‘स्वच्छ सर्वेक्षण’मध्ये अव्वल स्थानी येण्यासाठी सर्वांनी एकत्र यावे: उपमुख्यमंत्री अजित पवार यांचे आवाहन

पिंपरी-चिंचवड शहराला ‘स्वच्छ सर्वेक्षण २०२५-२६’ मध्ये देशात प्रथम बनवण्यासाठी तयारीला सुरुवात

२३ ऑगस्ट २०२५, मॅक्स मंथन डेली न्यूज:

पिंपरी, पिंपरी प्रतिनिधी शाम सोनवणे – पिंपरी-चिंचवड शहराला स्वच्छ, हरित आणि समृद्ध शहर बनवण्यासाठी ‘स्वच्छ सर्वेक्षण २०२५-२६’ मध्ये अव्वल स्थान मिळवणे आवश्यक आहे, असे प्रतिपादन महाराष्ट्राचे उपमुख्यमंत्री अजित पवार यांनी केले. यासाठी महानगरपालिकेशिवाय लोकप्रतिनिधी, नागरिक आणि स्वयंसेवी संस्था अशा सर्वांनी एकत्रितपणे प्रयत्न करणे आवश्यक आहे, असे सांगत त्यांनी राज्य सरकारकडून आवश्यक ती मदत देण्याची ग्वाही दिली.

चिंचवड येथील प्रा. रामकृष्ण मोरे प्रेक्षागृहात आयोजित कार्यक्रमात ते बोलत होते. या कार्यक्रमात स्वच्छ सर्वेक्षण २०२४-२५ मधील यशासाठी योगदान देणाऱ्या व्यक्तींचा सन्मान करण्यात आला, तसेच २०२५-२६ च्या तयारीचाही प्रारंभ करण्यात आला.

पिंपरी-चिंचवडची स्वच्छतेत मोठी झेप

स्वच्छ भारत अभियानांतर्गत घेण्यात आलेल्या स्वच्छ सर्वेक्षण २०२४-२५ मध्ये पिंपरी-चिंचवडने देशात सातवे तर राज्यात प्रथम क्रमांक पटकावला आहे. शहराला ७ स्टार कचरामुक्त शहर आणि ‘वॉटर-प्लस’ प्रमाणपत्रही प्राप्त झाले आहे. महापालिका आयुक्त शेखर सिंह यांनी या यशाचे श्रेय सफाई सेवक आणि शहरातील नागरिकांना दिले. आता आपल्याला देशात पहिला क्रमांक मिळवण्याचे ध्येय गाठायचे असल्याचे त्यांनी नमूद केले.

यावेळी उपमुख्यमंत्री अजित पवार यांच्या हस्ते आर.आर.आर. सेंटर डॅशबोर्ड, शून्य कचरा प्रकल्प डॅशबोर्ड, स्वच्छ शौचालय ॲप आणि ‘स्वच्छ सर्वेक्षण २०२५-२६’ मॅस्कॉट व घोषवाक्याचे अनावरण करण्यात आले.

‘स्वच्छतेची सुरुवात स्वतःपासून करा’

उपमुख्यमंत्री पवार यांनी नागरिकांना स्वच्छतेच्या बाबतीत वैयक्तिक जबाबदारी घेण्याचे आवाहन केले. ते म्हणाले, “शहरात दररोज १४०० टन कचरा निर्माण होतो आणि लोकसंख्या वाढल्याने हे प्रमाण वाढत आहे. इंदूर शहराच्या यशात तेथील नागरिकांचा मोठा वाटा आहे. आपण परदेशात नियम पाळतो, कारण दंडाची भीती असते; पण ही आपली मातृभूमी आहे. येथील स्वच्छतेची सुरुवात प्रत्येकाने स्वतःपासून करणे गरजेचे आहे.”

या कार्यक्रमात खासदार श्रीरंग आप्पा बारणे यांनी घनकचरा व्यवस्थापन आणि नागरिक सहकार्याचे महत्त्व सांगितले. तसेच, आगामी काळात पवना, इंद्रायणी, मुळा नदी पुनरुज्जीवन प्रकल्पांवर लक्ष केंद्रित करण्याची गरज व्यक्त केली.

योगदान देणाऱ्यांचा सन्मान

स्वच्छ सर्वेक्षणामधील यशात महत्त्वपूर्ण योगदान देणाऱ्या अनेक व्यक्तींचा यावेळी सन्मान करण्यात आला. यामध्ये सफाई सेविका, सफाई सेवक, कचरा संकलन वाहक चालक आणि विविध सामाजिक संस्थांचे प्रतिनिधी यांचा गौरव करण्यात आला.

याव्यतिरिक्त, ‘स्वच्छ सर्वेक्षण २०२५-२६’ च्या घोषवाक्य आणि मॅस्कॉट डिझाइन स्पर्धेतील विजेते गिरीश कुटे (घोषवाक्य) आणि अतुल वाघमैतर (मॅस्कॉट) यांचाही सत्कार करण्यात आला. ‘हरित सेतू’ ब्रँड डिझाइन स्पर्धेतील विजेते प्रज्ज्वल दिंडे, रोहित घोडके, अमोल दर्डी आणि शौर्य भारद्वाज यांनाही रोख पारितोषिक देऊन सन्मानित करण्यात आले.

© 2025 मॅक्स मंथन डेली न्यूज. सर्व हक्क राखीव.