आंतरजिल्हा टोळीचा पर्दाफाश केला आहे. या कारवाईत पोलिसांनी तब्बल ८.४० लाख रुपये किमतीच्या २० दुचाकी जप्त केल्या असून, त्यापैकी १० दुचाकी चोरीच्या गुन्ह्यांची उकल झाली आहे.
पोलिसांनी दिलेल्या माहितीनुसार, काळेवाडी परिसरातील पाचपीर चौकात सापळा रचून पोलिसांनी शुभम चंद्रकांत शिंदे (वय २६, रा. नढेनगर, काळेवाडी, मूळ रा. रायगड) याला ताब्यात घेतले. त्याच्याकडे केलेल्या चौकशीत त्याने गुन्ह्याची कबुली दिली. त्याच्याकडून मिळालेल्या माहितीनुसार, पोलिसांनी त्याचा साथीदार सोमनाथ शांताराम कासरुंग (वय ३२, रा. मुळशी, मूळ रा. रायगड) यालाही अटक केली.
या दोन्ही आरोपींकडून हिरो होंडा, स्प्लेंडर, युनिकॉर्न, पल्सर आणि ॲक्टीव्हा अशा विविध कंपन्यांच्या २० दुचाकी जप्त करण्यात आल्या आहेत. यापैकी १० दुचाकी चोरीचे गुन्हे काळेवाडी, हिंजवडी, वाकड, चिंचवड, चिखली आणि तळेगाव एमआयडीसी पोलीस ठाण्यांमध्ये दाखल आहेत. या कारवाईमुळे अनेक दुचाकी मालकांना त्यांचे वाहन परत मिळण्याची आशा आहे.
पोलीस आयुक्त विनायकुमार चौबे यांच्या मार्गदर्शनाखाली, वरिष्ठ पोलीस निरीक्षक राजेंद्र बहिरट यांच्या पथकाने ही यशस्वी कारवाई केली. या पथकात सहायक पोलीस निरीक्षक वैभव गुरव, पोलीस उपनिरीक्षक नागनाथ सूर्यवंशी, श्रेणी पोलीस उपनिरीक्षक राजेंद्र काळे यांच्यासह इतर पोलीस कर्मचाऱ्यांचा सहभाग होता.
© 2025 मॅक्स मंथन डेली न्यूज. सर्व हक्क राखीव.
