गणेशोत्सवासाठी महापालिका सज्ज; अतिरिक्त आयुक्तांनी घेतला विसर्जन घाटांचा प्रभागनिहाय आढावा

सुरक्षितता, स्वच्छता आणि सुविधांसाठी अधिकाऱ्यांना दिले महत्त्वाचे निर्देश

२६ ऑगस्ट २०२५, मॅक्स मंथन डेली न्यूज:

पिंपरी, प्रतिनिधी शाम सोनवणे – गणेशोत्सवाच्या पार्श्वभूमीवर पिंपरी-चिंचवड महापालिकेची पूर्वतयारी वेगात सुरू आहे. गणेश विसर्जनासाठी येणाऱ्या भाविकांना कोणतीही गैरसोय होऊ नये यासाठी अतिरिक्त आयुक्त विजयकुमार खोराटे आणि अतिरिक्त आयुक्त तृप्ती सांडभोर यांनी शहरातील महत्त्वाच्या विसर्जन घाटांची पाहणी करून आढावा घेतला.

विसर्जन घाटांवरील व्यवस्थेची सखोल पाहणी

अतिरिक्त आयुक्त खोराटे यांनी ‘ग’, ‘ड’ आणि ‘ह’ प्रभागातील सुहास नगर घाट, पवनेश्वर घाट, राम मंदिर शेजारील घाट, कासारवाडी आणि दापोडी येथील घाटांना भेटी दिल्या. तर, अतिरिक्त आयुक्त सांडभोर यांनी ‘अ’ आणि ‘ब’ प्रभागातील रावेत, चिंचवडगाव आणि निगडी परिसरातील घाटांची पाहणी केली.

या पाहणीदरम्यान दोन्ही आयुक्तांनी विसर्जन घाटांवरील पाणी, वीज, स्वच्छता, वाहतूक व्यवस्थापन, आपत्कालीन तयारी आणि निर्माल्य कुंड अशा विविध सोयीसुविधांचा सखोल आढावा घेतला.

गणेश भक्तांसाठी महत्त्वाच्या सूचना

पाहणीनंतर अधिकाऱ्यांना सूचना देताना अतिरिक्त आयुक्त खोराटे म्हणाले, “विसर्जन घाटांवरील सर्व सोयीसुविधा वेळेत उपलब्ध करून भाविकांना गैरसोय होणार नाही याची दक्षता घ्या. पर्यावरणपूरक गणेशोत्सवासाठी निर्माल्य व प्लास्टिक कचऱ्याची स्वतंत्र विल्हेवाट लावा.”

अतिरिक्त आयुक्त तृप्ती सांडभोर यांनीही काटेकोर नियोजनावर भर दिला. “सर्व संबंधित विभागांनी नियोजित कालावधीत आवश्यक उपाययोजना पूर्ण कराव्यात आणि मूर्ती संकलनाची योग्य व्यवस्था करावी,” असे निर्देश त्यांनी दिले.

यासोबतच, विसर्जन घाटांवर गर्दी नियंत्रणासाठी सुरक्षा रक्षक, स्वयंसेवक, वैद्यकीय मदत केंद्रे व रुग्णवाहिका यांची व्यवस्था करण्याच्या सूचनाही देण्यात आल्या. या सर्व प्रयत्नांमुळे यंदाचा गणेशोत्सव अधिक सुरक्षित आणि सुखकर होईल, अशी अपेक्षा व्यक्त केली जात आहे.