सुवर्ण महोत्सवी गणेशोत्सवाचा भव्य शुभारंभ!

५० वर्षांची परंपरा कायम राखत पिंपरीतील सुवर्ण मित्र मंडळ व शंभू प्रतिष्ठानचा गणेशोत्सव यंदा होणार ‘आदर्शवत’

२६ ऑगस्ट २०२५, मॅक्स मंथन डेली न्यूज:

पिंपरी, प्रतिनिधी शाम सोनवणे – पिंपरी गावातील सुवर्ण मित्र मंडळ आणि शंभू प्रतिष्ठान यांनी यंदा आपल्या स्थापनेचा सुवर्ण महोत्सवी (५० वा) वर्धापन दिन मोठ्या उत्साहात साजरा करण्याचा संकल्प केला आहे. गणेशोत्सवाच्या या सोनेरी वर्षाचे औचित्य साधत, वर्षभर धार्मिक, सामाजिक आणि प्रबोधनात्मक कार्यक्रमांची एक अनोखी मालिका आयोजित करण्याची मंडळाची योजना आहे. या उत्सवाचा भव्य शुभारंभ बुधवार, २७ ऑगस्ट रोजी रात्री ९ वाजता प्रसिद्ध दिग्दर्शक आणि अभिनेते प्रवीण तरडे यांच्या शुभहस्ते देखाव्याच्या उद्घाटनाने होणार आहे.

पाच दशकांची गौरवशाली परंपरा

१९७६ साली स्थापन झालेले हे मंडळ पिंपरी-चिंचवड शहरातील सर्वात जुन्या आणि नामांकित मंडळांपैकी एक आहे. गेल्या पाच दशकांपासून मंडळाने केवळ धार्मिक विधी आणि मिरवणुकांपुरतेच मर्यादित न राहता, समाजातील सर्व स्तरांसाठी उपयुक्त असे उपक्रम राबवून गावकऱ्यांच्या मनात एक विशेष स्थान निर्माण केले आहे. मंडळाची ही गौरवशाली वाटचाल कै. माजी नगरसेवक नंदकुमार जाधव, प्रदीप कुदळे, राजेंद्र परदेशी, दीपक उत्तेकर, गजानन गवळी, प्रवीण कुदळे अशा अनेक मान्यवरांनी अध्यक्षपद भूषवून समृद्ध केली आहे. यंदाचा गणेशोत्सव सर्व गावकऱ्यांचा सक्रिय सहभाग, तरुणाईचा उत्साह आणि महिला भगिनींच्या सहभागाने पंचक्रोशीत आदर्श ठरेल, असा विश्वास मंडळाचे अध्यक्ष विनायक कुलकर्णी व मंडळाचे माजी अध्यक्ष तथा विश्वस्त प्रवीण कुदळे यांनी व्यक्त केला आहे.

गणेशोत्सव नव्हे, समाजसेवेचा मेळावा

सुवर्णमहोत्सवी वर्ष म्हणून मंडळाने यंदाच्या गणेशोत्सवाचे स्वरूप अधिक व्यापक केले आहे. पारंपरिक पूजेसोबतच समाजातील सर्व घटकांना एकत्र आणणारे आणि त्यांच्या हिताचे कार्यक्रम आयोजित केले आहेत. यामध्ये ज्येष्ठ नागरिकांसाठी विशेष भजन, कॅरम आणि बुद्धिबळ स्पर्धा यांचा समावेश आहे. तसेच, नागरिकांच्या आरोग्याची काळजी घेण्यासाठी मोफत आरोग्य तपासणी शिबिर आयोजित करण्यात आले आहे. महिला भगिनींसाठी त्यांच्या आवडीचा ‘खेळ पैठणीचा’ आणि त्यांच्या शक्तीचे प्रतीक म्हणून मर्दानी खेळांचे खास आयोजन करण्यात आले आहे. विद्यार्थ्यांमधील सुप्त कलागुणांना वाव देण्यासाठी निबंध, चित्रकला आणि वक्तृत्व स्पर्धा होणार आहेत. हे सर्व कार्यक्रम विनामूल्य असून, विजेत्यांना आकर्षक बक्षिसे देऊन गौरवण्यात येणार आहे. अशी माहिती संस्थेचे उपाध्यक्ष केतन जाचक, खजिनदार समीर कुदळे आणि उपखजिनदार सौरभ कुदळे यांनी दिली आहे

भक्ती आणि प्रबोधनाचा संगम

यावर्षीच्या गणेशोत्सवात आध्यात्मिक आणि सांस्कृतिक कार्यक्रमांचाही संगम पाहायला मिळणार आहे. धीरज वानखेडे यांच्या सुमधुर आवाजातील भक्ती गीत आणि शिवगीतांचा विशेष कार्यक्रम श्रोत्यांसाठी एक अनोखी पर्वणी असेल. मंडळाचा प्रमुख उद्देश धार्मिक व सांस्कृतिक परंपरेसोबतच सामाजिक प्रबोधन करणे हा आहे. हा उत्सव केवळ देखावा किंवा मिरवणुकीपुरता मर्यादित नसून, तो समाजाला एकत्र आणणारा, विचार करायला लावणारा आणि आदर्शवत उपक्रम ठरावा, असा मंडळाचा संकल्प आहे.

संपूर्ण गणेशोत्सव कार्यक्रम वेळापत्रक

या सोहळ्याचा आनंद घेण्यासाठी पिंपरी गावातील सुवर्ण मित्र मंडळ आणि शंभू प्रतिष्ठानच्या वतीने सर्व ग्रामस्थ, हितचिंतक आणि नागरिकांना उपस्थित राहण्याचे आवाहन करण्यात आले आहे. संपूर्ण गणेशोत्सवाचे वेळापत्रक खालीलप्रमाणे:

• बुधवार, दि. २७ ऑगस्ट: रात्री ९ वाजता, “श्रीं” चा आगमन सोहळा आणि अभिनेते प्रवीण तरडे यांच्या हस्ते देखाव्याचे उदघाटन.
• गुरुवार, दि. २८ ऑगस्ट: सायंकाळी ६ वाजता, ज्येष्ठ नागरिकांचे भजन आणि रात्री ८ वाजता “श्रीं”ची आरती.
• शुक्रवार, दि. २९ ऑगस्ट: सायंकाळी ६ वाजता, विठ्ठल रुक्मिणी भजनी मंडळ (काळेवाडी) यांचे भजन, त्यानंतर रात्री ८ वाजता “श्रीं”ची आरती.
• शनिवार, दि. ३० ऑगस्ट: दुपारी १ ते रात्री ८ पर्यंत ज्येष्ठ नागरिकांसाठी कॅरम आणि बुद्धिबळ स्पर्धा, रात्री ८ वाजता “श्रीं”ची आरती.
• रविवार, दि. ३१ ऑगस्ट: सकाळी ११ ते दुपारी ३, मोफत आरोग्य तपासणी शिबिर. सायंकाळी ६ वाजता, सावतामाळी भजन मंडळ (पिंपरीगाव) यांचे भजन, सायंकाळी ७:३० वाजता युवती व महिला भगिनींचे मर्दानी खेळ, रात्री ८ वाजता “श्रीं”ची आरती.
• सोमवार, दि. १ सप्टेंबर: सायंकाळी ६ वाजता, तुळजाभवानी भजनी मंडळ यांचे भजन आणि रात्री ८ वाजता “श्रीं”ची आरती.
• मंगळवार, दि. २ सप्टेंबर: सकाळी ११ ते दुपारी ३, निबंध, चित्रकला आणि वक्तृत्व स्पर्धा. सायंकाळी ६ वाजता भजन आणि रात्री ८ वाजता “श्रीं”ची आरती.
• बुधवार, दि. ३ सप्टेंबर: सकाळी ११ ते दुपारी ३, निबंध, चित्रकला आणि वक्तृत्व स्पर्धा, रात्री ८ वाजता “श्रीं”ची आरती.
• गुरुवार, दि. ४ सप्टेंबर: सायंकाळी ७ वाजता, धीरज वानखेडे यांच्या भक्ती गीत आणि शिवगीतांचा कार्यक्रम आणि रात्री ८ वाजता “श्रीं”ची आरती.
• शुक्रवार, दि. ५ सप्टेंबर: सायंकाळी ७ वाजता, महिला भगिनींचे विशेष आकर्षण असलेला ‘खेळ पैठणीचा’ कार्यक्रम, त्यानंतर “श्रीं”ची आरती.

या भव्य सोहळ्यात सहभागी होऊन मंडळाच्या ५० वर्षांच्या प्रवासाला एक नवा अध्याय जोडण्याचे आवाहन करण्यात येत आहे.

© 2025 मॅक्स मंथन डेली न्यूज. सर्व हक्क राखीव.